Իմ երեխային դաժանաբար ծեծելով սպանել են. զինվորի մայր
11:13 • 30.08.11
Անցած ուրբաթ բանակում մահացած զինվորի հարազատները պնդում են, որ 18-ամյա տղային ոչ թե անզգուշությամբ են մահ պատճառել, այլ սպանել են ծեծելով: Այս մասին հաղորդում է «Ազատություն» ռադիոկայանը։
Համաձայն պաշտոնական տեղեկատվության` Երևանից Լեռնային Ղարաբաղ զորակոչված, 1992 թվականին ծնված Աղասի Աբրահամյանը մահացել է Ղարաբաղի զորամասերից մեկում օգոստոսի 26-ին, ժամը 21:30-ի սահմաններում: Անգիտակից վիճակում զինվորական հոսպիտալ տեղափոխվելուց մեկ ժամ անց 18-ամյա զինվորը մահացել էր:
Ութ ամիս առաջ բանակ զորակոչված Աղասիի մայրը` Գայանե Աբրահամյանն ասում է, որ որդու մարմնի վրա բազմաթիվ վնասվածքներ կան, ինչը վկայում է նրան դաժանաբար ծեծելու մասին: «Իմ երեխային դաժանաբար ծեծելով սպանել են: Ես առողջ երեխա եմ տվել, առողջ էլ ուզում էի ստանալ, ոչ թե մահացած բերեին-դնեին իմ տանը և ինձ մղկտացնեին», - ասում է մայրը: «Lragir.am»-ի հետ զրույցում նա նշել է, որ իր տղայի մարմինը տուն են բերել քաղաքացիական համազգեստով զինվորականներ, որ հեռացել են անմիջապես՝ առանց նույնիսկ ներողություն խնդրելու։
Ըստ ծնողների՝ քրեական գործ պետք է հարուցվեր սպանության հատկանիշներով, մինչդեռ նախաքննական մարմինը քրեական գործ է հարուցել Քրեական օրենսգրքի 112 հոդվածի երկրորդ մասի 14 կետի հատկանիշներով` դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը:
Զինվորի հարազատներից Գևորգ Սահակյանը մասնակցել է դիահերձմանը:
«Ականջի հետևն էր վնասված, ձախ աչքը լրիվ վնասված էր` կապտուկներ և վերք կար, աջ կողմից` կողքը ծակած, դանակի հարված է եղել երևի», - ասել է Սահակյանը:
Զինվորի ընտանիքն արդեն ստացել է մահվան վերաբերյալ նախնական տեղեկանքը, որում եզրակացություն տված բժիշկը մահվան պատճառների մեջ նշում է մի քանիսը` գլխուղեղի կենսական կարևորագույն ֆունկցիաների սուր խանգարում, փակ, բութ գանգուղեղային վնասվածք, արյունազեղումներ, քերծվածքներ, սալջարդ վերքեր` գլխի, իրանի, վերջույթների շրջանում:
Մայրն ասում է, թե զորամասից իրենց սկզբում այլ լուր էին հաղորդել, ասելով, թե իբր որդին թունավորվել է: Հետո էլ հարցրել էին, թե հնարավո՞ր է տղան էպիլեպսիայով է տառապել: Զինվորի հորեղբոր պնդմամբ էլ, սկզբում հրամանատարական կազմից հայտնել են, թե էպիլեպսիա հիվանդության պատճառով զինվորը ուշագնաց է եղել, ինչի հետևանքով վայր է ընկել անկողնուց ու ստացել վնասվածքներ:
Զինվորի մայրը պատմում է, թե որդու հետ դեպքից երեք օր առաջ էր խոսել: Մայրը զգացել է, որ որդին տրամադրություն չունի: «Իրա տրամադրությունը ինձ դուր չեկավ, բայց ոչինչ չասեց, հարցրեցի` ասաց` լավ եմ», - ասել էր Գայանե Աբրահամյանը:
Ըստ «Lragir.am»-ի՝ Վարդանի մայրը` Սուսաննա Սևյանը ողբում էր իր անդրանիկ զավակի մահն ու հիշում, թե ինչ դժվարություններով է մեծացրել որդուն.
«Շան օրի մեծացրել եմ էրեխուս, ես հնար չեմ ունեցել, էս էրեխեքին ես չեմ պահել, էս ժողովուրդն ա պահել, որ գաք իմ տուն կտեսնեք ինչ վիճակում եմ ապրում, բա դուք չտեսա՞ք էն մրոտ պատերը, էն սոված, պակաս պռատ էրեխեքիս։ Լավ, պատերը չտեսաք, բա դուք չտեսա՞ք էն էրեխու կյանքը…»:
Նրանց տան մրոտ պատերից կախված ճերմակ կտորի վրա պատկերած բանակի խորհրդանիշն ու Վարդանի գրած տողերն են զորակոչվելուց առաջ.
«Մեղքերիս համար աշխարհիս վրա
Նորից զգացի աղոթող չկա
Աղաչում եմ Աստված
Ընտանիքիս համբերություն
Ինձ էլ բարի ծառայություն»։
18-ամյա Աղասի Աբրահամյանը Երևանից էր, նա Ռուսաստանից Հայաստան էր եկել, որպեսզի բանակ զորակոչվեր: Նրա հուղարկավորությունը տեղի կունենա այսօր: Զինվորի մահվան դեպքի առնչությամբ դեռևս ձերբակալվածներ չկան:
Պաշտպանության նախարարությունը, ելնելով նախաքննության շահերից, տեղեկատվություն չի տրամադրում այն մասին, թե ո՞վ կամ ովքե՞ր են զինվորին դիտավորությամբ պատճառել ծանր վնասվածքներ, ինչո՞ւ հրամանատարական կազմը չի կարողացել միջամտել կատարվածին, և կամ ի՞նչ կարգի վնասվածքներ է ստացել զինվորը, որ հոսպիտալում անզոր են եղել փրկել նրա կյանքը:
Սա, ըստ իրավապաշտպանների, բանակում այս տարվա արդեն 20-րդ դեպքն է, երբ զինվորը, ըստ նախաքննության, կա'մ ինքնասպանություն է գործում, կա'մ մահանում մեկ ուրիշի ձեռքերով:
Պաշտոնական տվյալներով` 2010 թվականին հայկական զինված ուժերում խաղաղ պայմաններում գրանցվել է մահվան 43 դեպք:
Tert.am
Մեջբերել
Դեկադա-ի խոսքերից
Էջանիշներ