PDA

Դիտել ողջ տարբերակը : Այլերեն



ivy
10.02.2019, 11:42
Երեկ պատահաբար հայտնաբերեցի այլերեն (www.ayleren.com) կայքը․ ուզում էի հասկանալ՝ իմ արածը ղզիկություն է, թե չէ, գրեցի «ղզիկ», ու գուգլն ինձ բերեց այլերենի տարածք :)

Ահագին զվարճացել եմ նորաբանությունների բացատրություններից։
Մի քանիսը դնում եմ էստեղ։
Ու առաջարկում եմ թեմայում գրել մեր իմացած նորաբանությունները՝ մեր իսկ բացատրություններով։

աննասուն (https://ayleren.com/annasun/)
[անասուն + անասուն] անասնության գերադրական աստիճանը: Օգտագործվում է անասնական վարք դրսևորած մարդկային առանձնյակների հանդեպ՝ նրանց հավանական ծագումնաբանությունը և տեսակային պատկանելությունը մատնանշելու համար:
Տես նաև՝ եզզ

բաստուրմատոր (https://ayleren.com/basturmator/)
[բաստուրմա + ator] բաստուրմատորը հայրենասիրական կարոտախտի ինքնաբավարարման համար ստեղծված հայկական արտադրության հիպոթետիկ պորտատիվ մաստուրբատոր է:
Շահառու նպատակային խումբը հետսովետական հայկական սփյուռքի այն ներկայացուցիչներն են, ովքեր հայկական ինքնությունը և դրա պահպանումը խիստ ասոցացնում են բաստուրմայի և հարակից այլ հայեցի ապրանքների (օրինակ՝ խաչաձև շշի մեջ լցված կոնյակի, արարատ սարով նկարի) կանոնավոր ձեռք բերման և սպառման գործընթացի հետ:
Տես՝ պաթոսահայ

դզել (https://ayleren.com/dzel/)
Օգտագործվում է՝ «դզեց» տարբերակով: Հաճույքի ինքնաբուխ և հոգեպարար արտահայտություն, արվում է իրավիճակում, երբ տառապանքներով և հոգսերով լի կյանքը պահի տակ թվում է հիասքանչ և հաճելի:

զմայլիկ (https://ayleren.com/zmailik/)
[զմայլել + սմայլիկ] համացանցում և թվային գրավոր հաղորդակցության այլ համակարգերում օգտագործվող գրաֆիկական պատկեր, նշան, որը հստակ զգացմունքներ է արտահայտում: Օրինակ՝ երջանկություն, սիրահարվածություն, տարակուսանք, հավանություն, մանյակալ-դեպրեսիվ պսիխոզ, սեռահասունացման տարիքի ճգնաժամ, գառան խաշլամա ուտելու ախորժակ, Լև Տոլստոյի Աննա Կարենինա վեպը կարդալու ցանկություն, Հասարակածային Գվինեա ճամփորդելու ընթացքում նավաբեկության ենթարկվելուց և մարդակերների մոտ գերի ընկնելուց վախ և այլն: Զմայլիկների օգտագործումը նվազագույնի է հասցնում մտածելու, զգալու, երևակայելու և ապրելու բոլոր նախնադարյան և հետամնաց վերապրուկները:

թրաշամանուկ (https://ayleren.com/trashamanuk/)
[թրաշա/հրաշամանուկ] մորուքի միջոցով սեփական նրբազգա և փխրուն էությունը թաքցնել ուզեցող արական առանձնյակ:
Առնականության և վայրի-բնականության արտահայտման ժամանակակից թրենդների՝ միթոմների հովերն ընկած տղամարդկանց շրջանում զանգվածային թրաշապահություն է նկատվում: Սրա արդյունքում ավելի ու ավելի է դժվարանում տարբերել թրաշամանուկներին թրաշաբիձուկներից, քյառթոսահայությանը՝ բոհեմահայությունից, հիպստերահայությանը՝ ծուլամորթ փնթիներից:
Տես նաև՝ անտիդոդիկ

լայքմեջ (https://ayleren.com/laykmej/)
[like + քաքմեջ] Լայքմեջն այն անհարմար իրավիճակն է, երբ սոցիալական ցանցում քո հրապարակումը բոլորն անխտիր սրտում են, կամ հռհռուկ են դնում, իսկ մեկը մտնում ու չորով լայքամատի կամ լացուկացի զմայլիկի է այն արժանացնում՝ խախտելով մանրախնդիր, բայց հաճելի վիճակագրությունը։
Տես նաև՝ հաքմեջ

