Beeline-Ն ՆԵՐԴՆՈՒՄ Է ՆՈՐ ՀԱՄԱԿԱՐԳ
19 Հունիսի, 2008
Այսուհետեւ կարող ես զանգահարել ընկերներիդ եւ հեռակա կարգով ոչ միայն լսել նրանց ձայնը, այլ նաեւ տեսնել թե ինչ են անում նրանք եւ որտեղ են: Հուլիս ամսից Հայաստանում Beeline ընկերությունը իր բաժանորդներին նման հնարավորություն կընձեռնի:
Այսօր Beeline ընկերությունը հրավիրել էր ասուլիս` հայտարարելու, որ իրենք առաջին օպերատորը դարձան, որը ներդրեց նոր սերնդի ցանցը Հայաստանում, եւ հուլիսի վերջին ընկերությունը կսկսի 3G համակարգի կոմերցիոն գործարկումը: Ծառայությունը նախնական շրջանում կլինի անվճար: Իսկ թե հետագայում ինչ կարժենա, ընկերության տնօրինությունը խուսափեց պատասխանել: Առաջին փուլում այն հասանելի կլինի քաղաքի կենտրոնական մասում եւ հիմնական մայրուղիների տարածքում:
Ի՞նչ է իրենցից ներկայացնում 3G համակարգը: Դրանք երրորդ սերնդի շարժական տեխնոլոգիաներ են, որոնք թույլ են տալիս ստանալ ՚մուլտիմեդիաՙ բջջային ծառայություններ եւ ինտերնետին միանալու բարձր արագություն: Այդ համակարգի միջոցով մատուցվող ծառայությունների ցանկի մեջ են մտնում նաեւ տեսահեռախոսակապը (վիդեոհեռախոսակապ), տեսա-զանգը եւ շարժական հեռուստատեսությունը:
Ըստ ՚ԱրմենՏելՙ ՓԲԸ գլխավոր տնօրեն Նեյչո Վելիչկովի` իրենք մեծ նշանակություն են տալիս Հայաստանում այդ ծառայության հնարավորինս լայն տարածմանը, որը հնարավորություն կտա որակապես բարելավել կապի օգտագործման հնարավորությունները թե աշխատանքի, թե զվարճությունների համար, պարգեւել վառ զգացողություններ եւ շփումներ բաժանորդներին: ՚Սա շատ կարեւոր քայլ է կոնվերգենտ ցանցի ստեղծման ճանապարհին, որի կառուցումը նախատեսում ենք ավարտել 2009թ. վերջին: Ներկայումս կոնվերգենտ լուծումները աշխարհի քիչ թվով երկրներում են մատչելի: Այս ցանցը, որը համակցում է ֆիքսված եւ բջջային կապերը, ընկերությունը մտադիր է Հայաստանում զարգացնել փուլ առ փուլՙ,- նշեց նա:
Ի դեպ, Նեյչո Վելիչկովը վստահեցրեց, որ Beeline ընկերության ծառայությունների գների բարձրացումներ չեն սպասվում:




Մեջբերել

Էջանիշներ