PDA

Դիտել ողջ տարբերակը : Ընտանեկան ծառ



Գաղթական
05.03.2017, 10:36
Հնում հայերի մոտ ընդունված է եղել ճանաչել սեփական նախնիների առնվազն 7 սերունդ:
Այստեղից էլ՝ գործել է չգրված կանոն, որ ամուսինների միջև առնվազն «7 պորտ»-ի տարբերություն պիտի լինի՝ առողջ ժառանգներ ունենալու համար:

Իսկ որքանո՞վ ենք մենք այսօր ծանոթ մեր սեփական ընտանիքի պատմությանը:

Եկեք պատմենք պատմություններ՝ մեր սեփական կամ մեզ ծանոթ ընտանիքների:

ա) ինչպե՞ս է քո ազգանունը
բ) ինչպե՞ս է այն ձևավորվել
գ) ինչպե՞ս է անվանվել քո ցեղը/ազգը հնում/այսօր
դ) ինչպիսի՞ն է նրա պատմությունը
ե) Հայոց աշխարհի դեպի ո՞ր շրջան են ձգվում արմատներդ
զ) ի՞նչ հայտնի մարդիկ են եղել նախնիներիդ մեջ, որոնց մասին դու գիտես
է) ունե՞ք այսօր կամ ունեցե՞լ եք դուք ընտանեկան ծառ: եթե այո՝ ումի՞ց է այն սկիզբ առնում և ինչու: ո՞վ է այսօր դա պահպանում ու լրացնում: (Ընտանեկան ծառի տեղադրումը ողջունվում է)

Chuk
05.03.2017, 11:16
Հնում հայերի մոտ ընդունված է եղել ճանաչել սեփական նախնիների առնվազն 7 սերունդ:
Այստեղից էլ՝ գործել է չգրված կանոն, որ ամուսինների միջև առնվազն «7 պորտ»-ի տարբերություն պիտի լինի՝ առողջ ժառանգներ ունենալու համար:
Մի դիտողություն. 7 պորտն ամենևին 7 սերունդը չի:

Արէա
05.03.2017, 11:19
Հնում հայերի մոտ ընդունված է եղել ճանաչել սեփական նախնիների առնվազն 7 սերունդ:
Այստեղից էլ՝ գործել է չգրված կանոն, որ ամուսինների միջև առնվազն «7 պորտ»-ի տարբերություն պիտի լինի՝ առողջ ժառանգներ ունենալու համար:

7 պորտը նախնիների 7 սերունդը չի, Գաղթական ջան։
Քո ու հորեղբորդ տղայի թոռները իրարից «7 պորտ» հեռու կլինեն։

Արէա
05.03.2017, 11:20
Մի դիտողություն. 7 պորտն ամենևին 7 սերունդը չի:

Միասին գրեցինք )

Աթեիստ
05.03.2017, 11:58
Հորոխպերս մի երկու տարի առաջ սենց մի բան էր նախաձեռնել։ Դրել որտեղից հնարավոր ա ինֆորմացիա էին հավաքում։
Նենց չի, որ ավելի անիմաստ զբաղմունք չեմ պատկերացնում, բայց որ իմաստը ինձանից շատ խորը թաքնվավ, կհավաստեմ։

Ես օրինակ չգիտեմ, թե հորական պապս որտեղից ա, էդ էլ հիշում եմ էն ժամանակ (հիշում եմ, որ չգիտեմ, ոչ թե հիշում եմ, որտեղից ա), երբ հարցնում են, թե արմատներով որտեղից եմ։

Գաղթական
05.03.2017, 11:59
Մի դիտողություն. 7 պորտն ամենևին 7 սերունդը չի:


7 պորտը նախնիների 7 սերունդը չի, Գաղթական ջան։
Քո ու հորեղբորդ տղայի թոռները իրարից «7 պորտ» հեռու կլինեն։

Մերսի դիտողության համար:
էս պահը միշտ խառնում եմ..
կբացատրե՞ք, թե ոնց հաշվում:

ասենք բերված օրինակում՝ քո ու հորեղբորդ տղու ընդհանուր պապից հետո ձեր թոռները 5-րդ սերունդն են:

Արէա
05.03.2017, 12:23
Մերսի դիտողության համար:
էս պահը միշտ խառնում եմ..
կբացատրե՞ք, թե ոնց հաշվում:

ասենք բերված օրինակում՝ քո ու հորեղբորդ տղու ընդհանուր պապից հետո ձեր թոռները 5-րդ սերունդն են:

1 պորտ ա համարվում անմիջական ազգականը՝ ծնող, զավակ, քույր, եղբայր։

Նշված օրինակում իմ թոռան համար հորեղբորս տղայի թոռը կլինի. հոր հոր հոր եղբոր երեխայի երեխայի երեխան = 7

Գաղթական
05.03.2017, 13:12
1 պորտ ա համարվում անմիջական ազգականը՝ ծնող, զավակ, քույր, եղբայր։

Նշված օրինակում իմ թոռան համար հորեղբորս տղայի թոռը կլինի. հոր հոր հոր եղբոր երեխայի երեխայի երեխան = 7

Արէա ջան մերսի:
չեմ ուզում թեման այլ ընթացք ստանա, բայց, որ խոսք բացվեց, մի հարց էլ.
պորտը հորով են չափո՞ւմ, թե՞ մորով..
ասենք՝ նույն հորից բայց տարբեր մայրերից (կամ հակառակը) երեխեքի երեխեքն իրար համար..

Արէա
05.03.2017, 13:40
Արէա ջան մերսի:
չեմ ուզում թեման այլ ընթացք ստանա, բայց, որ խոսք բացվեց, մի հարց էլ.
պորտը հորով են չափո՞ւմ, թե՞ մորով..
ասենք՝ նույն հորից բայց տարբեր մայրերից (կամ հակառակը) երեխեքի երեխեքն իրար համար..

