Սերժ Սարգսյանը փրկեց և՛ Արձանագրությունները, և՛ Թայիփ Էրդողանին. Մեհմեդ Ալի Բիրանդ
14:31 • 24.04.10
Թուրք հայտնի լրագրող և վերլուծաբան, CNNTurk-ի գլխավոր խմբագիր Մեհմեդ Ալի Բիրանդը, անդրադառնալով ՀՀ իշխող կոալիցիայի և ՀՀ նախագահ Սերժ Սարգսյանի` Հայաստանի և Թուրքիայի միջև ստորագրված Արձանագրությունների վավերացման գործընթացն առկախելու որոշմանը, գրում է, որ Սերժ Սարգսյանը նման կերպ փրկեց և՛ Արձանագրությունները, և՛ Թուրքիայի վարչապետ Ռեջեփ Թայիփ Էրդողանին:
«Հայաստանը սառեցրեց Թուրքիայի հետ ստորագրված Արձանագրությունները: Եթե մենք խնդրին մոտենում ենք հենց այդ տեսանկյունից, առաջին հայացքից կարող է թվալ, թե դա բացասական զարգացում է: Սակայն դա այդպես չէ, այլ` բոլորովին հակառակը: Այդ կարևոր որոշմամբ կանխվեց Արձանագրությունների մոտալուտ վախճանը: Ես հակված եմ պաշտպանելու այդ երկրորդ տեսակետը, քանի որ Հայաստանը, Միացյալ Նահանգներն ու Եվրոպան այն համոզմունքին են, որ Արձանագրությունների ստորագրումից ի վեր Թուրքիան սահմանների բացման հարցը շաղկապեց ղարաբաղյան հիմնախնդրի հետ»,- գրում է թուրք հայտնի վերլուծաբանը` ընդգծելով, որ Անկարայի այդ կեցվածքը մեծապես վնասում էր Սերժ Սարգսյանի քաղաքականությանը:
«Թուրքիայի այդ գործելաոճի հետևանքով Սարգսյանի քաղաքականությունն սկսեց շատ վերքեր ստանալ: Անցած ամիս տիրող իրավիճակի ընդհանուր պատկերը հետևյալն էր. Արձանագրություններն ուղարկվել էին Հայաստանի խորհրդարան, սակայն այդ նախապայմանի պատճառով գտնվում էին սպասողական վիճակում: Եթե Անկարան տեղից չշարժվեր, Հայաստանի խորհրդարանը Արձանագրությունները «չեղյալ հայտարարելու և ստորագրությունը հետ կանչելու» պահանջով ուղարկելու էր արտգործնախարարություն: Այսինքն` Արձանագրությունները պաշտոնապես թաղվելու էին: Եվ հնարավոր չէր լինելու ամեն ինչ հեշտությամբ սկսել նորից»,- գրում Մեհմեդ Ալի Բիրանդը:
Թուրք վերլուծաբանը նշում է, որ Արձանագրությունների առնչությամբ հնարավոր վթարը կանխվեց Վաշինգտոնում` Սարգսյան-Էրդողան, ինչպես նաև Միացյալ Նահանգների նախագահ Բարաք Օբամայի և Հիլարի Քլինթոնի` ՀՀ նախագահ Սերժ Սարգսյանի և Թուրքիայի վարչապետ Ռեջեփ Թայիփ Էրդողանի հետ հանդիպումներով:
«Հայաստանն Արձանագրություններից իր ստորագրությունը չի վերցնում, այլ առկախում է այդ գործընթացը մինչև համապատասխան պայմանների ձևավորումը: Եվ եթե ղարաբաղյան հիմնախնդրի հարցում գրանցվի առաջընթաց, հնարավոր է` գործընթացը շարունակվի այն կետից, որտեղ կանգ է առել: Այժմ գնդակը Մինսկի եռանախագահության կիսադաշտում է: Եվ եթե այն համոզի Հայաստանին և Ադրբեջանին, և հնարավոր լինի առաջընթաց ապահովել ղարաբաղյան հիմնախնդրում, հարցը կլուծվի և սահմաններն էլ կբացվեն»,- գրում է Ալի Բիրանդը` եզրափակելով. «Սերժ Սարգսյանն իր այդ որոշմամբ պաշտպանեց նաև իր երկրի շահերը: Ամենավատ հետևանքը կլիներ Արձանագրությունների չեղյալ հայտարարումը: Քանի որ պետք չէ մոռանալ, որ Ցեղասպանության փակուղուց դուրս գալու միակ ուղին այդ Արձանագրություններն են»:
Մեջբերել
Էջանիշներ