Տեղեկատվական տեխնոլոգիաների զարգացվածության` Համաշխարհային տնտեսական համաժողովի կողմից հրապարակված հերթական վարկանիշի համաձայն, Հայաստանը 106-րդ տեղն է զբաղեցրել։
Ինչպես հաղորդում է «The Washington Profile»-ը, ԱՊՀ երկրների թվում Հայաստանը նախավերջին տեղում է հայտնվել` առաջ անցնելով միայն Ղրղստանից, որը 114-րդ տեղն է զբաղեցրել։
Զեկուցում ամփոփված է աշխարհի 127 երկրի մասին տեղեկատվություն։ ՏՏ զարգացման մակարդակը գնահատվում է ըստ երեք հիմնական չափորոշիչների` ինչպես են բնակչությունը, բիզնեսը և իշխանությունները պատրաստ օգտագործել կամ օգտագործում են տեղեկատվական տեխնոլոգիաների ընձեռած հնարավորությունները։
Պետությունների առաջին տասնյակում, որտեղ ՏՏ ոլորտն առավելագույն զարգացում է ապրել, ընդգրկվել են Դանիան, Շվեդիան, Շվեյցարիան, ԱՄՆ-ը, Սինգապուրը, Ֆինլանդիան, Նիդերլանդները, Իսլանդիան, Հարավային Կորեան և Նորվեգիան։ Հետխորհրդային պետությունները բաշխվել են հետևյալ կերպ. Էստոնիա`20-րդ տեղ, Լիտվա` 33, Լատվիա` 44, Ադրբեջան`67, Ուկրաինա` 70, Ղազախստան` 71, Ռուսաստան` 72, Վրաստան` 91, Մոլդովա` 96, Տաջիկստան` 98։ Վարկանիշը եզրափակում է` Չադը` 127-րդ տեղ։
ԱրմԻնֆո
Էջանիշներ