Շարունակեմ անձնվեր գիտնականների հիմնադրած «Քյառթագիտարանը» լրացնելու ազգանպաստ գործը.
Քյոմուր - Սև: Գլխավորապես գործածվում է որպես մեքենայի կամ մեքենայի որևէ բաղադրիչ տարրի որոշիչ: Քյոմուր կոչմանն արժանանալու համար մեքենան, բացի սև լինելուց, պիտի նաև լինի թույն բանդաժներով ու իրեքհազարնոց ուստանովկով, բաքում չպիտի լինի երկու լիտրից ավել վառելիք: Ապակիները պիտի լինեն «շուշեք» մակնիշի: Խրախուսելի է, որ մեքենայում առկա լինի Թաթուլի «էն դիսկը որ մենակ ես ունեմ աբե որտև հարևանս իրա [բարեկամական կապեր նշող բառակույտ]-ի հմար [զանազան ծառայություններ նշող բառակույտ] ա արել»: Բացառություն են կազմում նիվաները:
Վայիս ըլնել - Նենգաբար, կանխամտածված կերպով և առանձնակի դաժանությամբ օգտվել ինչ-որ մեկի եկամտի կամ հաճույքի աղբյուրից (օր.՝ հացին վայիս ըլնել): Վայիս ըլնում են առանց հրավերի և ընդդեմ վայիս ըլնելու օբյեկտի ցանկության: Այս արտահայտությունը բանավոր խոսքում կիարռվում է մուննաթի և կուռաժիտի տարրեր պարունակող հնչերանգով: Տե՛ս նաև՝ նիրյադ ըլնել, վեննա մտնել, յազվել:
Զապադլո - Արգելված, անընդունելի երևույթ կամ արարք: Պատմաբանները պնդում են, որ այս հասկացությունը ժամանկին ծնունդ է տվել շարիաթի «հարամ» գաղափարին: Նշենք, որ մինչ այսօր քայռթու և ավանդապաշտ մուսուլմանների համար խոզի միս ուտելն ու ալկոհոլ գործածելը ոչ թե հարամ են, այլ զապադլո: Առօրյա կյանքում այս բառը հաճախ օգտագործվում է զրուցակցին տուպիկ անելու նպատակով (օր.՝ խի՞ աբե, զապադլոյա՞):
Ֆռռալ - Հոգեմետ բույսի (հիմնականում՝ կանեփի) չորացած և կտրատած տերևներ պարունակող գլանակը (մասնավոր դեպքերում՝ պլաստմասսայե շիշը) փոխանցել կողքի մարդուն: Ֆռռալու գործընթացը, որպես կանոն, ուղեկցվում է անհոդաբաշխ ձայներով, ֆսսոցով և բարձրաձայն քրքիջով: Գիտնականները դեռ վիճում են՝ արդյո՞ք հարկավոր է ֆռռալ ժամ. սլաքի ուղղությամբ, թե՞ ժամ. սլաքին հակառակ:
Քոլել - Խաբել, միամտացնել, գլուխը յուղել, հարիֆցնել (հնացած): Հոմ.՝ կտել, կտավատ անել:
Դայաղ ըլնել - 1. Դեմ առնել, 2. Կպնել-պոկ չգալ ինչ-որ մեկին կամ ինչ-որ բանի: Դայաղ անել՝ ինչ-որ մեկի համար լուրջ խնդիրներ ստեղծել (որոնք սովորաբար առնչվում են իրավապահ մարմինների հետ):
Ճշտի մեջ - Գործածվում է որպես գերագույն հավանության նշան: Ճշտի մեջ կարող են լինել, օրինակ, նոր կոշիկները, ընկերուհու նկատմամբ վերաբերմունքը կամ մեքենայում հնչող երաժշտությունը: Տե՛ս նաև՝ ցիվիլի մեջ:
Խուրդել - Վաճառել: Գերադասելի է, որ վաճառվող ապրանքը ձեռքբերված լինի ապօրինի ճանապարհով:
Խուրդվել - Մանրամասն քննարկել որևէ հարց, հետևողականորեն անդրադառնալ խնդրի բոլոր կողմերին:
Ինշքամ - Ինչքան:
Մեջբերել
Էջանիշներ