ԱՅՍ ԱՆԳԱՄ ՀՐԵԱՆԵՐՆ ՈՒ ՄԱՍՈՆՆԵՐԸ ՉԵՆ
Հայաստանում քաղաքական իրարամերժ զարգացումներ են եղել, բայց դա հասկանալու հնարավորություն զեկույցը չի տալիս ամերիկյան ընթերցողին, որովհետեւ միակողմանի է, հնչում են տեսակետներ, որոնք հնչեցվում են իշխանության քաղաքական ընդդիմախոսների կողմից, ինչը զեկույցին չի տալիս այդքան անհրաժեշտ օբյեկտիվություն: Այդ կարծիքի հեղինակը Ազգային Ժողովի Հանրապետական խմբակցության անդամ Արմեն Աշոտյանն է, ով հունիսի 6-ին, Նովոստի միջազգային լրատվական կենտրոնում հանդիպելով լրագրողների հետ, իր տեսակետն է ներկայացրել Հայաստանի իրավիճակի վերաբերյալ օրերս հրապարակված ԱՄՆ Պետդեպարտամենտի զեկույցի կապակցությամբ:
“Հաջորդը, այդ զեկույցում ներգրավված է պնդում, եւ այդպիսի նախադասություն կա անգլերեն տեքստում, որ Ամերիկայի Միացյալ Նահանգների ներկայացուցիչները իրականացնում են դիպլոմատիկ ճնշում ժողովրդավարական ինստիտուտների զարգացման եւ այլ գործընթացների դեպքում: Այսինքն Ամերիկայի Միացյալ Նահանգները խոստովանում են, որ իրականացնում են դիպլոմատիկ ճնշում, եւ դա նույնպես մտածելու տեղիք է տալիս”, ասում է Արմեն Աշոտյանը:
Բացի այդ, նա նկատում է նաեւ, որ զեկույցի շատ քիչ մասն է Հայաստանին վերաբերում, մեծ մասը թողնելով ԱՄՆ կատարած աշխատանքի նկարագրությանը:
“Եթե նայում ենք զեկույցի տեքստը, ապա բացի քննադատությունից, միաժամանակ ընդգծվում է, որ Հայաստանում ժողովրդավարական գործընթացները խթանելու նպատակով ԱՄՆ ղեկավարությունը ներդնում է ջանքեր եւ հսկայածավալ աշխատանք է կատարում: Այստեղ ի հայտ է գալիս հերթական հակասությունը զեկույցում: Եթե այդքան վատ է ժողովրդավարական իրավիճակը Հայաստանում, ապա ինչ հսկայածավալ աշխատանքների մասին է խոսքը: Եթե այդքան մանրամասն, մանրակրկիտ եւ դրական գնահատականներ են տրվում ԱՄՆ կողմից կատարված աջակցությանը, ապա ինչու է իրավիճակն այդքան վատ”, ասում է Արմեն Աշոտյանը, եզրակացնելով, որ ԱՄՆ Պետդեպը այդպիսով փաստացի ուղղակի հաշվետվություն է ներկայացնում իր հարկատուներին, նրանց փողերի արդյունավետ ծախսման վկայության համար:
Այդ ամենից զատ, Արմեն Աշոտյանը անդրադարձել է ԱՄՆ ժողովրդավարության վիճակին, թվարկելով այդ երկրի մասին Ֆրիդոմ Հաուզ կազմակերպության զեկույցի մեջ ամրագրված մտահոգությունները: Մեջբերելով Ֆրիդոմ Հաուզի զեկույցը, Արմեն Աշոտյանը կարդացել է ԱՄՆ իրավապահ, ընտրական համակարգերի, մարդու իրավունքի պաշտպանության, կալանավորվածների իրավունքի, հասարակության մեջ առկա վտանգավոր երեւույթների, հանցավորության աստիճանի, մամուլի ազատության սահմանափակման հետ կապված խնդիրները, որոնք նշել են Հաուզի փորձագետները: Արմեն Աշոտյանն այդպիսով ցույց է տվել, թե ժողովրդավարության օրրանի ընկալում ունեցող, այլ երկրների, այդ թվում եւ Հայաստանին ժողովրդավարություն ուսուցանող երկիրն իրականում ինքն ունի ժողովրդավարության եւ մարդու իրավունքի հետ կապված լուրջ խնդիրներ: Իհարկե, հանուն արդարության պետք է նկատել, որ Արմեն Աշոտյանն ԱՄՆ այդուամենայնիվ համարում է ավելի ժողովրդավարական երկիր, քան Հայաստանը:
Լրագրողները ՀՀԿ խմբակցության անդամի գնահատականներից եւ եզրահանգումներից հետո նրան հարց են ուղղել, հիշեցնելով, որ երբ Ֆրիդոմ Հաուզը, կամ որեւէ այլ միջազգային համանման կազմակերպություն այդօրինակ քննադատական զեկույց է հրապարակում Հայաստանի մասին, ապա իշխանությունն իր քարոզչամեքենայով, հատկապես վերջին շրջանում, դա ներկայացնում է որպես հրեաների եւ մասոնների արշավանք Հայաստանի դեմ: Լրագրողները փորձել են իմանալ, թե արդյոք ստացվում է, որ հրեաները եւ մասոնները նաեւ ԱՄՆ դեմ են արշավ կազմակերպել, եթե ներկայացվել է այդ երկրի ժողովրդավարության վիճակը քնադատող զեկույց:
“Ես ինքս չեմ կիսում այն տեսակետը, որ Հայաստանի դեմ իրականացվող քայլերը, իսկ այդպիսիք կան, այդպիսի քայլեր իրականում կան, մեղք ունեն հրեաները, մասոնները, կամ որեւէ այլ թաքուն գործող կազմակերպություններ: Ամեն ինչ շատ ավելի պարզ է: Ինչ վերաբերում է Ֆրիդոմ Հաուզի զեկույցին, ապա իրականում ինչու է Ֆրիդոմ Հաուզը ձեռնամուխ եղել ԱՄՆ-ում առկա խնդիրների ուսումնասիրությանը, որովհետեւ 60 տարուց ի վեր ուսումնասիրել է միայն այլ երկրներ, եւ դրանով նվազել է վստահելիության մակարդակն իր զեկույցների: Որպեսզի փորձեն վերականգնել միջազգային վարկը այդ կազմակերպության եւ իր ներկայացված զեկույցներում օբյեկտիվության նկատմամբ հասարակական վստահությունն այլ երկրներում, առաջին անգամ ուսումնասիրվել է մի երկիր, որը երկար ժամանակ համարվել է ժամանակակից ժողովրդավարության բնօրանն եւ կարծես թե ունեցել է պատենտ` արեւմտյան ժողովրդավարության տարածման գործում: Ինչպես տեսնում եք, մեր ամերիկացի գործընկերները անաչառ հայացք են փորձել նետել նաեւ սեփական երկրում գոյություն ունեցող խնդիրների նկատմամբ”, ասում է Արմեն Աշոտյանը:
Ի դեպ, Արմեն Աշոտյանն ընգծել է, որ ինքը խոսելով ԱՄՆ Պետդեպի զեկույցի մասին, ներկայացնում է իր անձնական կարծիքը:
Մեջբերել
A.N.D.O.-ի խոսքերից
Էջանիշներ