Մայրն էլ են հաշվում։
Մորաքրոջ երեխան նույն ազգակցական «աստիճանն» ունի, ինչ հորեղբոր։

Թեմայի մասնագետ չեմ, բայց ըստ տրամաբանության, ընդհանուր գոնե մեկ ծնողի առկայության դեպքում արդեն 1 «պորտ» պիտի հաշվվի։

StrangeLittleGirl
05.03.2017, 13:59
Հավես թեմա ես բացել, Գաղթական: Ես լիքը հետաքրքիր բաներ կարամ պատմեմ իմ նախնիներից: Ընտանեկան ծառ էլ հորական տատիս թե՛ մոր, թե՛ հոր գծով ունենք: Բայց դա շատ բարդ ա: Մենակ ուղիղ գծով ա էդ տոհմածառը շարունակվում, ճյուղավորումներից ոչ մի կերպ տեղյակ չենք: Ընդհանրապես յոթ սերունդ իմանալն ով ում բարեկամն ա ահագին բարդ ա, որովհետև չորս սերունդ հետո կապը կտրվում ա: Ցեղասպանությունն էլ հետն ահագին բաներ խառնում ա իրար:

Բայց ինձ ահագին շատ ա հետաքրքրում նախնիներիս թեման: Ասենք, գիտեմ, որ աշխարհի տարբեր ծայրերում լիքը հեռավոր բարեկամներ ունեմ, ու հետաքրքիր կլիներ իմանալ՝ ովքեր են իրանք: Մի օր որ ժամանակ գտնեմ, ահագին խորանալու եմ:

Ծլնգ
05.03.2017, 14:19
Ընդհանրապես յոթ սերունդ իմանալն ով ում բարեկամն ա ահագին բարդ ա, որովհետև չորս սերունդ հետո կապը կտրվում ա: Ցեղասպանությունն էլ հետն ահագին բաներ խառնում ա իրար:

Սա!

Ահագին հետաքրքրված եմ եղել իմանալ, թե «ես որտեղի՞ց եմ գալիս», բայց 4 սերունդ վերև գրեթե բոլոր ճյուղերում մենակ կոտորածների պատմություններ են (19րդ դարի վերջից ավել խորանալ չի լինում)։ Հետն էլ այն փաստը, որ հայերս մինչև 19րդ դարի վերջերը լայնամասշտաբ գրագիտություն չենք ունեցել, և տոհմի պատմությունը միայն բանավոր է եղել։ Ու եթե նախնիները բնակություն են փոխել (ինչը շատ-շատերի հետ է եղել այս կամ այն կողմից ջարդերի պատճառով), գրեթե անհնարին է շատ հետ գնալը առանց լուրջ լեզվա-բարբառային ու էթնոգրաֆիկ հետազոտությունների, որոշ դեպքերում էլ՝ էլ ավելի լուրջ անթրոպոլոգիական։

StrangeLittleGirl
05.03.2017, 14:43
Լավ, սկսեմ պատասխանել :))

ա) ինչպե՞ս է քո ազգանունը
Իշխանյան
բ) ինչպե՞ս է այն ձևավորվել
Ձևավորման պատմությունը շատ չգիտեմ: Իրականում պիտի իմ ազգանունը Կիրակոսյան լիներ, բայց պապիկիս մայրն ամուսնալուծված է եղել, պապիկիս իր ազգանունն է տվել՝ Իշխանյան: Ինքը Շուշիից էր: Ասում են՝ բոլոր Իշխանյանները մի ցեղ են ու Արցախից: Հանդիպել եմ շատ Իշխանյանների, իրենք էլ են էդպես կարծում, բայց ոչ մի կերպ չենք կարողանում գտնել, թե ինչ բարեկամ ենք իրար: Ցավոք, իմ նախնիների հենց էդ գծից շատ բաներ հայտնի չեն:

գ) ինչպե՞ս է անվանվել քո ցեղը/ազգը հնում/այսօր
Էս հարցն ինձ համար շատ բարդ ա, որովհետև չնայած իմ ազգանունը Իշխանյան ա ու ահագին ժամանակ էսպես էլ անվանվել ա, ես ինձ չեմ համարում մենակ էդ մի գծի ներկայացուցիչ: Իմ չորս ճյուղերն էլ հավասարապես են իմ մեջ (մորական տատիկ-պապիկ, հորական տատիկ-պապիկ): Ամենաշատ տեղեկությունները մորական տատիցս ունենք: Իր հոր ցեղը կոչվել ա Չերազ: Տատիկս վերջին Չերազն ա: Շատ կուզեի էդ ազգանունն ինչ-որ կերպ պահել, բայց երևի չի ստացվի: Մոր կողմն էլ Անդրեասյան են: Ինչպես Իշխանյանների դեպքում, Անդրեասյանների մասին էլ են ասում, որ մի ցեղ են: Բայց չգիտեմ, էս մեկի մեջ էդքան չեմ խորացել:

Մորական պապիս կողմը Խաչատրյաններ ու Ճեպեճյաններ են, տատիս կողմը՝ Ղուլղազարյան (մեծ տատիս ազգանունը չգիտեմ):

դ) ինչպիսի՞ն է նրա պատմությունը

Ամենահետաքրքիրը Չերազների պատմությունն ա: Ասում են՝ արմատները ձգվում են մինչև Բագրատուտիներ: Չգիտեմ, չեմ խորացել շատ, որ հաստատ պարզեմ:

ե) Հայոց աշխարհի դեպի ո՞ր շրջան են ձգվում արմատներդ
Իշխանյանների մասին արդեն ասեցի. Շուշի: Կիրակոսյան կողմը Տրապիզոնից է (հենց դրա համար էլ հայրս ահագին հետաքրքրված է համշենահայերով ու գիրք է տպել իր հետազոտությունների հիման վրա): Չերազները Պոլսից են: Անդրեասյանները Հազարի գյուղից (https://hy.wikipedia.org/wiki/%D5%80%D5%A1%D5%A6%D5%A1%D6%80%D5%AB)։ Ճեպեճյանները Կեսարիայից են։ Խաչատրյանները՝ Էրզրումից, Ղուլղազարյանները՝ Գետաշենից։ Մի խոսքով, Արևմտյան Հայաստանի ու Արցախի ընտիր խառնուրդ եմ ։))


