PDA

Դիտել ողջ տարբերակը : ԱԿՈՒՄԲ Բողոքարկման համակարգ, թափանցիկ մոդերավորում



Chuk
01.09.2012, 23:34
Սիրելի՛ ակումբցիներ,
Ինչպես նշել էի «Առաջարկներ» թեման փակելիս (ww.akumb.am/showthread.php/41-Առաջարկներ?p=2357621&viewfull=1#post2357621), ակումբում կա գլոբալ փոփոխություններ անելու անհրաժեշտությունը: Այս միտքը մի օրում չի առաջացել, բավական ժամանակ մտածել եմ, թե ինչն է սխալ, ինչն է, որ մարդկանց վանում է, ինչն է, որ մարդկանց չի գրավում և այլն: Խնդիրներն իրականում շատ են ու կան շատ գլոբալ խնդիրներ: Խնդիրները ոչ միայն շատ են, այլև չափազանց տարբեր են: Կփորձեմ առանձին թեմաներով անդրադառնալ տարբեր խնդիրներին:

Մինչ ընդհանուր քննարկման ներկայացնելը հարցերը քննարկվել են նաև ղեկավար կազմում: Պետք է ասեմ, որ իմ կարծիքով արդյունավետ քննարկում է եղել, շատ խնդիրներ ենք նկատել ու լուծման ճանապարհներ ուրվագծել: Բայց լուծումների մեծ մասը չեմ ուզում իրագործել, առանց ընդհանուր քննարկման դնելու: Որովհետև բացառված չի, որ կլինեն ավելի լավ լուծումներ, բացառված չի, որ մեր գտած լուծումը հիմնավորվի, որ լավը չի: Ավելին, խնդիրներ կլինեն, որոնք գրելիս չեմ շարադրի մեր գտած լուծումը, որպեսզի հենց սկզբից քննարկումն այդ ուղղությամբ չշեղվի ու չսահմանափակվի:


Խնդիրներից մեկը վստահության հարցն է: Չեմ ուզում ջայլամային քաղաքականություն վարել ու չնկատել, որ ամեն դեպքում ղեկավար կազմի շատ գործողություններ միանշանակ չեն ընդունվում, որ ամեն դեպքում կան անհամաձայնություններ, որ շատ դեպքերում ինչքան էլ որ հիմնավորում ենք կամ պնդում ենք մեր քայլերի ճշմարտությունը, շատերը կամ ոմանք չեն համաձայնվում մեր հետ: Շատ դեպքերում էլ մարդիկ պարզապես չեն նկատում (կամ նույնիսկ չեն իմանում), որ մենք մեր սխալները շտկել ենք, համաձայնվել ենք բողոքողի հետ, չեղարկել ենք գործողությունը: Ու այդ պարագայում նույնիսկ էական չի դառնում, ամեն դեպքում մե՞նք ենք սխալ, թե՞ հակառակ կողմը, դիմացի՞նն է սխալվում իր եզրակացություններում, թե՞ ոչ: Որովհետև եթե կա անհամաձայնություն, եթե կա անվստահություն, դա անպայմանորեն բերում է վատ հետևանքներ, դա անպայմանորեն որոշակիորեն հիասթափեցնում է, դա անպայմանորեն ազդում է ընդհանուր մթնոլորտի վրա, որոշ դեպքերում բերում է մարդկանց հեռացումների ակումբին, որոշ դեպքերում բերում է թեմաներին ու քննարկումներին լուրջ չվերաբերվելու և այլ վատ հետևանքների:

Հիմա չեմ ուզում քննարկել, թե ում է ավելի շատ շահեկան, որ նման վերաբերմունք չլինի ակումբի նկատմամբ: Չեմ ուզում, որովհետև իրականում դա շահեկան չէ որևէ մեկին, բացի գուցե այն մարդկանցից, ովքեր կուզեին, որ ակումբն ուղղակի չլիներ: Ես չեմ ուզում, որ ակումբում նման կարծիք լինի: Դա չի ուզում ձեզնից որևէ մեկը: Ես ուզում եմ, որ ակումբում բոլորն իրենց զգան հավասար իրավունքներով: Ձեզնից ամեն մեկն էլ է ուզում, որ իր իրավունքները լինեն ճիշտ նույնպիսին, ինչպիսին ուրիշներինն է:


Ուրեմն առաջանում է հարց: Ինչպե՞ս անել, որ մոդերավորումը լինի առավել թափանցիկ: Ինչպե՞ս անել, որ եթե ինչ-որ մեկը անհամաձայնություն ունի մոդերատորի որոշման հետ կապված, կարողանա այդ հարցը բարձրացնել ու արդյունքում, եթե որոշումը չփոխվի, ամեն դեպքում այդ մարդը իմանա, որ որոշումն այնքան էլ սուբյեկտիվ չի եղել, արդարացի է եղել: Ու որ եթե ամեն դեպքում որոշումը սխալ եղած լինի, արդարացի չլինի, այն փոխվի:

Ինչպես ասեցի, մենք մեր լուծում(ներ)ն ունենք: Բայց առայժմ ավելի հետաքրքիր է լսել ձեր կարծիքներն ու առաջարկները: 5 օր անց ես կսկսեմ ամփոփել ու որոշում կկայացնեմ: Ավելի հավանական է, որ հարցը կդրվի քվեարկության: Եթե կառաջարկվի մեկ մեխանիզմ, այդ ամենն անելու, ապա հավանաբար կլինի քվեարկություն «կողմ-դեմ-ձեռնպահ» համակարգով, եթե կլինեն մի քանի մեխանիզմներ, ապա կառաջարկվի ընտրել դրանցից մեկը: Գուցե իրարից տարբեր մեխանիզմներ առաջարկվեն, որոնք կարող են գոյություն ունենալ միաժամանակ, ու առաջարկվեն այլ տիպի քվեարկություն կամ քվեարկություններ, այլ կերպ ասած ժամանակից առաջ չընկնեմ ու առայժմ պարզապես քննարկենք:

Lion
01.09.2012, 23:52
Շատ հետաքրքիր է և հատկապես ողջունելի, որ Ակումբի ղեկավարությունը նման մոտեցում է դրսևորում: Վաղուց էր զգացվում, որ. "մի բան այն չէ Դանիական թագավորությունում" և ուրախալի է, որ ի վերջո կա փոփոխություններ կատարելու անհրաժեշտության գիտակցում: Այս ամենի մասին դեռ իհարկե կմտածենք և ես էլ այս թեման չեմ մոռանա, համակարգային լուծումները, եթե լինեն, թողնելով հետոին, իսկ առայժմ ասեմ մի քանի մանրուքների մասին, կարծիք մի մարդու, որը բավականին հարուստ ֆորումային փորձ ունի.

1. Անհրաժեշտ է հստակորեն ձևակերպել բողոքարկման արդյունքում ընդունված որոշումը և հասանելի դարձնել այն և բողոքողին, և բոլոր նրանց, ում կհետաքրքրի: Օրինակ, լինում են դեպքեր, երբ Х-ին վիրավորել է Z-ը և Ակումբի ղեկավարությունը, գտնելով արդարացի առաջինի բողոքը, պատժում է երկրորդին: Սա լավ է, նույնիսկ վիրավորական գրառումն է հեռացվում, բայց... Х-ը, բացառությամբ արգելափակման դեպքերի, չի իմանում, թե իրեն վիրավորողին ինչով և ինչպես են պատժել և մնում է չբավարարվածության, անարդարության զգացում - առաջարկվում է հստակորեն տեղեկացնել պատժիչ գործողությունների մասին,
2. Անհրաժեշտ է առավել ուշադիր լինել "Բողոքի գիրք" թեմային - սեփական փորձով ասում եմ, որ այդպիսի թեմա ունենալը անհրաժեշտ է ցանկացած ֆորումի համար, բայց ոչ պակաս կարևոր է դրան ուշադիր լինել,
3. Որպես ոչ ուղղակի բողոքարկման համակարգի հետ կապված առաջարկ, բայց որպես մի առաջարկ, որը բավականին կառողջացնի ֆորումային միջավայրը - անհրաժեշտ է վերջ տալ թաքնված ծաղրանքներ ու խայթոցներ պարունակող գրառումներին, որոնք որպես կանոն հասցնում են իրադրության շիկացման և վեճի: Մասնավորապես, հավերժ վեճը Պատմության բաժնում, որը սակայն... ոչ մի կապ չունի գիտության հետ և ընդամեն իրենից ներկայացնում է անձնական չբավարարված ամբիցիաների կամ էլ առանձին կամրադների նեղսրտվածության արդյունք: Անհրաժեշտ է հստակ կերպով վերջ տալ շփման նման ոճին, քանի որ երբեմն տպավորություն է ստեղծվում


Հիմա չեմ ուզում քննարկել, թե ում է ավելի շատ շահեկան, որ նման վերաբերմունք չլինի ակումբի նկատմամբ: Չեմ ուզում, որովհետև իրականում դա շահեկան չէ որևէ մեկին, բացի գուցե այն մարդկանցից, ովքեր կուզեին, որ ակումբն ուղղակի չլիներ:

Որ որոշ մարդիկ համառորեն ուզում են արժեզրկել Ակումբը և այն վերածել աղբանոցի: Համենայն դեպս մի բան պարզ է, որ Պատմություն բաժնում աղբանոցը հաջողությամբ արդեն ստեղծված է և ոչ մի նշան չկա առ այն, որ այն կվերացվի: Սեփական արժանապատվությունը չհարգող մարդը միայն կարող է նստած համակարգչի էկրանի առաջ, խայթել դիմացինին, բայց նման վերաբերմունք անհարգալից է նաև Ակումբի Պատմություն բաժնի նկատմամբ, քանի որ.