հայուգեն (https://ayleren.com/hayugen/)
[հայի + գեն] պսևդոգիտական, ռազմահայրենասիրական եզր, որով ինքնամոռաց հայրենասերները հիմնավորում են հայ ազգի որևէ ներկայացուցչի ձեռքբերումներն ու բարոյական նկարագիրը՝ ուղղակիորեն այն վերացարկելով տվյալ մարդու անձնական որակներից և կապելով հայկական ծագման հետ՝ այսպիսով «հայկական գեներին» վերագրելով մոգական ելային տվյալներ կրելու հատկություն։
Վերջին շրջանում հայուգենն օգտագործվում է ավելի շատ հեգնական իմաստով՝ հայկական ծագումնաբանությունը և թերուս նորազգայնականությունը ծաղրելու համար։
Տես նաև՝ հայի տեսակ, դանդուռգեն

ծտեսություն (https://ayleren.com/tstesutyun/)
[ծիտ + տեսություն] Իգական առանձնյակների զանգվածային խմբման վայրերում (լեզվաբանական համալսարաններ, բուժքույրական քոլեջներ, գեղեցկության մրցույթներ) արուների պայթյունավտանգ կուտակումները:
Տես նաև՝ թռչնադիտարկում

Սրանք «այլերեն» կայքի բառացանկից (https://ayleren.com/cank/) էին։
Գրենք նաև մեր իմացած (ստեղծած) այլերենը :)

Adam
10.02.2019, 14:28
Այվ, լավն էին, բայց դու աչքիս Զվարճալի Ստուգաբանություն թեմայի մասին մոռացել ես: :))

ivy
10.02.2019, 15:09
Այվ, լավն էին, բայց դու աչքիս Զվարճալի Ստուգաբանություն թեմայի մասին մոռացել ես: :))

Թեման բացել եմ՝ «այլերեն» կայքի ոգեշնչմամբ, թող էն հինն էլ իր համար լինի. էլ մի պեդանտություն արա :P

Ի դեպ իրենց բառացանկում «քլնգել» բառը չկար. մտածում եմ՝ էդ բառը մենակ ակումբայի՞ն է, թե ավելի լայն մասսաների մոտ էլ է կիրառվում: Մի ժամանակ էլ ֆբ-ում «քլունգ» խումբ կար, բայց էլի ակումբցիներն էին հեղինակները:

StrangeLittleGirl
10.02.2019, 15:19
Բա բիթիպեդիան (https://www.facebook.com/pages/category/Just-For-Fun/%D4%B2%D5%AB%D5%A9%D5%AB%D5%BA%D5%A5%D5%A4%D5%AB%D5%A1-%D5%A1%D5%A6%D5%A1%D5%8A-%D5%B0%D5%A1%D5%B6%D6%80%D5%A1%D5%A3%D5%AB%D5%BF%D5%A1%D6%80%D5%A1%D5%B6-157222804886654/) տեսե՞լ եք։

Adam
10.02.2019, 15:20
քլնգել - ք-լընգել - սեքսով զբաղվել՝ լեզվի օգնությամբ: Կունիլինգուս:

ivy
10.02.2019, 15:49
քլնգել - ք-լընգել - սեքսով զբաղվել՝ լեզվի օգնությամբ: Կունիլինգուս:

Դու էլի գնացիր քո «զվարճալի ստուգաբանությանը», բա մենք քլնգել բառը է՞դ իմաստով ենք օգտագործում, ու նաև հետաքրքիր էր՝ էդ մեր հորինած բա՞ռն է, ու մենակ մե՞նք ենք գործածում:

Adam
10.02.2019, 16:09
բա մենք քլնգել բառը է՞դ իմաստով ենք օգտագործում: նայած ով :p

Ծլնգ
10.02.2019, 17:01
հայուգենին ի հակադրություն, ու Լիոնի «գերտոլերանտություն»-ի ականջը կանչելով