զ) ի՞նչ հայտնի մարդիկ են եղել նախնիներիդ մեջ, որոնց մասին դու գիտես
Սարգիս Ճեպեճի (https://hy.wikipedia.org/wiki/%D5%8D%D5%A1%D6%80%D5%A3%D5%AB%D5%BD_%D5%83%D5%A5%D5%BA%D5%A5%D5%B3%D5%B5%D5%A1%D5%B6) - չգիտեմ՝ մեծ տատիս պապն է, թե պապի եղբայրը
Վահան Չերազ (https://hy.wikipedia.org/wiki/%D5%8E%D5%A1%D5%B0%D5%A1%D5%B6_%D5%89%D5%A5%D6%80%D5%A1%D5%A6_(%D5%A1%D6%80%D5%A5%D6%82%D5%B4%D5%BF%D5%A1%D5%B0%D5%A1%D5%B5%D5%A5%D6%80%D5%A 7%D5%B6)) - մեծ պապս է
Մինաս Չերազ (https://hy.wikipedia.org/wiki/%D5%84%D5%AB%D5%B6%D5%A1%D5%BD_%D5%89%D5%A5%D6%80%D5%A1%D5%A6) - տատիկիս պապի եղբայրն է
Վազգեն Անդրեասյանն (https://hy.wikipedia.org/wiki/%D5%8E%D5%A1%D5%A6%D5%A3%D5%A7%D5%B6_%D4%B1%D5%B6%D5%A4%D6%80%D5%A7%D5%A1%D5%BD%D5%A5%D5%A1%D5%B6) էլ էր վիքիում նշված, ասեցի ես էլ նշեմ ։)) Տատիկիս հորեղբայրն է:
Ռաֆայել Իշխանյան
(https://hy.wikipedia.org/wiki/%D5%8C%D5%A1%D6%86%D5%A1%D5%B5%D5%A5%D5%AC_%D4%BB%D5%B7%D5%AD%D5%A1%D5%B6%D5%B5%D5%A1%D5%B6)
Դե հայրս ու հորեղբայրս էլ պակաս հայտնի չեն, բայց նրանց մասին չենք խոսում ։))

է) ունե՞ք այսօր կամ ունեցե՞լ եք դուք ընտանեկան ծառ: եթե այո՝ ումի՞ց է այն սկիզբ առնում և ինչու: ո՞վ է այսօր դա պահպանում ու լրացնում: (Ընտանեկան ծառի տեղադրումը ողջունվում է)
Տատիս կողմի ծառերը կան Վազգեն Անդրեասյանի երկու գրքերում՝ Վահան Չերազի մասին ու Հազարիապատում տպագրված: Բայց ոչ ոք հատուկ տոհմածառ չի պահում: Մերոնք բավարարվում են արխիվներ փորելով, ֆիլմեր նկարելով ու գրքեր գրելով: :))

ivy
05.03.2017, 14:49
Հավեսով կկարդամ բոլորի պատասխանները ։)

Հետաքրքիր է ։)

StrangeLittleGirl
05.03.2017, 14:51
Հավեսով կկարդամ բոլորի պատասխանները ։)

Հետաքրքիր է ։)

Դու էլ գրի :))

ivy
05.03.2017, 14:56
Դու էլ գրի :))

Էհ Բյուր ջան, ինձ ընտանեկան, տոհմային և նման բաներ իմ սեփական անձի կտրվածքով երբևէ չեն հետաքրքրել ու դժվար թե հետաքրքրեն։ Մոտավոր գիտեմ մի չորս֊հինգ սերնդի մասին, բայց երբևէ չեմ խորացել, որ ավելին իմանամ։

Նենց որ, ես մենակ ուրիշներինը կկարդամ. քոնը շատ հետաքրքիր էր, տեսնենք` մյուսները ինչ կպատմեն ։)

Տրիբուն
05.03.2017, 15:07
Ես օրինակ չգիտեմ, թե հորական պապս որտեղից ա, էդ էլ հիշում եմ էն ժամանակ (հիշում եմ, որ չգիտեմ, ոչ թե հիշում եմ, որտեղից ա), երբ հարցնում են, թե արմատներով որտեղից եմ։

Ո՞նց չգիտես։ Ես կարամ քո տեղը քո տոհմածառը պատմեմ։

Նախ, դուք ՄուշուՍասունից ես, քանի որ սաղս ընդեղից ենք։
Նախնիներդ իշխանական տոհմ են եղել, քանի որ ռամիկ հայ չկա, սաղս իշխանի զարմ ենք:
Լիքը ֆիադայի պապեր ես ունեցել, մի երկուսը հայտնի:
Սովետ սկզբներում կուլակ եք եղել, քանի որ էլի, շարքային գյուղացի հայ չի լինում, սաղս կուլակ ենք։
Հիմա բնիկ երևանցի ես, քանի որ ոչ բնիկ երևանցի լինել 2800 տարեկան քաղաքում հնարավոր չի։

Գաղթական
05.03.2017, 15:55
Բյուր երանի քեզ, որ էսքան բան գիտես նախնիներիդ մասին:
ՈՒղղակի հիացած եմ...

StrangeLittleGirl
05.03.2017, 16:02
Բյուր երանի քեզ, որ էսքան բան գիտես նախնիներիդ մասին:
ՈՒղղակի հիացած եմ...
Դե նախնիներս էլ ամեն ինչ արել են, որ իմանանք։ ։)) Հիմա էլ ընտանիքս ամեն մեկը մի ճյուղով զբաղվում ա: Բայց ես էնպիսի զգացողություն ունեմ, որ դեռ շատ բան չգիտեմ: Հատկապես ուզում եմ Կեսարիայի ճյուղը մի լավ փորփրել, մանավանդ որ էդ ճյուղով զբաղվող չկա: Ավելին՝ ուզում եմ նույնիսկ գենետիկ անալիզ անել: Ուղղակի ըստ իմ տեղեկությունների, մի քանի հարյուր տարի շարունակ բոլոր նախնիներս հայ են: Ինձ հետաքրքրում ա՝ իրո՞ք տենց ա: :))
Ի դեպ, եթե որևէ մեկի հետաքրքրում ա, էս կայքը (https://www.23andme.com/) առաջարկում ա գենետիկ հետազոտություն: Ես դեռ կամուկացի մեջ եմ՝ անեմ, թե չէ:

Արէա
05.03.2017, 16:14
Հորական կողմս Խոյի Սալմաստից ա։
Արևելյան Հայաստան են տեղափոխվել 19-րդ դարի վերջերին։
Սրիկաներ են եղել իմ հասկանալով։
Պապս ոգևորված պատմում էր, որ իր պապերը Րաֆֆու պատմած խաչագողերն են եղել։ Ես էլ դպրոցում էի պատմում դրա մասին, ինչից ուսուցիչներս, ի զարմանս ինձ, բնավ էլ պապիս նման չէին ոգևորվում :))
Ցեղի մեջ մի, քիչ թե շատ խելքը գլխին, մարդ ա եղել՝ քահանա Սիմոնը, ում անունով էլ կոչվում ա մեր ցեղը, ու ում պապս կատարյալ հարիֆ էր համարում։

Մորական կողմս Մշից ա (Տրիբունի ինադու)։
Սրանք էլ գյուղացի, աղքատ ժողովուրդ են եղել։
Եղեռնի ժամանակ փախել են Արևելյան Հայաստան։

3-4 սերնդից առաջվա ոչ մի տեղեկություն չունեմ։

Շինարար
05.03.2017, 16:34
Իմ մայրական պապս իրոք մշեցի ա, նենց որ, երբ առիթ ա լինում՝ ես էլ հպարտորեն նշում եմ, որ մշեցու թոռ եմ :D հետո իրանք դե փախեփախի ժամանակ գաղթել են Լիբանան, էնտեղից էլ միամտաբար եկել են Խորհրդային Հայաստան:

Մայրական տատս Լոռվա Կուրթան գյուղից ա, բայց իրենց նախնիները Ղարաքիլիսայից են տեղափոխվել էնտեղ:

Հայրական տատս Ղարաքիլիսեցի ա (այժմ՝ Վանաձոր):

Հայրական պապս Ստեփանավանից ա, իր ապուպապերը եկել են կարծեմ Նոյեմբերյանի կողմերից՝ երկու եղբայր՝ ավագը Մանուչար՝ հաստատվել ա Ջալալօղլի (Ստեփանավան), կրտսերը՝ Վարդան՝ շրջակա գյուղերից մեկում ու իր սերունդները Վարդանյան են, բայց իրանք մինչև գալը արդեն Մանուչարանց ընտանիքից են եղել, ինչքան գիտեմ նոյմբերյանի էդ ընտանիքն էլ գալիս ա Ղարաբաղից: Վարդան ու Մանուչար անունները ահագին տարածված են ընտանիքում: Ոչ մեկ գրի չի առել, ուղղակի սերնդե սերունդ ասում են, ենթադրում, ծաղկացնում :D ես որ փոքր էի, հավես արի տենց ծառ նկարեցի՝ զուտ Ստեփանավանի ճյուղը, ու ահագին ուրախացել էի, որ ես մինչև եսիմքանի սերունդ սկսած Մանուչարից՝ ավագ որդու ավագ որդու ավագ որդի եմ, թե յանի ինչ կա ուրախանալու: Եվ ինձնով կավարտվի այս փառապանծ ճյուղը :D Վատ բան չի իմանալը, որ մեկ էլ իմ ազգանունով մարդիկ եմ հանդիպում, արդեն անմիջապես իմանում եմ, որ իմ ազգականն ա, ասենք՝ քրեական խրոնիկա կարդալիս :D Էն ֆուտբոլիստն էլ ա Ստեփանավանի իմ ազգից սերում կարծեմ:

բոլոր կողմերից նախնիներս արհեստավորներ են կամ գյուղացիներ, հայրական գծով նախնիներիս ազգականներիս մեջ խմող մարդիկ շատ կան, մորական պապս հպարտորեն ասում էր, որ իր պապը, թե հայրը Բեյրութի, թե Մուշի (մանրամասները լավ չեմ հիշում) ամենաաղքատ մարդն ա եղել :D


Խառնում եմ, թե որ տատս էր ասում՝ իր նախնիները անեցի են:

Տրիբուն
05.03.2017, 17:35
Որ հավաքվել ենք, ես էլ ասեմ, բայց կարճ կկապեմ։ Քանի որ պապի-տատիից առաջ ինչ կա կիսալեգենդ վիճակներ ա։

Հորական պապս․ մուշուսասուն վիճակներ։ Գաղթել են, հաստատվել են Շիրակի դաշտավայրում, դարձել են գյումրեցի։ Պապս որբ ա մեծացել, բայց լավ կրթություն ա ստացել։ Պատերազմին մասնակցելուց հետո Երևանի պոլիտեխնիկ, հետո Մոկսվայի Բաուման։ Դարձել ա ՍՄԿԿ անդամ, ու էտ կրթությունով ու կոմունիստական հավատքով դարձել ա նոմենկլատուրշիկ։ Լիքը պաշտոններ, պադավատ, մասկվա, լենինգռադ վիճակներ։ Փիս գրագետ, կարդացած, քֆուրչի, մի քիչ էլ խմելու հետ սեր ունեցող մարդ էր։ Ասում են, որ ես իրան եմ շատ նման, համ արտաքինով, համ բնավորությամբ։ Ինձ շատ էր սիրում, քանի որ առաջին թոռն էի: Լիքը ման էր տալիս, մասկվա-լինինգռադ: Թանգարաններ էր միշտ տանում լիքը, ու լիքը գիրք էր տալիս ձեռս:

Հորական տատս. Բնիկ անեցի։ 21 թվին սահմանը գծելուց հետո անցել են Ախուրյան գետը ու հաստատվել էս կողմում: Հայոցի դասատու էր: Գրագետ ու հավասարակշռված կին էր: Վաբշե մեր սաղ ցեղում ինքը միակ նորմալ մարդն ա եղել, Աստված հոգին լուսավորի: Մնացած սաղի յանը, ամեն մեկինը մի ձև, տարած էր(ա)։ Տաս տարեկանիս ինձ նվիրել ա իմ առաջին 12 հատորյա հանրագիտարանը։

Մորական պապս. Պոլսեցի ոսկերիչ: 40-ականների ծառայել ա թուրքական բանակում։ Բա, սենց էլ ա լինում։ Փախել ա բանակից ու սահմանն անցել ա Սիրիա։ Փախնել օգնել են Թուրքիայից հեռացող վերջին ասորիները։ Լավ որկերիչ ա եղել: Եթե ձեր մեծերը հիշում են Ամիրյանի վրայի ոսկերիչի բուտկեն 60-70-ականներին, էտ իմ պապին ա եղել:

Մորական տատս․ Ուրֆայի ասորի։ Անցել են Սիրիա Թուրքիան լքող վերջին քրիստոնյաների հետ։ Արդեն երևի պարզ ա, թե պապուս հետ Հալեպում ոնց են ծանոթացել ու պսակվել։ :D Ծխող, խմող, կառտոյժնիկ, ղումարբազոտ տատիի էր։ Տենց էլ մինչև մեռնելը թոշակի փողով լոտո էր առնում, թոռներին նվեր էր տալիս, որ շահեն։ Ծխելը թարգեց 85 տարեկանում, ու մի տաս տարի էլ վրից խփեց։

Տեղափոխվել են մայր հայրենիք մեծ հայրենադարձության տարիներին։ Տոշնի թիվը չգիտեմ, բայց 40-ակենների վերջ, երևի էլի։

Ես մի տաս սերունդ բնիկ Երևանցի եմ :D

Շինարար
05.03.2017, 17:47
Իմ մայրական պապս իրոք մշեցի ա, նենց որ, երբ առիթ ա լինում՝ ես էլ հպարտորեն նշում եմ, որ մշեցու թոռ եմ :D հետո իրանք դե փախեփախի ժամանակ գաղթել են Լիբանան, էնտեղից էլ միամտաբար եկել են Խորհրդային Հայաստան:

Մայրական տատս Լոռվա Կուրթան գյուղից ա, բայց իրենց նախնիները Ղարաքիլիսայից են տեղափոխվել էնտեղ:

Հայրական տատս Ղարաքիլիսեցի ա (այժմ՝ Վանաձոր):

Հայրական պապս Ստեփանավանից ա, իր ապուպապերը եկել են կարծեմ Նոյեմբերյանի կողմերից՝ երկու եղբայր՝ ավագը Մանուչար՝ հաստատվել ա Ջալալօղլի (Ստեփանավան), կրտսերը՝ Վարդան՝ շրջակա գյուղերից մեկում ու իր սերունդները Վարդանյան են, բայց իրանք մինչև գալը արդեն Մանուչարանց ընտանիքից են եղել, ինչքան գիտեմ նոյմբերյանի էդ ընտանիքն էլ գալիս ա Ղարաբաղից: Վարդան ու Մանուչար անունները ահագին տարածված են ընտանիքում: Ոչ մեկ գրի չի առել, ուղղակի սերնդե սերունդ ասում են, ենթադրում, ծաղկացնում :D ես որ փոքր էի, հավես արի տենց ծառ նկարեցի՝ զուտ Ստեփանավանի ճյուղը, ու ահագին ուրախացել էի, որ ես մինչև եսիմքանի սերունդ սկսած Մանուչարից՝ ավագ որդու ավագ որդու ավագ որդի եմ, թե յանի ինչ կա ուրախանալու: Եվ ինձնով կավարտվի այս փառապանծ ճյուղը :D Վատ բան չի իմանալը, որ մեկ էլ իմ ազգանունով մարդիկ եմ հանդիպում, արդեն անմիջապես իմանում եմ, որ իմ ազգականն ա, ասենք՝ քրեական խրոնիկա կարդալիս :D Էն ֆուտբոլիստն էլ ա Ստեփանավանի իմ ազգից սերում կարծեմ:

բոլոր կողմերից նախնիներս արհեստավորներ են կամ գյուղացիներ, հայրական գծով նախնիներիս ազգականներիս մեջ խմող մարդիկ շատ կան, մորական պապս հպարտորեն ասում էր, որ իր պապը, թե հայրը Բեյրութի, թե Մուշի (մանրամասները լավ չեմ հիշում) ամենաաղքատ մարդն ա եղել :D


Խառնում եմ, թե որ տատս էր ասում՝ իր նախնիները անեցի են:

հորիցս ճշտեցի՝ հայրական տատիս նախնիները Խոյից են:

StrangeLittleGirl
05.03.2017, 17:56
Էս էլ եղբորս ֆիլմը մեր նախնիների մասին :)


https://www.youtube.com/watch?v=9aUKWauE-vw

Վիշապ
06.03.2017, 04:11
Իմ տոհմածառում վայթե այդպես նշանակալից դեմքեր չկան, հետևաբար ազգուտակով պարծենալու բան չունեմ:
Շատ շատ կարող եմ ասել՝ «ես հայ եմ և հպարտ եմ, որ հայ եմ», մոտավորապես՝ «ես այսօր այստեղ եմ ձեր կողքին կանգնած և ես ուրախ եմ, որ այսօր այստեղ եմ ձեր կողքին» :Ճ

Մի երկու ոչ ֆորմալ պատմություն, էն ինչ որ կարող է հետաքրքիր թվալ:

Հորական կողմս գաղթել է Մուշից Մարտունի (Գեղարքունիք), պապիս պապն էլ Մխո անունով, որից որ առաջացել է իմ ազգանունը, վայթե եղել է հովիվ, դե չոբան էլի :Ճ
Ասում են, որ քուրդ չի եղել, անունը Մխիթար է եղել, կարճ Մխո են ասել:
Հորական պապս էլ տռակտորի շոֆեր էր ու շատ ներվային, ասում են մի անգամ տրակտորով շուռ է եկել ու դրանից սկսվել են իր ներվային պրոբլեմները, որոնք հետո խորացան վատ վերջաբանով:
Հորական տատս դինջ կնիկ էր, երևի աշխարհի ամենադինջ կանանցից մեկը: Իրենց ցեղից շատ տեղյակ չեմ:
Այսինքն հորական կողմս Արքունիքի ու Գեղեցիկի հետ վայթե շատ կապ չեն ունեցել:

Մորական կողմս գաղթել է Ալաշկերտից Լոռվա Շահնազար (Մեծավան) գյուղ:
Ամենավառ բանը որ գիտեմ.
Պապս Հայրենական պատերազմի ժամանակ զինվոր է եղել, գերի է ընկել, գերմանացիները լավ տանջել են, ձմռանը ամբողջ գիշեր սառը ջրի տակ են պահել, հետո պապս մի ձև հաջողացրել է փախչել
բայց դրանից հետո սկսել է տառապել լուսնոտությամբ, հաճախ քնած տեղը լուսամուտից փորձում էր դուրս գալ:
Պապիս շատ են զզվեցրել չեկիստները, մտածելով որ գերմանական ճամբարից փախած գերին հնարավոր է, որ չի փախել, այլ բաց են թողել լրտեսության նպատակով:
Այսինքն եկել տնից տարել են լիքը տականք ու անիմաստ հարցազրույցների:
Բայց դե մորական գեղս աշխարհի ծերին, չոլերի մեջ, ու խեղճ պապս ինչ լրտեսություն պիտի աներ ու դեռ գերմանացիներին էլ լուր հասցներ, ես չեմ պատկերացնում:
Էդ պապս ինձ գիրկն էր առնում (երևի մի 2-3 տարեկան էի), դանակով քաղցր ձմերուկ էր կտոր-կտոր անում ու կերակրում՝ քթի տակ ինչ-որ ալաշկերտյան երգ դնդնալով:
Մորական տատս աշխարհի ամենաաշխատասեր տատերից էր, առավոտ ժամը 4-ից մինչև գիշերվա 1-ը ոտի վրա, անդադար փնթփնփթան ու անհանգիստ:

Սենց:

Մտածում եմ, որ ես հանգիստ կարող էի ավազակների կամ ստրուկների ցեղից սերած լինել, վայթե շատ բան փոխված չլիներ, ի՞նչ իմանամ:
Իսկ այ եթե տոհմածառումս թագավորներ ու թագուհիներ լինեին, ես հիմա առնվազն կոմս կլինեի և մնացածդ ինձ կվճարեիք տուրքեր, բա :Ճ

Ռուֆուս
08.03.2017, 14:19
ա) ինչպե՞ս է քո ազգանունը
Տիրատուրյան, այսինքն Տիրոջ նվերը

բ) ինչպե՞ս է այն ձևավորվել
Կիսալեգենդար պատմություն կա, որ մի ընտանեկան զույգ երեխա չի ունենում, մի անգամ ղոնախ (հյուր) են ունենում ու ղոնախին շատ լավ են նայում, հյուրասիրում, գնալուց առաջ ղոնախն ասում է, թե աստված ձեզ նվեր կանի։ Շուտով երեխա են ունենում ու անունը դնում Տիրատուր ու Տիրատուրի զավակները դառնում են Տիրատուրյաններ։

գ) ինչպե՞ս է անվանվել քո ցեղը/ազգը հնում/այսօր
Նույն ձևի

դ) ինչպիսի՞ն է նրա պատմությունը
Մինչև 19-րդ դարի սկիզբը Տիրատուրյանների պատմության մասին շատ տեղեկություններ չկան։ Մենակ էն ա հայտնի, որ Էրզրումում ձիթհանք են ունեցել ու 1828-1829թ-ի ռուս-թուրքական պատերազմից հետո Տիրատուրյանների ցեղում 4 եղբայր են եղել ու երկուսը ընտանիքով գաղթել են Արևելյան Հայաստան ու հաստատվել Ալեքսանդրապոլում, իսկ մյուս երկուսը մնացել են Էրզրումում։ Էրզրումում մնացածների հետագա ճակատագրի մասին ոչ մի բան չգիտենք, իսկ Ալեքսանդրապոլ գաղթածների բոլոր հետագա սերունդները նշված են տոհմածառում։

ե) Հայոց աշխարհի դեպի ո՞ր շրջան են ձգվում արմատներդ
Հայրական կողմս՝ Կարին/Էրզրում, իսկ մայրական կողմս բնիկ գյումրեցիներ են։

զ) ի՞նչ հայտնի մարդիկ են եղել նախնիներիդ մեջ, որոնց մասին դու գիտես
Երևի թե ամենահայտնի մարդը նկարիչ Կարապետ Տիրատուրյանն (https://hy.wikipedia.org/wiki/%D4%BF%D5%A1%D6%80%D5%A1%D5%BA%D5%A5%D5%BF_%D5%8F%D5%AB%D6%80%D5%A1%D5%BF%D5%B8%D6%82%D6%80%D5%B5%D5%A1%D5%B6) է, «Հայոց Գիրը» գրքի հեղինակ, ով նաև հայտնի է բազմաթիվ գրքերի նկարազարդումներով ու հարյուրավոր հայերեն տառատեսակների հեղինակ է։

է) ունե՞ք այսօր կամ ունեցե՞լ եք դուք ընտանեկան ծառ: եթե այո՝ ումի՞ց է այն սկիզբ առնում և ինչու: ո՞վ է այսօր դա պահպանում ու լրացնում: (Ընտանեկան ծառի տեղադրումը ողջունվում է)
Տոհմածառ ունենք, մեծ հորաքույրս է կազմել 70-80-ական թվականներին, Մատենադարանում լիքը ձեռագրեր է ուսումնասիրել, Բուլղարիա ու Ռումինիա էր գնացել, որ էնտեղ գտնվող բարեկամներից տվյալներ հավաքի ու ինչքան տեղեկություններ կարողացել է հավաքել, բոլորը լրացրել է տոհմածառում։ Մոտ երկու հարյուր տարվա պատմություն կա տոհմածառում, ու ափսոս, որ իր մահից հետո ոչ մեկ չուզեցավ էդ գործով զբաղվի ու տենց էլ կիսատ մնացել ա։ Համենայն դեպս իմ ազգանունն ունեցող բոլոր մարդիկ ինձ բարեկամ են, արդեն երկու դեպք է եղել, երբ Երևանում բնակվող Տիրատուրյաններ եմ հայտնաբերել :)