- բաժինը վերածվում է աղբանոցի,
- որևէ մեկը խուսափում է որևէ կարծիք հայտնել, անիմաստ ու անտեղի վեճի մեջ չքաշվելու համար,
- օգտակար քննարկման տոկոսը ընկնում է և ամեն ինչ վերածվում է, կրկին, բազառի:

Chuk
02.09.2012, 00:02
3. Որպես ոչ ուղղակի բողոքարկման
...
օգտակար քննարկման տոկոսը ընկնում է և ամեն ինչ վերածվում է, կրկին, բազառի:
Քանի որ այս կետն իրականում որևէ առնչություն չունի առաջարկված թեմայի հետ և հղի է օգտակար քննարկման տոկոսը գցելու, ամեն ինչը կրկին «բազառի» վերածելու վտանգով, պահանջում եմ, որպեսզի այս հատվածին արձագանքներ չլինեն: Ցանկացած արձագանք առանց զգուշացման ջնջելու եմ:

Նաև հավելեմ, որ դեռևս թեմա է բացվելու քննարկման կուլտուրայի, ինչպես նաև տեղադրման ենթակա նյութերի թույլատրելիության հարցերի մասին: Այդ թեմայում կփորձեմ կազմակերպել հանդուրժողականության մթնոլորտ ու կկարողանանք քննարկել մի շարք հարցեր, ինչպես որոշակի հեգնանքների թույլատրելիության մասով, այնպես էլ աբսուրդային գրառումների առկայության հետ կապված, որոնք երբեմն հարկադրում են պատասխանել հատկապես հեգնանքային տարբերակով:

Freeman
02.09.2012, 00:05
Չուկ, լավ, բայց դժվար իրագործելի բան ես մտածել, համոզված ե՞ս, որ թափանցիկ մոդելավորման դեպքում էդ քննարկումը հնարավոր ա վերահսկել, որ բազար չդառնա :think

Lion
02.09.2012, 00:07
Ահա և մի միտք - առանձին դեպքերում, երբ կողմերի փաստարկներն առ այն, թե. "ով է ճիշտ, ով` սխալ", կարելի է առանձին թեմա բացել միայն շահագրգիռ կողմերի համար, յուրօրինակ մի դատավարություն կազմակերպել, որտեղ կողմերից յուրաքանչյուրը կտեղադրի իր փաստարկները: Օրինակ, եթե մի հարցի վերաբերյալ վեճ է ծագել և կողմերը պնդում են, թե դիմացինը առաջինն է վիրավորել, անհրաժեշտ է բացել թեմա զուտ այդ երկուսի մասին և որոշակի սահմանված ժամանակում թույլ տալ նրանց. "ապացուցել իրենց ճիշտը": Սա բաց դատավարության մի տեսակ կլինի, որի վերջում կընդունվի որոշում, թեման կփակվի և կհեռացվի ֆորումից կամ կգնա արխիվ:

Vaio
02.09.2012, 00:08
Խնդիրներից մեկը վստահության հարցն է: Չեմ ուզում ջայլամային քաղաքականություն վարել ու չնկատել, որ ամեն դեպքում ղեկավար կազմի շատ գործողություններ միանշանակ չեն ընդունվում, որ ամեն դեպքում կան անհամաձայնություններ, որ շատ դեպքերում ինչքան էլ որ հիմնավորում ենք կամ պնդում ենք մեր քայլերի ճշմարտությունը, շատերը կամ ոմանք չեն համաձայնվում մեր հետ:
Ուրեմն առաջանում է հարց:
Ինչպե՞ս անել, որ մոդերավորումը լինի առավել թափանցիկ:

Հարգելի ադմինիստրատոր:
Ելնելով վերոգրյալից, այսինքն` հիմնվելով Ձեր խոսքերի վրա` կարող եմ լավ խորհուրդ տալ. պետք է կադրային փոփոխություն կատարել, այսինքն` պետք է մոդերատորներին փոխել, պարտադիր չէ 100%-ին, իսկ թե կոնկրետ որ մոդերատորներն են ենթակա "աշխատանքից հեռացման", կարծում եմ, դուք ամենալավը պետք է իմանաք, քանի որ գիտեք իրենց բոլոր օբյեկտիվ և սուբյեկտիվ մոդերացիաները: Կադրային փոփոխությունը կբերի ֆորումի վարկանիշի բարձրացմանը` user-ների և ապագա user-ների շրջանում: Ձեզ չպետք է խանգարի ընկերական հարաբերությունները "ապագայում պաշտոնաթող լինող" մոդերատորների հետ, քանի որ սայթը ձեր սեփականությունն է և դուք առաջին հերթին պետք է պաշտպանեք Ձեր շահերը:


Ինչպե՞ս անել, որ եթե ինչ-որ մեկը անհամաձայնություն ունի մոդերատորի որոշման հետ կապված, կարողանա այդ հարցը բարձրացնել ու արդյունքում, եթե որոշումը չփոխվի, ամեն դեպքում այդ մարդը իմանա, որ որոշումն այնքան էլ սուբյեկտիվ չի եղել, արդարացի է եղել:

Իմ կարծիքով, եթե ԻՍԿԱՊԵՍ օբյեկտիվ որոշում կայացվի ադմինիստրացիայի կողմից, քիչ հավանական է, որ user-ը սուբյեկտիվ կհամարի որոշումը` բացառությամբ այն դեպքերի, երբ տվյալ երևույթի, արտահայտության, պահվածքի վերաբերյալ կարելի լինի երկակի մեկնաբանություն տալ:


Եթե կառաջարկվի մեկ մեխանիզմ, այդ ամենն անելու, ապա հավանաբար կլինի քվեարկություն «կողմ-դեմ-ձեռնպահ» համակարգով, եթե կլինեն մի քանի մեխանիզմներ, ապա կառաջարկվի ընտրել դրանցից մեկը:

Ձեռնպահ պետք չէ:

Հ.Գ. Կարոևր բան: 6 տարի է այս սայթը կա, բայց այս սայթի ռասկռուտկան շատ վատ է արված, 6 տարին չափազանց մեծ թիվա սայթի համար` վերջինս գոնե երկրի մակարդակով ճանաչեցնելու համար: Ու սրա պատճառներից մեկը "քաղաքականություն" բաժիննա եղել, քանի որ Լևոնականներով ճնշել եք այլ քաղաքական գործիչների համակիրներին, ինչի արդյունքում մի մասն արգելափակվել է, մյուսն` ինքնակամ լքել ակումբը, մեկ այլ զանգվածը` զզվելուց այլևս գրառում չի ուզում կատարել այդտեղ և այլն...

Chuk
02.09.2012, 00:09
Չուկ, լավ, բայց դժվար իրագործելի բան ես մտածել, համոզված ե՞ս, որ թափանցիկ մոդելավորման դեպքում էդ քննարկումը հնարավոր ա վերահսկել, որ բազար չդառնա :think

Թափանցիկ մոդերավորում ասելով ի՞նչ նկատի ունես: Ես որևէ փակագիծ չեմ բացել, հետևաբար իմ պատկերացրած մոդելը կդառնա բազարի բուն, թե ոչ, չգիտեմ, թե ինչպես կարելի էր պատկերացնել: Այ դու ասա, թե ինչ նկատի ունես թափանցիկ մոդերավորում ասելով: Կարող է քննարկման սկիզբ դառնա քո պատկերացրածը :)

Chuk
02.09.2012, 00:20
Ելնելով վերոգրյալից, այսինքն` հիմնվելով Ձեր խոսքերի վրա` կարող եմ լավ խորհուրդ տալ. պետք է կադրային փոփոխություն կատարել, այսինքն` պետք է մոդերատորներին փոխել, պարտադիր չէ 100%-ին, իսկ թե կոնկրետ որ մոդերատորներն են ենթակա "աշխատանքից հեռացման", կարծում եմ, դուք ամենալավը պետք է իմանաք, քանի որ գիտեք իրենց բոլոր օբյեկտիվ և սուբյեկտիվ մոդերացիաները: Կադրային փոփոխությունը կբերի ֆորումի վարկանիշի բարձրացմանը` user-ների և ապագա user-ների շրջանում: Ձեզ չպետք է խանգարի ընկերական հարաբերությունները "ապագայում պաշտոնաթող լինող" մոդերատորների հետ, քանի որ սայթը ձեր սեփականությունն է և դուք առաջին հերթին պետք է պաշտպանեք Ձեր շահերը:
Կադրային փոփոխության կարիք ես այս պահին տեսնում եմ միայն մի տեսանկյունից. կան մոդերատորներ, ովքեր ներկայումս ակտիվ չեն ու պետք է նրանց հանել, ու կա մեծ քանակով նոր մոդերատորների կարիք: Անկեղծ եմ ասում, ես չեմ տեսնում որևէ մոդերատոր ենթակա է հեռացման իր սուբյեկտիվ մոդերավորման պատճառով: Գուցե և ինքս էլ եմ սխալվում, սուբյեկտիվ եմ, հնարավոր է: Բայց ես այդ կարծիքին եմ, որովհետև իմ աչքի առաջ է (ի տարբերություն ձեզ) մոդերատորներից յուրաքանչյուրի գործունեությունը, և ես շատ ավելի լավ հնարավորություն ունեմ գնահատելու իրենց օբյեկտիվության ու սուբյեկտիվության պահը: Գիտեմ որ չեք հավատա, սակայն ամեն դեպքում նշեմ, վստահեցնեմ, որ այդ հարաբերությունների վրա իմ ընկերական հարաբերությունները որևէ առնչություն չունեն: Ինձ ավելի լավ ճանաչողներն ու իմ գործունեությունն ավելի ուշադիր հետևողները գիտեն, որ ես երբեմն նույնիսկ հակառակ կողմից եմ չափը անցել, ցավոք, հաշվի չառնելով ընկերությունը չափազանց խիստ վերաբերվելով այս կամ այն ընկերոջ ակումբային վարքին, այդ թվում եթե տվյալ անձը մոդերատոր է եղել: Սակայն, ինչպես ասացի վերևում, դա հաճախ տեսանելի չէ սովորական օգտագործողին:

Ինչևէ: Ինչպես հասկացվեց, նման հարցերը նույնպես սուբյեկտիվ ընկալման խնդիր են ու ես ինքս կարող եմ սխալ եզրահանգման գալ: Ուրեմն առաջարկում եմ քննարկել նաև այս հարցը, մասնավորապես գուցե պետք է մշակել մեխանիզմ, որ մասնակիցը կարողանա անվստահություն հայտնել մոդերատորին, ու մեխանիզմ, թե ինչպես պետք է քննվի այդ անվստահության հարցը: Գուցե պետք է ուղիղ կապի մեջ դնել սխալ մոդերատորական գործողություններ անելու քանակի հետ, ենթադրենք չեղարկված տուգանայինների քանակի հետ և այլն: Բաց եմ նման տիպի կառուցողական առաջարկներ լսելու: Նման մեխանիզմներ մտցնելն ուղղակիորեն կնպաստի մոդերատորներիս առավել աչալուրջ լինելուն:

Chuk
02.09.2012, 00:23
Մոդերատորական. թեմային չառնչվող մի քանի գրառում ջնջվել է: Հիշեցնեմ, որ թեման ոչ թե եղած քննարկումները, հաղորդակցման ձևը, նախկինում կատարված ինչ-որ բաներն են, այլ բողոքարկման համակարգի ու թափանցիկ մոդերավորման ՄԵԽԱՆԻԶՄՆԵՐԻ քննարկումը:

Vaio
02.09.2012, 00:25
Եթե պետք լինի, կարող եմ նաև գրել, թե որ մոդերատորների` "աշխատանքից ազատումը", իմ կարծիքով, ճիշտ կլինի:

Chuk
02.09.2012, 00:33
Եթե պետք լինի, կարող եմ նաև գրել, թե որ մոդերատորների` "աշխատանքից ազատումը", իմ կարծիքով, ճիշտ կլինի:

Ոչ, պետք չի: Որովհետև այստեղ քննարկում ենք թափանցիկ մոդերավորման ու բողոքարկման համակարգի մեխանիզմները, ոչ թե այս կամ այն մոդերատորական գործողության, այս կամ այն մոդերատորի գործունեության հարցը: Ես հասկանում եմ ցանկությունը կուտակված արտահայտելու, սակայն կոչ եմ անում մնալ քննարկման սահմանում: Մեխանիզմների ստեղծումն այն ճանապարհն է, որը թույլ կտա այս պահին քեզ հուզող խնդիրը լուծել ոչ թե քո կամ իմ սուբյեկտիվ պատկերացմամբ, այլ հստակ մեխանիզմով:

Vaio
02.09.2012, 00:54
Ոչ, պետք չի: Որովհետև այստեղ քննարկում ենք թափանցիկ մոդերավորման ու բողոքարկման համակարգի մեխանիզմները, ոչ թե այս կամ այն մոդերատորական գործողության, այս կամ այն մոդերատորի գործունեության հարցը: Ես հասկանում եմ ցանկությունը կուտակված արտահայտելու, սակայն կոչ եմ անում մնալ քննարկման սահմանում: Մեխանիզմների ստեղծումն այն ճանապարհն է, որը թույլ կտա այս պահին քեզ հուզող խնդիրը լուծել ոչ թե քո կամ իմ սուբյեկտիվ պատկերացմամբ, այլ հստակ մեխանիզմով:

))))))))))))

Ոնց կուզեք:
Դու հարց էիր տվել` ինչպե՞ս անել, որ մոդերավորումը լինի առավել թափանցիկ, ես էլ պատասխանեցի` պետք է կադրային փոփոխություն կատարել, այսինքն` պետք է մոդերատորներին փոխել:
Այսքանը: :)

dvgray
02.09.2012, 01:02
))))))))))))

Ոնց կուզեք:
Դու հարց էիր տվել` ինչպե՞ս անել, որ մոդերավորումը լինի առավել թափանցիկ, ես էլ պատասխանեցի` պետք է կադրային փոփոխություն կատարել, այսինքն` պետք է մոդերատորներին փոխել:
Այսքանը: :)

դեռ ժամանակին Լենինն է ասել "կադրի ռեշայուտ վսյո ;)" իսկ Լենինը հիմար "ադմինիստրատոր" չէր... ;)

dvgray
02.09.2012, 01:09
շատ օգտակար կլիներ փոխել գրառում ջնջելու կամ զգուշացում տալու տոնայնությունը - խիստ ձյաձայական-խրատական... շատ անգամ ձեռառնոցի տոնայնություններից անցնել ընդանրապես նորմալ մարդկային ընկերական տոների...
հետո, կա իմ կարծիքով սխալ պատկերացում, որ մոդեռատոր է դառնում որևէ թեմայով ակտիվորեն հետաքրքիրվող ու իերն քչից-շատից նորմալ պահող անդամը: կարծում եմ թեմայով հետաքրքրվելը ընդանրապես կապ չունի Վիճելի հարցերի կարգավորման հետ: ու ընդանրապես հակառակը, ինչքան մարդ էիչ է տեղյակ թեմայից ու պասիվ է, էնքան ավելի շատ օբեկտիվ լինելու շանսեր ունի:

Freeman
02.09.2012, 01:55
Թափանցիկ մոդերավորում ասելով ի՞նչ նկատի ունես: Ես որևէ փակագիծ չեմ բացել, հետևաբար իմ պատկերացրած մոդելը կդառնա բազարի բուն, թե ոչ, չգիտեմ, թե ինչպես կարելի էր պատկերացնել: Այ դու ասա, թե ինչ նկատի ունես թափանցիկ մոդերավորում ասելով: Կարող է քննարկման սկիզբ դառնա քո պատկերացրածը :)

Երբ առանձին բաժնում ներկայացվում են տուգանքներն ու դրանց պատճառները, դրվում քննարկման ու ոչ մոդերատորների հետ տույժը որոշվում ա :)

Վիշապ
02.09.2012, 11:10
dvgray-ի հետ համաձայն եմ։ Որոշ դեպքերում «մոդերատորական» գրելիս և թեման փակելիս հումորային ինչ–որ բան է գրվում, ինչը կարծում եմ կարող է վիրավորել թեման բացողին, կամ ասենք թեմայում այնպիսի գրառումներ անողին, որոնց պատճառով էլ ստիպված փակվում է թեման։
Այսինքն, ինձ թվում է, որ խախտողին կարելի է պատժել, ասենք` թեման փակել, կամ գրառումները ջնջել, բայց` առանց նրան (խախտողին) գրավոր համարժեք պատասխանելու։
Այսինքն` պահպանելով խախտողի նկատմամբ հարգանքը, որպեսզի խախտում անողը իրեն զգա միայն խախտում անող և ոչ թե անարգված մարդ։ Հասկանում եմ, որ որոշ դեպքերում շատ դժվար է ղժժալը զսպելը, բայց կարծում եմ, պետք է զսպել։
Նաև կարևոր է խախտում անողին զգուշացնել խախտման վերաբերյալ այնպես, որ նրա մոտ լրացուցիչ հարցեր հնարավորինս չառաջանան, կարևոր է խախտումը հիմնավոր ներկայացնելը, և կարևոր է, որ պատիժը համաչափ լինի խախտմանը։
Մյուս կողմից էլ հասկանալի է, որ մոդերատորությունը ոչ միայն էներգիա ու ժամանակ է պահանջում, այլ ինչ–ինչ հոգեբանական կարողություններ, սառնասրտություն, ամուր ներվեր, հետո միևնույն է, ոչ ոք չի գնահատում, լավ մոդերատորություն անելուց հետո պարգևատրում կամ աշխատավարձի բարձրացում չկա, ուստի քննչական ու դատավարական գերհմտություններ Ակումբի մոդերատորներից պահանջելը էդքան էլ ազնիվ չի։
Ես ինքս շատ անգամներ «մոդերավորվել» եմ, երբ ագրեսիվ գրառումներ էի անում, իմ շատ սուբյեկтիվ կարծիքով որոշ դեպքերում գուցե մոդերատորի գործողությունները այդքան էլ «իրավաչափ» չէին, բայց դե թեթև եմ տարել, որովհետև իմ կարծիքով թեկուզ «ոչ այնքան իրավաչափ» մոդերատորության մակարդակը Ակումբ.ամ–ում բավականին բարձր էր, և` է այլ կայքերում եղած մակարդակից։
Հետևաբար մոդերատորների կողմից միայն հավասարաչափ հարգալից դրսևորումները բոլոր անդամների նկամամբ, անկախ անդամների ինտելեկտի մակարդակից, գրավոր խոսքի գրագիտության աստիճանից, հայացքներից, մոդերատորին ծանոթ–անծանոթ լինելուց և այլնից կարծում եմ բավարար կլինի կայքի վարկանիշը բարձր պահելու համար։ Այն, որ որոշ անդամներ, մոդերատորների գործողություններում խտրականություն են նկատում, դրա վրա կարելի է աշխատել։

Անչափ շնորհակալություն եմ հայտնում կայքի բոլոր մոդերատորներին և քեզ` Չուկ։ Կարծում եմ, գերազանց աշխատանք է։ Keep up the good work!

Ձայնալար
02.09.2012, 12:09
Ճիշտ ա թեման բացվել է հիմնականում «ոչ ադմինիստրատիվ» մասնակիցների կարծիքները լսելու համար, բայց կարծում եմ չի խանգարի նաև մոդերատորի տեսանկյունից նայել հարցերին, այդ իսկ պատճառով որոշեցի մի քանի բան գրել այս թեմայում:

Կարծում եմ կարելի ա փորձել բացել տուգանայինների թեման read only տարբերակով՝ այսինը բոլոր մասնակիցները կարողանան տեսնել բոլորի ստացած տուգանայինները:

Սրա դրական կողմերը՝
1. որ մարդկանց չթվա, թե մենակ իրանք են տուգանային ստանում
2. մոդերատորներիս ստիպի ավելի հիմնավոր ու համարժեք տուգանաիններ տալ

Բացասական կողմերը՝

1. Գաղտնիության չպահպանում՝ այսինքը հնարավոր է տվյալ մասնակիցը չի ուզում որ բոլորն իմանան նրա կատարած խախտման մասին: Ասեմ, որ եղել են դեպքեր, երբ մասնակիցները վիրավորվել են թեմայում գրված մոդերատորականից և կարծիք են հայտնել, որ ավելի լավ կլիներ դա անել տուգանայի տեսքով, կամ նամակով:

2. Կոնֆլիկտային իրավիճակներում կարող է կրակի վրա յուղ լցնելու էֆեկտ առաջանալ՝ մի բան է, երբ կոնֆլիկտային գրառումը րոպե առաջ ջնջվում է, մեկ այլ բան, երբ դա դրվում է ի ցույց ամբողջ աշխարհի: Կարող է բերել կոնֆլիկտի շարունակման՝ թեկուզ ֆորումից դուրս, ինչից հնարավոր կլիներ խուսափել, պարզապես գրառումը ջնջելու դեպքում:

Դատական-մատական քննարկումներին միանշանակ դեմ եմ, քանի որ կարծում եմ, որ դա հսկայական լրացուցիչ էներգիա ու ժամանակ կխլի մոդերատորից: Շատ ժամանակ զբաղվածության պատճառով չենք կարողանում նունիսկ մոդերավորել ուր մնաց թե հետո էլ ինչ-որ թեմայում երկար բարակ բանավեճի մեջ մտնենք ապացուցելու համար մեր իրավացիությունը:

Rammstein
02.09.2012, 15:23
Կարծում եմ կարելի ա փորձել բացել տուգանայինների թեման read only տարբերակով՝ այսինը բոլոր մասնակիցները կարողանան տեսնել բոլորի ստացած տուգանայինները:

Իմ կարծիքով չարժի հենց քո նշած բացասական կողմերի պատճառով:

Ես նման բան ռուսական ֆորումներում եմ հանդիպել` որ խախտում անողներին հրապարակային զգուշացումներ են անում, գրառման տուգանված լինելը բոլորին երեւում ա, ու վատ տպավորություն եմ ստացել: Ոնց որ սովետից էկած պատժելու մեթոդներից լինի:


Բացի էդ` եթե օրինակ վիրավորական գրառում ա տուգանվել, ջնջվել, մի քիչ կոռեկտ չի դրա պատճենը տուգանայինի թեմայում բոլորի աչքի առաջ թողնելը:

Ուլուանա
02.09.2012, 17:15
Իսկ միգուցե հնարավոր է ինչ–որ միջանկյալ տարբերակ ունենալ, այսինքն՝ էնպես անել, որ յուրաքանչյուր անդամի տուգանայինները բոլորի համար հնարավոր լինի տեսնել նրա անձնագրում, ոչ թե հանդիսավոր թեմայի տեսքով, երբ կամա–ակամա բոլորի աչքը կմտնի որպես նոր գրառում, այսինքն՝ էդպես հրապարակայնությունը զգալիորեն կնվազի, բայց անհրաժեշտության դեպքում ցանկացողները կկարողանան տեսնել, թե ինչն ինչոց է։

Նետ
02.09.2012, 17:19
Առաջարկում եմ ստեղծել ամենասովորական դատական համակարգ, ինչը որ կա պետական համակարգերում:«Ակումբն» էլ իր հերդին մի ուրույն «պետություն» է: Ու հեչ պետք չի որ ասենք Ճանապարհատրանսպորտային պատահարի վերաբերյալ բողոքը լուծի երկրի նախագահը:

Lion
02.09.2012, 17:31
Դատական-մատական քննարկումներին միանշանակ դեմ եմ, քանի որ կարծում եմ, որ դա հսկայական լրացուցիչ էներգիա ու ժամանակ կխլի մոդերատորից: Շատ ժամանակ զբաղվածության պատճառով չենք կարողանում նունիսկ մոդերավորել ուր մնաց թե հետո էլ ինչ-որ թեմայում երկար բարակ բանավեճի մեջ մտնենք ապացուցելու համար մեր իրավացիությունը:

Բացասական պահը հասկանալի է, բայց զատո արդարությունը կհաղթանակի ավելի մեծ հավականությամբ: Ու հետո - նման բան կարելի է անել միայն ակնհայտ կոպիտ կամ մասշտաբային կոնֆլիկտային դեպքերում:

Ձայնալար
02.09.2012, 17:52
Ուհու, միհատ էլ դատարան ստեղծենք որ որոշի, թե որ դեպքն ա ակնհայտ մասշտաբային կոնֆլիկտային :))

Դատարանի տարբերակը կաշխատի, եթե մոդերատորները լինեն ոչ թե ֆորումին օգնել ցանկացող կամավորներ, այլ վարձատրվող մարդիկ, ովքեր օրվա մեծ մասը պատրաստ են տրամադրել դրան: Անձամբ ես հաստատ չեմ համաձայնի երկար բարակ փաստարկների վրա ժամանակ ծախսել: Ես իմ օրինակով եմ ասում, բայց գիտեմ, որ բոլորս էլ զբաղված մարդիկ ենք՝ Չուկից սկսած: Ու թող չթվա, թե պատրաստ չեմ իմ տեսակետը պաշտպանել, կամ վախենում եմ դատարանում «տանուլ տալ» :))

Peace
02.09.2012, 18:35
Տարբերակների մեջ ամենաշխատունակն ու հանդարտեցնողը, որը ես նկատել եմ, այն է, երբ նշվում է, որ գրառումը տուգանվել է, որովհետև այլ ակումբցիներ տեղեկացման համակարգով տեղեկացրել են մոդերատորին այդ գրառման մասին: Հետևաբար լուծումը պետք է գտնել այս տարբերակի և նրան ընկեր այլ տարբերակների մեջ: Իմ առաջակը հետևյալն է՝ եթե կա նախնական փուլում ընդհանուր հայտարարի չեկած մոդերատորի ու տուգանվողի անհամաձայնությունը, ապա տվյալ հարցի շուրջ այլոց կարծիքները լսելու անհրաժեշտություն է առաջանում: Իրագործումը երկու եղանակով.

