Այսուհետ «Եվրատեսիլի» մրցույթ չի հայտարարվելու
Հանրային հեռուստաընկերությունն այսուհետ կհրաժարվի «Եվրատեսիլի» մասնակիցների մրցույթ անցկացնելուց: Այս մասին հունիսի 19-ին լրագրողների հետ հանդիպման ժամանակ հայտարարեց Հայաստանի հանրային հեռուստառադիոընկերության նախագահ Ալեքսան Հարությունյանը։
«Ինչպես նախորդ տարիներին, մենք ինքներս կորոշենք երգչին, կամ երգչուհուն, որից հետո կհայտարարենք երգի մրցույթ: Այսպես ավելի ճիշտ է` նա, ով հետո պատասխանատվություն է կրում արդյունքների համար, ինքը որոշի, թե ում է ուղարկում ներկայանալու այդ հեղինակավոր մրցույթին»,-ասաց Հարությունյանը։
Ինչ վերաբերում է այս տարի տեղի ունեցած մրցույցի մասնակից Եվա Ռիվասին, ապա Հարությունյանի խոսքով. «Այն տեղը, որ մեր ներկայացուցիչը գրավեց «Եվրատեսիլ» երգի մրցույթում, իհարկե, մեզ համար գոհացուցիչ չէր, բայց այն ելույթը, որ նա ունեցավ, կարծում եմ` դուր եկավ շատերին՝ թե՛ Հայաստանում, թե՛ արտասահմանում: Որոշ գնահատականներով, տեղյակ եք, որ եթե ժյուրիի քվեարկություն չլիներ, միայն ժողովրդի քվեարկությունը լիներ, ապա մեր տեղը կլիներ շատ ավելի բարձր, քան մենք գրավեցինք»։
Հանրային հեռուստառադիոընկերության նախագահն ասաց նաեւ, որ ներկայումս պատրաստվում են «Եվրատեսիլի» մանկական մրցույթին, որին ավելի քան 30 երգ է ներկայացվել: Մրցույցը տեղի կունենա օգոստոսին՝ Մինսկում։
Մեջբերել
Էջանիշներ