հանդուրժախտ
[հանդուրժել + ախտ] խորը վարակիչ սինդրոմ, որով տառապող մարդիկ նույն արժեհարթակի վրա են դնում դյուցազուն Հայկին ու բարբարոս Բելին, քյառթուահային ու ջագիջուգիին, քյաբաբնոցն ու մակդոնալդսը, բաստուրման ու պռոշյուտոն․․․ և ընդհանուր տենչում են դեպի գեյրոպական արժեքահամակարգը՝ մոռանալով մեր տարածաշրջանի պայթյունավտանգությունը։ Ըստ անամնեզի, սինդրոմի տարածման հետ մեկտեղ կանայք կսկսեն դառնալ մեքենա-քշող վարչապետ՝ ամուսիններին տանը կրծքով երեխա կերակրելու թողնելով, ԼԳԲՏն էլ հանգիստ կքայլի փողոցով՝ պղտորելով սուրբ հայուգենը։

Տես նաև՝ գյուռտոլերանտ

ivy
11.02.2019, 11:44
Ձեռի հետ ղզիկ-ի ստուգաբանությունն էլ չէր խանգարի․․․ :)

Բարեկամ

ղզիկ (https://ayleren.com/ghzik/)

[kız թրք. + իկ] ‪թուրքերեն kiz – աղջիկ բառի հայկական տեղայնացումն է: Օգտագործվում է կանացի բայց ոչ տրանսգենդեր, կամ հոմոսեքսուալ սոցիալական վարքագիծ դրսևորող տղամարդկանց հակաբրուտալ պահվածքը ծաղրելու համար: Ավելի նրբաճաշակ հագնվելը, ջութակ նվագելը, խնամված մազեր և եղունգներ ունենալը, վարդագույնը՝ սևից, Տերյանին Չարենցից նախընտրելը օրինակ կարող են համարվել ղզիկության նշաններ: Ռոմանտիկ սենտիմենտը ա’լյա սրտիկով փուչիկներ ի հակադրումն «աղջի, հըլը մի հատ տապչկեքս բերի» հանդեպ ակնհայտ ղզիկություն է:
Երկու սեռերի կողմից էլ հաճախ է օգտագործվում սեփական զգացմունքային թուլությունը ինքնահեգնանքով արդարացնելու համար:
Օգտագործվում է նաև տղաների նորմատիվային տղայականությունը խրախուսելու և ոչ նորմատիվային պահվածքը սաստելու համար:
Մասնագետները դեռևս վիճում են ղզիկ‬ եզրը թաքնված սեքսիստական դիսկրիմինացիա պարունակում է թե չէ: Եվ արդյոք պետք է պաշտպանել տղամարդկանց ղզիկ լինելու իրավունքը:
Ըստ ֆեյսբուքյան և թվիթերյան հեշթեգերի վիճակագրության, այս բառն ամենաշատը կանայք են օգտագործում:

Տես նաև՝ թսիկ, ստասիկ, ինժեներ բալա

Օգտագործման օրինակներ՝

Ֆեյսբուքյան խումբ «Սերը ինքը մի քիչ ղզիկ բան ա»,
Թվիթ՝ «էհ, շատ #ղզիկ բան ա բանաստեղծ լինելը»
Արդյոք քո գլամուրնի, ՂԶԻԿ, քեզնից ավելի սիրուն հագնվող ընկերը համասեռամոլից լավն է, ու ինչպես հասկանալ, որն է սահմանը ղզիկության և համասեռամոլության մեջ:

StrangeLittleGirl
11.02.2019, 17:26
Ի դեպ, քլնգել բառն էրեկ ֆբ֊ում տեսա ակումբի հետ բացարձակ կապ չունեցող մարդու կողմից։ Նենց որ կա՛մ ակումբից դուրս ա էկել, աշխարհով մեկ տարածվել, կա՛մ միշտ էլ էղել ա, մենք բերել ենք ակումբ։

Arpine
18.02.2019, 19:24
Ի դեպ, քլնգել բառն էրեկ ֆբ֊ում տեսա ակումբի հետ բացարձակ կապ չունեցող մարդու կողմից։ Նենց որ կա՛մ ակումբից դուրս ա էկել, աշխարհով մեկ տարածվել, կա՛մ միշտ էլ էղել ա, մենք բերել ենք ակումբ։

Ես ինչ ծնվել եմ էս բառը տանը, շրջապատում լսում եմ, հաստատապես ոչ ակումբածին։

Sambitbaba
18.02.2019, 20:51
Ես ինչ ծնվել եմ էս բառը տանը, շրջապատում լսում եմ, հաստատապես ոչ ակումբածին։

Ես էլ:
Այսինքն, օգտագործվել է նաև մեր թվարկությունից առաջ: