Հայլուր՝ «Ժառանգության» հարձակումը խաղաղ իրավապահների վրա
ԵՐԵՎԱՆ, ՀԱՅԼՈՒՐ – Մարտի 3-ին կառավարության շենքի դիմաց “Ժառանգություն” կուսակցության պատգամավորները ավազակային հարձակում են գործել խաղաղ հավաքված իրավապահների վրա: Մի քանի իրավապահ ստացել են մարմնական վնասվածքներ և տեղափոխվել հիվանդանոց: Դեպքի առնչությամբ բացվել է քրեական հետաքննություն:
54-ամյա կապիտան Ստրուկյանը Հայլուրին պատմեց դեպքի մանրամասները. “Ես պարզապես խոսքեր չունեմ.. Մենք ոստիկաններով կառավարության շենքի դիմաց խաղաղ քննարկում էինք Վոլտերի ազդեցությունը ֆրանսիական վերածնունդի վրա, երբ… մեջքի հետևից զգացի հարված, երբ շրջվեցի տեսա Զարուհի Փոստանջյանի ահասարսուռ հայացքը.. հաջորդ բանը, որ հիշում եմ՝ արթնացա հիվանդանոցում:”
Ըստ Հ1-ի հավաստի աղբյուրների ծեծը տևեց մոտ մեկ ժամ, որի ընթացքում “Ժառանգության” Արմեն Մարտիրոսյանը (դյուդոյի վարպետ – խմբ.) կոտրեց երեք ոստիկանի ձեռք, չորս ոտք և մի քանի պատահական անցորդների կողեր: Հանրային հեռուստատեսության փոխանցմամբ դեպքի վայրում գտնվում էր նաև նախկինում դատված, բայց կասկածելի պայմաններում ազատ արձակված Մարիամ Սուխուդյանը:
«Մենք երկխոսության կոչեր էինք անում, երբ Սուխուդյանը երկաթե խողովակով իջավ դեմքիս», նշում է սերժանտ Սուսլիկյանը, «սակայն նրանց հետ էին մի խումբ վաճառական ցուցարարներ, որոնք բռնել էին մեր ձեռքերը մինչ Ժառանգությունը նվաստացնում էր մեր արժանապատվությունը… կառավրության շենքի մոտ:»
Անմիջապես միջադեպից հետո արյունահոսող ոստիկանները բարձրացան վարչապետի մոտ և պահանջեցին պատժել ընդդիմադիր պատգամավորներին: «Վարչապետև մեզ խոստացավ խորհրդարանական հետաքննություն նախաձեռնել և պատժել հարձակվողներին», Հայլուրին ասաց լեյտենանտ Որսկանյանը:
«Սակայն սա առաջին նման դեպքը չէ, երբ ժառանգությունը հարձակվում է ոստիկանության վրա և մնում է անպատիժ: Ի դեպ, մեր տեղեկություններով նրանցից մեկը ունի քրեական անցյալ և ներկա ունեցող եղբայր, որը այս պահին մեղադրվում է դրամաշորթության և 4 մայորի մարմնական վնասվածքներ պատճառելու համար», նշեց իրավապահը:
«Ժառանգության» պատգամավորները հաջորդ օրը հրավիրեցին մամլո ասուլիս, որի ընթացքում Հայլուրի փոխանցմամբ ոչ մի բան չասացին:
Հոգեբան Կարինե Նալչաջյանի պնդմամբ դա սովորական երևույթ է. «Դա սովորական երևույթ է: Հոգեբանական տեսանկյունից ընդդիմությունը վնասակար է ոստիկանների առողջությանը»:
«Ընդհանրապես Հայաստանի նման փոքր և մոնոէթնիկ երկրների համար ավելի հարմար է միապետական, միակուսակցական համակարգը, որը կարող է պարտադրել երջանկություն իր քաղաքացիներին անկախ քաղաքական հայացքներից», բացատրեց Նալչաջյանը:
Հայլուրի փոխանցմամբ հարձակվող ավազակախումբը դեռ ազատության մեջ է:
http://www.armcomedy.com/2011/03/07/haylur/
Մեջբերել
Էջանիշներ