Չափից դուրս խիստ կարգավորումը այնքան էլ չի նպաստում շուկայի ընդհանուր զարգացմանը
Հարցազրույց «ՎիմպելԿոմ» ընկերության գլխավոր գործադիր տնօրեն Բորիս Նեմչիչի հետ
Բ.Նեմչիչ. «Մենք հետ չենք մնում մրցակիցներից, քանի որ շարժական հեռախոսակապի շուկայում ցանցերը կառուցված են նույն տեխնոլոգիաներով»:
- Որքանո՞վ է հայկական շուկան «Վիմպելկոմի» համար շարունակում մնալ գերակա՝ հաշվի առնելով թեժացող մրցակցությունը և Հանրային ծառայությունները կարգավորող հանձնաժողովի գործողությունները:
- «ՎիմպելԿոմի» համար Հայաստանն առանցքային շուկաներից է, որտեղ մենք հետևողական ենք: Մենք ցանկանում ենք Հայաստանի հեռահաղորդակցության շուկայի զարգացման հարցում միշտ համագործակցել կարգավորողի հետ և համագործակցում ենք, բայց երբեմն ունենում ենք [«ԱրմենՏել»] ընկերության զարգացման տարբեր պատկերացումներ: Երբեմն չափից դուրս խիստ կարգավորումը այնքան էլ չի նպաստում շուկայի ընդհանուր զարգացմանը: Բայց մյուս կողմից դաշտը ամբողջովին առանց կարգավորման թողնելը նույնպես ճիշտ չէ: Շուկայի զարգացման համար մեզ անհրաժեշտ է կառուցողական երկխոսություն, և դրա համար առաջին հերթին պետք է որոշել, թե որն է լավագույնը հայ սպառողների համար:
- Հաշվի առնելով, որ ՀԾԿՀ-ն մեծածախ ինտերնետի համար հունվարի 1-ից սահմանել է առաստաղային գներ, և ինտերնետ ներկրող խոշոր ընկերությունների փաստացի շահութաբերության մակարդակը չպետք է գերազանցի 15%-ը՝ որքանո՞վ է այդ շուկան ձեզ համար մնում գրավիչ:
- Հայաստանում մենք աշխատում ենք ինտերնետի թե՛ մեծածախ, թե՛ մանրածախ ոլորտներում: Վերջնական սպառողներին ինտերնետ հասանելիության ծառայություններ մատուցելու սեգմենտում մենք շարունակելու ենք աշխատանքներ ծավալել: Մի քանի օր առաջ հայտարարեցինք ամրակցված հեռախոսակապի ցանցով ADSL տեխնոլոգիայով ինտերնետ հասանելիության ծառայության աննախադեպ առաջարկի մասին: ADSL-ի և՛ հին, և՛ նոր բաժանորդներին որակյալ ինտերնետ կապով ապահովելու համար մենք լուրջ ներդրումներ ենք կատարել ներքին ենթակառուցվածքներում, ներկրվող ինտերնետի ծավալների ավելացման համար ավելացրել են կապուղիները:
Բացի այդ՝ Հայաստանում մենք զարգացնում ենք «ԱրմենՏելի» շարժական կապի 3G ցանցը: Չեմ կարծում, որ շահութաբերության մակարդակի սահմանումը ճիշտ մոտեցում է, բայց մյուս կողմից՝ գտնում եմ, որ ինտերնետի գինը պետք է ողջամիտ լինի: Կարծում եմ՝ Հայաստանի բոլոր պրովայդերները պետք է ներդրումներ կատարեն միջազգային ելքի կապուղիներում: Եթե բոլորը շարժվեն այդ ուղղությամբ՝ նման խնդիր չի լինի:
- «ԱրմենՏելը» կարծես հետ է մնում մրցակիցներից շարժական հեռախոսակապի ցանցի հարցում, եթե հաշվի առնենք, որ Ձեր մրցակիցները հայտարարում են, որ կառուցել են 3G+ ցանցեր: Դուք պատրաստվո՞ւմ եք շարժական հեռախոսակապում ավելի ժամանակակից տեխնոլոգիաներ ներդնել:
- Մենք հետ չենք մնում մրցակիցներից, քանի որ շարժական հեռախոսակապի շուկայում ցանցերը կառուցված են նույն տեխնոլոգիաներով: Միջոցառումների, նորությունների անոնսավորման հարցում ես վարպետ չեմ: Մենք ինտեգրացված օպերատոր ենք, և դա մեր առավելությունն է:
Ինչ վերաբերում է 3G-ին, ապա կրկնեմ՝ թե՛ մեր, թե՛ մեր մրցակիցների մոտ նույն տեխնոլոգիաներն են, նույն որակը: Շարժական հեռախոսակապի շուկայում մենք, բացի երրորդ սերնդի ցանցից, ունենք երկրորդ սերնդի ընդարձակ ցանց: Մենք նաև ունենք ամրակցված հեռախոսակապի ցանց: Հայաստանի հեռահաղորդակցության շուկայում յուրաքանչյուր ընկերություն ունի շուկայական դիրքավորման իր ռազմավարությունը: Ինչ վերաբերում է 4G-ին, կարծում եմ՝ ժամանակը ցույց կտա շուկա մուտք գործելու ամենալավ ժամանակահատվածը:




Մեջբերել





Էջանիշներ