StrangeLittleGirl
08.03.2017, 14:23
Ռուֆ, էս մի հայտնի դեմքին մոռացար (https://en.wikipedia.org/wiki/Angel_Deradoorian) :))

Ռուֆուս
08.03.2017, 14:30
Ռուֆ, էս մի հայտնի դեմքին մոռացար (https://en.wikipedia.org/wiki/Angel_Deradoorian) :))

Չէ, իրեն հատուկ չնշեցի, որովհետև էդքան էլ վստահ չեմ, որ բարեկամներ ենք ։)) Իր հետ որ խոսեցի, պարզվեց իր նախնիները էրզրումցի չէին, այլ Վանի մոտերից էին, ազգանունն էլ մի քիչ տարբեր ա։ Նենց որ մեր ազգակցական կապերը դեռ 100% ապացուցված չեն ։ՃՃ

Գիտունիկ
13.11.2018, 16:21
Մեր Քյանդարյան ,,Խոռխոռունի,, Տոհմի պատմությունը :

Պապս Կարեն Ալեքսանդրովիչը պատմում էր որ մեր Քյանդարյան Տոհմը ծագել է Բիթլիսի Խոռխոռունիներից:
Եվ ազգանունը փոխվեց հետեվյալ պատճառով,արդ որ օսմանյան կայսրության ժամանակ կախաղանից ,,Քյանդարից,, փրկեց մի Հայի մի Խոռխոռունի Դյուցազուն ու դրանից հետո կոչվեցին այդ Դյուցազնի սերունդները Քյանդարներ:
Պապս պատմում է որ մի այլ Քյանդարյան էլ կար Գյումրիում Հակոբ անունով ,որը տներ էր կառուցում:
Պապուս Պապը՝ Հարություն Տեր Քյանդարյանը Էրիվանի ,,Պողոս-Պետրոս,, եկեղեցու քահանա էր ,ներկայիս ,,Կինոմոսկվայի,, տեղը:Եվ իր 16 զավակներով ապրում էր ներկայիս ,,Հանրապետության Հրապարակի,, Մետրոի տեղը :
Պապուս Հայրը Ալեքսանդրը փրկեց Արեվմտյան Հայաստանիս գաղթողներին,ինքը Կովկասյան Ցարական Բանակի Վիրաբուժ էր,որին Ստալինը աքսորեց:
Պապս ու Հայրս եվս բժիշկներ են:
Հայրս Ալեքսանդրը ծանոթացավ մորս հետ դեռ դպրոցական տարիքում շախմատի մրցաշարի ժամանակ:

Գաղթական
13.11.2018, 20:33
Պապս պատմում է որ մի այլ Քյանդարյան էլ կար Գյումրիում Հակոբ անունով ,որը տներ էր կառուցում:


Էդ Գյումրու Քյանդարյանների հետ դուք ազգակցական կապ ունեցել ե՞ք:

Ես Գյումրիում տատու պապ եմ ունեցել՝ Քյանդարով ազգանունով, որ տիկնիկային թատրոնի տնօրեննա եղել:

Գիտունիկ
13.11.2018, 21:49
Էդ Գյումրու Քյանդարյանների հետ դուք ազգակցական կապ ունեցել ե՞ք:

Ես Գյումրիում տատու պապ եմ ունեցել՝ Քյանդարով ազգանունով, որ տիկնիկային թատրոնի տնօրեննա եղել:


Հա Պապիկիս դվոյրոդնի ախպերն Գյումրու Քյանդարյաններից էր,որի ծոռի դուստրը Տաթեվ Քյանդարյանն է,

:o

:)Բարեկամս ,կարող ես դոբավիտ լինել դրուզեքումս ,չէի մտածում որ Ակումբում բարեկամ էլ կունենամ :B:hands

Գաղթական
13.11.2018, 22:06
Հա Պապիկիս դվոյրոդնի ախպերն Գյումրու Քյանդարյաններից էր,որի ծոռի դուստրը Տաթեվ Քյանդարյանն է,

:o

:)Բարեկամս ,կարող ես դոբավիտ լինել դրուզեքումս ,չէի մտածում որ Ակումբում բարեկամ էլ կունենամ :B:hands

Փաատորեն ))))
Մի քիչ էդ Խոռխոռունիների մասին կպատմե՞ս:

Գիտունիկ
14.11.2018, 15:21
Փաատորեն ))))
Մի քիչ էդ Խոռխոռունիների մասին կպատմե՞ս:

Խորխոռունիներ, Խոռխորունիներ, Խոռխորունիք, նախարարական տոհմ հին Հայաստանում։ Տոհմական «հայրենիքը» (կալվածքը) եղել է Տուրուբերան նահանգի Խորխոռունիք գավառը։ Մովսես Խորենացու մոտ պահպանված ավանդական պատմությունը Խորխոռունիների նահապետ ու անվանադիրը համարում է Հայկ Նահապետի Խոռ որդին։ Ըստ նույն պատմության, Վաղարշակ թագավորը Խորխոռունիներին հանձնարարեց Հայոց Արշակունիների թիկնազորության գործակալությունը, որը նրանք վարեցին մինչև Արշակունի արքայատան անկումը (428)։

