Վերջին շրջանում որոշակի իրադարձություններ են տեղի ունենում, որոնցից ոմանք սկզբում շարժեցին զայրույթս, իսկ հետո մտորելու տեղիք տվեցին:
Խնդիրն այն է, որ բազմաթիվ անգամներ ինձ խնդրելուց հետո, որ իրեն հեռացնեմ ադմինիստրատորությունից ու ստանալով մերժում, Artego-ն վերջապես խոսեց ուլտիմատումի լեզվով ու պարզապես հեռացավ ադմինիստրատորությունից, ղեկավար կազմում մնալով որպես երկու բաժինների մոդերատոր: Ընդ որում ինքը ինձ այդպես էլ նորմալ չբացատրեց իր հեռանալու պատճառը, ինչի պատճառը կարծում եմ այն էր, որ կարծում էր, թե այդ դեպքում իրեն կհամոզեմ մնալ:
Իսկ պատճառը կարծում եմ, որ հիմնականում իր անձի շուրջ կարծեցյալ կամ իրական անվստահության մթնոլորտի ձևավորումն էր: Վերջին շրջանում հատկապես ուժգնացել էին (ու հատկապես մի խումբ մարդկանց կողմից) մեր աշխատանքի, մեր անաչառության քննադատությունը, մեղադրականները: Արթուրը նվիրված լինելով ակումբին, կարծում եմ որ որոշեց հեռանալ՝ փորձելով նպաստել այդ անվստահության մթնոլորտի վերացմանը: Ես այս պահին այդ նույն անվստահության անաչառության վերաբերյալ իմ ուրույն կարծիքն ունեմ, որը սակայն բաց տեքստով չեմ ներկայացնի:
Ինչևէ, հուսով եմ, որ Արթուրն ինձ կների այս թեման բացելու համար: Այստեղ Արթուրի օրինակով ես ուզում եմ տեսնել ակումբցիների վերաբերմունքը ղեկավարության աշխատանքի վերաբերյալ (հիմնականում ադմինիստրատորական կազմի, ոչ թե մոդերատորական), դա ինձ կթույլատրի որոշակի եզրակացություններ անել, անհրաժեշտության դեպքում փոխել մարտավարությունը: Իսկ որոշակի արդյունք այս թեմայում ստանալու դեպքում փորձ եմ անելու Արթուրին վերադարձնել իր ադմինիստրատորական դիրքին:
Խնդրում եմ քվեարկել ու կարծիքներ գրել անկաշկանդ: Վստահեցնում եմ, որ թե Արթուրը, թե մենք՝ մյուս ղեկավարներս, պատրաստ ենք լսել առողջ քննադատություն, դրանից չընկնել դեպրեսիայի մեջ, չլարվել ակումբցիների դեմ, չթշնամանալ: Այս քննադատությունից է կախված լինելու ակումբի կառավարման հետագա ընթացքը, մարտավարությունը, հետևապես սա որպես զուտ հաճոյանալու տեսակ չդիտարկեք, այլ եղեք առավել անկեղծ:
Թեմային կից բացում եմ հարցում, որտեղ առաջարկում եմ գնահատել Artego-ի աշխատանքը «ադմինիստրատորական աթոռում», նրա գործողությունները, մարտավարությունը, կատարած քայլերը:
Շնորհակալություն:
Էջանիշներ