ԿԶԻՋԵՆ ԱՐԴՅՈՔ ԱՎԱԳ ԴԱՇՆԱԿՑԱԿԱՆՆԵՐԸ ԵՐԻՏԱՍԱՐԴՆԵՐԻՆ
Ընդդիմադիր քաղաքական ուժերի համագործակցության թեման քննարկվում է ոչ թե ուղիղ քաղաքական բանավեճերի, այլ պինգ-պոնգի ռեժիմով: Առաջին փոխանցումը կատարեց Րաֆֆի Հովհաննիսյանը, բայց երեք ընդդիմադիր ուժերից միայն “Ժառանգությունն” է հայտարարում միավորվելու մասին: Մյուս երկուսը` Հայ Ազգային կոնգրեսն ու Դաշնակցությունը, չեն մերժում գործակցության գաղափարը, բայց պատրաստ լինելու մասին էլ չեն հայտարարում: Տպավորությունն այնպիսին է, որ գործակցության գաղափարը հետեւողականորեն ներդնում են դրսից` լավ կամ վատ մտադրությամբ:
Ինչպիսին էլ որ լինեն այդ գաղափարը դրսից ներդնելու մոտիվները, ակնհայտ է, որ դաշնակցական խոփը դեմ առավ քարին: Վահան Հովհաննիսյանի հնչեցրած հարցին, թե ինչի շուրջ կարող են միավորվել ՀՅԴ եւ ՀԱԿ, Լեւոն Տեր-Պետրոսյանը տվեց հստակ պատասխան` պլատֆորմի շուրջ, որն իր մեջ ներառում է արտահերթ ընտրության եւ նախագահի հրաժարականի պահանջ: Այդ առաջարկին Դաշնակցությունը չի պատասխանել դեռ, ու հազիվ թե պատասխանի առանց ներքին լուրջ քննարկումների:
Դաշնակցությանը մոտ կանգնած աղբյուրները վկայում են, որ կուսակցության մեջ առկա է երկու սերունդների պայքար: ՀՅԴ շարքերում տարաձայնությունների մասին կարելի է դատել թեկուզ առանձին անդամների հայտարարություններով: Եթե “հին գվարդիայի” ներկայացուցիչները միարժեք հերքում են ՀԱԿ հետ գործակցության հնարավորությունն ու կտրուկ հայտարարություններ չեն անում երկրի իրավիճակի եւ ընտրությունների կապակցությամբ, ապա առավել երիտասարդները, օրինակ Արծվիկ Մինասյանը, արդեն ոչ մեկ անգամ է կոչ արել թողնել անձնական ատելությունն ու գաղափարական տարաձայնությունները եւ մտածել երկրի մասին:
“Հին գվարդիան” ինքնին չի կարող գնալ արմատական քայլերի: Բացի այն, որ գվարդիայի շատ ներկայացուցիչներ 90-ականներին, Լեւոն Տեր-Պետրոսյանի օրոք հայտնվել էին բանտում, այն շրջանում, երբ Դաշնակցությունը հայտնվեց իշխանական կոալիցիայի մեջ, կուսակցապետերը հաջողեցին կոալիցիոն գործընկերների հետ կապվել հարազատական, բարեկամական կապերով, շահավետ բիզնեսով: Ի վերջո, հանգիստ կյանքը ավագ սերնդի դաշնակցականների միջից հանել է “հեղափոխականությունը”, եւ նրանք այժմ չեն կարող հրաժարվել կայունությունից եւ նետվել քաղաքական պայքարի բովը:
Ավագները կլինե՞ն իրենց երիտասարդ ընկերների ճանապարհի խոչընդոտ, թե կնախընտրեն զիջել ճանապարհը:
Մեջբերել
:
Ձայնալար-ի խոսքերից
Արթիկի տուֆից տարբերվում են միայն նրանով, որ Արթիկի տուֆը օգտակար բան է: Սրանց ամեն մեկի տեղը մի մի հատ բարդի ավել լիներ Երևանում, հաստատ շատ ավելի լավ կլիներ:
Էջանիշներ