Հետագայում Խորխոռունիների իշխանները ավանդական իրավունքով շարունակել են կրել «Հայոց մաղխազ» պատվավոր տիտղոսը։ Հայոց զորաբանակին Խորխոռունիները մասնակցել են 1000 հեծյալով։ Ըստ «Ներսեսի վարք»-ում պահպանված Գահնամակի, Խորխոռունիները ունեցել են չորս տոհմաճյուղ։ Մովսես Խորենացին Խորխոռունիներից հիշատակում է Սուրեն իշխանին, որը 380–ականի վերջին Վահան Առավեղյանի ու Աշխադար Դիմաքսյանի համագործակցությամբ հափշտակեց բյուզանդական մասի Հայոց թագավոր Արշակ Գ–ի գանձերը և անցավ պարսկական մասի Հայաստանում թագավորող Խոսրով Դ–ի տիրապետության ներքո։ Ղազար Փարպեցին վկայում է, որ Արտաշատի 449–ի ժողովում Պարսից Հազկերտ արքայի՝ հայերի դավանափոխության մասին հրովարտակի մերժողական պատասխանին Խորխոռունիներից մասնակցում էր Վրիվ մաղխազը։ Նույն պատմիչը տեղեկացնում է, որ Վարդանանց պատերազմում Գադիշո Խորխոռունին կռվել է Վասակ Սյունու, Խորեն Խորխոռունին՝ Վարդան Մամիկոնյանի կողմում։

Պարսից դեմ Խաղխաղի ճակատամարտում Խորեն Խորխոռունին գլխավորել է հայկական բանակի ձախ, իսկ Ավարայրի ճակատամարտում՝ աջ թևը։ Վերջին ճակատամարտում հերոսաբար նահատակված Խորեն Խորխոռունուն հայ եկեղեցին դասել է սրբերի շարքը։ Սեբեոսը VI դ. վերջին Խորխոռունիներից հիշատակում է Ատատ և Թեոդոս, իսկ VII դ. 1-ին կեսին՝ Վահան իշխանին։ X դ. հիշվում են Խորխոռունի իշխաններ Սարգիսը և Արտավազդը։

Գաղթական
14.11.2018, 16:21
Արա, դե մարդու բարեկամը սենց պիտի լինի էլի, որ քեզ ոտի վրա իշխանական տոհմի շառավիղ հռչակի )))
You made my day!

Իսկ հեչ ուսումնասիրել ե՞ք, ինչ-որ փաստաթղթեր, հիշատակումներ, մատյաններ և այլն կա՞ն՝ Խոռխոռունի իշխանական տոհմի ու Բիթլիսի Քյանդարյանների կապը հաստատող:

Գիտունիկ
14.11.2018, 20:16
Արա, դե մարդու բարեկամը սենց պիտի լինի էլի, որ քեզ ոտի վրա իշխանական տոհմի շառավիղ հռչակի )))
You made my day!

Իսկ հեչ ուսումնասիրել ե՞ք, ինչ-որ փաստաթղթեր, հիշատակումներ, մատյաններ և այլն կա՞ն՝ Խոռխոռունի իշխանական տոհմի ու Բիթլիսի Քյանդարյանների կապը հաստատող:

փաստաթուղթ չկար,բայց կար մի հոդված պապիկիս մոտ,տվեց ինձ ,ես էլ չպահպանեցի ԱփՍՈՍ,այն էլ երկու անգամ տվեց,եսիմ ուրա

Գիտունիկ
14.11.2018, 20:27
Մեր Քյանդարյան ,,Խոռխոռունի,, Տոհմի պատմությունը :

Պապս Կարեն Ալեքսանդրովիչը պատմում էր որ մեր Քյանդարյան Տոհմը ծագել է Բիթլիսի Խոռխոռունիներից:
Եվ ազգանունը փոխվեց հետեվյալ պատճառով,արդ որ օսմանյան կայսրության ժամանակ կախաղանից ,,Քյանդարից,, փրկեց մի Հայի մի Խոռխոռունի Դյուցազուն ու դրանից հետո կոչվեցին այդ Դյուցազնի սերունդները Քյանդարներ:
Պապս պատմում է որ մի այլ Քյանդարյան էլ կար Գյումրիում Հակոբ անունով ,որը տներ էր կառուցում:
Պապուս Պապը՝ Հարություն Տեր Քյանդարյանը Էրիվանի ,,Պողոս-Պետրոս,, եկեղեցու քահանա էր ,ներկայիս ,,Կինոմոսկվայի,, տեղը:Եվ իր 16 զավակներով ապրում էր ներկայիս ,,Հանրապետության Հրապարակի,, Մետրոի տեղը :
Պապուս Հայրը Ալեքսանդրը փրկեց Արեվմտյան Հայաստանիս գաղթողներին,ինքը Կովկասյան Ցարական Բանակի Վիրաբուժ էր,որին Ստալինը աքսորեց:
Պապս ու Հայրս եվս բժիշկներ են:
Հայրս Ալեքսանդրը ծանոթացավ մորս հետ դեռ դպրոցական տարիքում շախմատի մրցաշարի ժամանակ:

Պապս ու Հայրս մահացան 2013 թվականին

Գիտունիկ
14.11.2018, 20:28
փաստաթուղթ չկար,բայց կար մի հոդված պապիկիս մոտ,տվեց ինձ ,ես էլ չպահպանեցի ԱփՍՈՍ,այն էլ երկու անգամ տվեց,եսիմ ուրա

Բայց դա հնարավորա ԴՆթ անալիզով պարզել արդյոք ՞ մենք կապ ունենք խոռխոռունի տոհմի հետ

Գաղթական
14.11.2018, 22:28
փաստաթուղթ չկար,բայց կար մի հոդված պապիկիս մոտ,տվեց ինձ ,ես էլ չպահպանեցի ԱփՍՈՍ,այն էլ երկու անգամ տվեց,եսիմ ուրա

Ողորմածիկ Խաչվանքյանին հիշեցի՝ Տաքսի-Տաքսիից )))

Դե լավ, կորցրել-կորցրել ես..
Պապուդ էլ ողորմի, դոկտոր-պրոֆեսոր գիտնական մարդա եղել: Իր բանավոր խոսքն էլ պակաս հիմք չի:

Գիտունիկ
14.11.2018, 23:14
Ողորմածիկ Խաչվանքյանին հիշեցի՝ Տաքսի-Տաքսիից )))

Դե լավ, կորցրել-կորցրել ես..
Պապուդ էլ ողորմի, դոկտոր-պրոֆեսոր գիտնական մարդա եղել: Իր բանավոր խոսքն էլ պակաս հիմք չի:

շնորհակալություն,լավ մնացեք:):B