Երջանկության 7 կանոններ

**Apsara** · 17.08.2007, 12:35

Երջանկություն փնտրում է մեզնից յուրաքանչյուրը, սակայն ո՞վ է իրեն իսկապես երջանիկ զգում: Երբեմն իրեն ավելի երջանիկ է զգում այն մարդը, ով կյանքում գրեթե ոչինչ չունի ուրախանալու: Սակայն նա կարողանում է գնահատել թեկուզ քիչ, բայց իր ունեցածը: Հիմնականում իրենց երջանիկ չեն զգում այն մարդիկ, ովքեր չեն կարողանում գնահատել իրենց ունեցածը: Այդ մարդիկ պարզապես կորցնելուց հետո են զգում դրանց արժեքը:
Դեյլ Քարնեգին 7 կանոն է առաջարկում, որոնք կիրառելու դեպքում մարդն իրեն հոգեպես հանգիստ ու երջանիկ կզգա:

1. Մտածեք և ձեզ պահեք կենսուրախ և ձեզ թեթև կզգաք: Մարդկանց մեծամասնությունը երջանիկ է մոտավորապես այնքանով, որքանով լի է երջանիկ լինելու վճռականությամբ:

2. Երբեք մի փորձեք հաշիվ մաքրել ձեր թշնամիների հետ, որովհետև դրանով շատ ավելի մեծ վնաս կբերեք ձեզ, քան նրանց: Երբեք, ոչ մի րոպե մի մտածեք այն մարդկանց մասին, ովքեր տհաճ են ձեզ համար:

3. Երախտամոռության պատճառով ապրումներ ունենալու փոխարեն երախտագիտություն մի ակնկալեք: Հիշեք, որ երջանկություն ձեռք բերելու միակ եղանակը ոչ թե երախտագիտություն ակնկալելն է, այլ բարին արարելը հանուն սեփական ուրախության: Երախտագիտությունը բնավորության այնպիսի գիճ է, որը պետք է դաստիարակել:

4. Հաշվեք ձեր հաջողությունները և ոչ թե անախորժությունները: Կյանքում մարդ իր առջև երկու նպատակ պիտի դնի: Առաջին նպատակը այն բանի իրականացումը, որին նա ձգտում է: Երկրորդ նպատակը՝ ձեռքբերումով ուրախանալու կարողությունը:

5. Մի ընդօրինակիր ուրիշներին: Գտեք ձեզ և հարազատ մնացեք ինքներդ ձեզ, իսկ ընդօրինակումը ինքնասպանություն է:

6. Երբ ճակատագիրը շնորհում է ձեզ լիմոն, աշխատեք դրանից լիմոնադ պատրաստել: Կյանքում ամենագլխավորը սեփական հաջողությունները առավելագույնս օգտագործելը չէ: Յուրաքանչյուր հիմար ընդունակ է դրան: Կարևորը կորուստներից օգուտ քաղելու կարողությունն է: Դա խելք է պահանջում, դրանում էլ թաքնված է խելացի և հիմար մարդկանց տարբերությունը:

7. Մոռացեք ձեր անախորժությունները, փորձեք մի քիչ երջանկություն տալ ուրիշներին: Բարիք գործելով ուրիշներին՝ դուք առաջին հերթին օգնում եք ձեզ:

Հոդվածը վերցրել եմ Տուրիզմ ամսագրից:

**Selene** · 18.08.2007, 14:08

Ես նախկինում կարդացել եմ այս կանոնները: Բավականին հետաքրքիր են, հեղինակն էլ՝ Դեյլ Քարնեգի

Ավելացվել է 2 րոպե անց
Իդեպ, նույն հեղինակի կողմից կան գրված նաև յոթ կանոններ, որոնք նպաստում են ընտանիքի երջանիկ լինելուն

Ավելի ուշ անպայման այստեղ կգրեմ այդ կանոնները:

**Selene** · 18.08.2007, 20:57

Յոթ կանոն, որոնց կիրառումը թույլ կտա ձեր ընտանիքն առավել երջանիկ դարձնել

1. Պետք չէ՛, պետք չէ՛ մանրախնդիր դիտողություններ անել: Շատ կանայք են փորել սեփական ամուսնական երջանկության գերեզմանը՝ կամաց-կամաց խորացնելով այն:

2. Մի՛ փորձեք Ձեր ամուսնուն վերափոխել: Հաջող ամուսնությունը շատ ավելի մեծ բան է, քան հարմար մարդ գտնելու կարողությունը, դա նաև ինքն էլ այդպիսի մարդ լինելու կարողություն է:

3. Մի՛ քննադատեք: Այդքան շատ ռոմանտիկ անուրջների՝ ամուսնալուծությամբ ավարտվելու գլխավոր պատճառներից մեկը քննադատությունն է՝ անօգուտ, տաղտկալի քննադատությունը:

4. Հայտնեք մեկդ մյուսիդ ձեր անկեղծ երախտագիտությունը: Եթե կնոջն առհասարակ վիճակված է իր երջանկությունը գտնել ամուսնու մեջ, ապա նա այդ երջանկությունը պետք է գտնի նրա երախտագիտության և կապվածության մեջ: Երբ ամուսնու երախտագիտությունն ու կապվածությունն իսկական են, ապա դրանք նրա երջանկության գրավականն էլ են դառնում:

5. Մեկդ մյուսին ուշադրության մեծ նշաններ ցույց տվեք: Ամուսնական անհամաձայնության հիմքում մեծամասամբ ընկած են մանրուքներ: Այնպիսի մի հասարակ բան, որպիսին ամուսնու՝ առավոտյան աշխատանքի գնալիս ջերմությամբ համբուրելն ու ձեռքը թափահարելով հրաժեշտ տալն է, կկանխեր ոչ քիչ թվով ամուսնալուծություններ:

6. Եղեք պատրաստակամ և սիրալիր: Հարգալից հարաբերությունը նույնքան անհրաժեշտ է ամուսնությանը, որքան քսուկը՝ շարժիչին: Կոպտությունն այն քաղցկեղային ուռուցքն է, որը կրծում, մաշում է սերը: Յուրաքանչյուրս գիտե այդ բանը, բայց ոչ պակաս է հայտնի, որ մենք օտար մարդկանց հետ շատ ավելի հարգալից ենք, քան մերձավորների:

7. Անհրաժեշտ է նաև ամուսնական կյանքի սեռական կողմի վերաբերյալ լավ իմացությունը: Սեքսը պակաս կարևոր չէ մարդու կյանքում: Հենց դա էլ հաճախ տղամարդանց և կանանց ընտանեկան երջանկության խորտակման պատճառ է դառնում:

Դեյլ Քարնեգի

Ես, ինչպես երևի թե շատերդ, որոշ կետերի հետ մասամբ կամ ամբողջովին համաձայն չեմ: Շատ ճիշտ է 6-րդ կանոնը, քանի որ հարգանքը ցանկացած մարդկային հարաբերության ամուր հիմքը կարող է լինել, այսինքն այն բազիսը, որի վրա միայն կարող են կառուցվել ամուսնական, ընկերական, բարեկամական հարաբերությունները: Մյուս կանոնների մասին էլ՝ հետո