Հայաստանի առաջադիմական կուսակցությունը պատրաստվում է դատարան դիմել հայցով ընդդեմ Amnesty International կազմակերպության: Ըստ կուսակցության` Amnesty International-ի զեկույցում բացահայտ սուտ է գրված իրենց մասին:
Amnesty International-ը մասնավորապես անդրադարձել էր 2008-ի մայիսի 21-ին Հայաստանի Հելսինկյան ընկերակցության ղեկավար Միքայել Դանիելյանի դեմ հարձակմանը` նշելով, որ մեղավորները չեն պատժվել:
Երկու տարի առաջ Հայաստանի Առաջադիմական Կուսակցության նախագահ Տիգրան Ուրիխանյանը գազի ատրճանակից կրակել էր Միքայել Դանիելյանի վրա:
Ըստ իրավապաշտպանի` Տիգրան Ուրիխանյանը փողոցի մեջտեղում ասել էր` «հերիք ա, կյանքներս կերար, ՑՌՈՒ-շնիկի մեկը, արվամոլներին ես պաշտպանո՞ւմ», ու գրպանից հանել է գազի ատրճանակն ու կրակել Միքայել Դանիելյանի կրծքավանդակին:
Իսկ ահա Տիգրան Ուրիխանյանի կողմնակիցները շարունակում են պնդել,թե «հարբած Միկա Դանիելյանն ու իր ընկերները հետապնդել ու հարձակվել են Հայաստանի Առաջադիմական Կուսակցության նախագահ Տ. Ուրիխանյանի վրա, որը հարկադրված դիմել էր ինքնապաշտպանության` օդ արձակելով անգնդակ, դատարկ կրակոց»:
«Գործունեության ողջ ընթացքում մարդկանց իրավունքների պաշտպանությամբ զբաղվող Տիգրան Ուրիխանյանի հանդեպ խուլիգանական արարքներ գործած իբր իրավապաշտպան Դանիելյանը չդատապարտվեց և այսօր ազատության մեջ է, իսկ վերը նշված կազմակերպությունը իրականությանը հակառակ բացարձակ ստեր է գրում, ճիշտ այնպես, ինչպես ամբողջ այդ «զեկույց» կոչվածում մեր երկրին վերաբերող մնացած թեմաներով նյութերում»,-ասված է Հայաստանի առաջադիմական կուսակցության այսօրվա հայտարարության մեջ:
Հայաստանի առաջադիմական կուսակցությունը դատարանում պահանջելու է 1.000.000 դոլարի չափով բարոյական վնասի հատուցում:
Ի դեպ, քրեական այս գործը կարճվել է նախորդ տարի:
Մեջբերել
Էջանիշներ