Նախապես համաձայնեցված.

ա. Միայն փակ քվեարկությամբ և առանց մեկնաբանությունների, պայմանով քվերակության արդյունքները տեսանելի միայն մոդերտորին ու տուգանվողին, եթե դա տեխնիկապես հնարավոր է: Որովհետև լինում են դեպքեր, երբ մարդն ինքը սխալ է, բայց տաքացած է ու այդ պահին ունակ չէ ընկալելու իր սխալը, բաց քննարկման պատրաստ չէ, միևնույն ժամանակ ուզում է այլոց վերաբերմունքն իմանալ: Նման մարդկանց հետ, եթե այսպիսի մոդելով չշարժվես, կարող է խնդիրը ներքին լուրջ հոգեբանակա ընկճվածության պատճառ հանդիսանալ, ինչն էլ իր հետևից կարող է բերել բազմաթիվ այլ խնդիրներ:

բ. Բաց քվեարկությամբ և մեկնաբանություններով, բայց ոչ դատարանի պես, այդպես ամեն մեկը կուզենա իրենն ապացուցել, մի շիլաշփոթ կստացվի ու գուցե ավելի սրվի այն ինչը կա: Այս դեպքում պայմանը պետք է լինի հետևյալը՝ քննարկմանը չեն մասնակցելու մոդերատորն ու տուգանվողը, այսինքն թեման լինելու միայն նրա համար, որ իրենք կարդան հարցի շուրջ այլոց կարծիքներ, որոնց հիման վրա էլ կկայացվի վերջնական որոշում: Բայց!

Քննարկմանը մասնակցող յուր. անհատ պետք է իր տեքստի մեջ լինի շատ զգույշ ու դրական: Զգույշ, որովհետև մեզանից ոչ-ոք չի կարող անցնել այն ուղիով, որով անցել է տուգանվողը այդ պահին ու դրանից հետո հոգեբանորեն: Պոզիտիվ, որովհետև ամենաշատ բանը, որն իրեն պետք է այդ պահին՝ դրականն է:

Ուրախ եմ, եթե ինչ-որ կերպ կարողացա օգտակար լինել, անկեղծ, ուզում եմ, որ նման հարցեր՝ պահանջաներ, նեղացածություն ու նման այլ բաներ ընդհանարապես չառաջանան:

Եղեք առողջ: :)

Ներսես_AM
16.09.2012, 00:11
… 5 օր անց ես կսկսեմ ամփոփել ու որոշում կկայացնեմ: …

:|:|:|

Hda
16.09.2012, 15:56
թափանցիկ մոդերավորում

Ավելի կաշա կդառնա բոլորի համար: Ըսենց լավ ա- մի քանի անտեղի տուգանք, ժամերով գրածդ ջնջել... հասարակ օգտատերը զահլա չի դնի ու խելոք դուրս կգա: Ինչու զուր տեղը թափանցիկությամբ հուսախաբ անել: Էտ քանի օգտատեր ես ճանաչում, կամ չասեմ մոդեր, որ խոստովանած լինեն թե սխալ են:

Բողոքարկման համակարգ
-բողոքողի հետ բողոքարկմոան համակարգ քննարկել՞՞՞՞՞ Մտածել ես՞,բողոքարկման համակարգի բողոքարկման գործընթացը: Կանադրությամբ ֆիքսի ինչ պետք ա, ոչ միայն այն բանի համար, որ ֆորումի Տերն ես, այլ համաոզված եմ որ հասարակ օգտատերերի հետ խորհրդակցելու կարիք չունես, ադմինիստրացիան լրիվ բավարար է: Ուրախ եմ, որ ուզում ես մի բան անես Ակումբի հեղինակությունը բարձրացնելու համար, բայց դրա համար այլ ուղղություններ էլ կան, ամենայնդեպս ոչ թափանցիկություն: Իզուր կյանքդ դժոխք կդարձնես: Միշտ ասել ու կասեմ-ինչքան էլ ակումբը թերություներ ունի և կամ և այլն...
Դու բավականին Մեծ ու հայրենասեր գործ ես իրականացրել, բնականաբար անվարձահատույց- հատկապես ծախսածդ ժամանակի առումով:

Chuk
24.09.2012, 17:30
Այսպիսով, հիմա փորձեմ ամփոփել քննարկումը կամ քննարկման այս փուլը (ամփոփումը կլինի ոչ մի գրառման մեջ, կարող է տևել օրեր):

Խնդիրը ձևակերպեմ այսպես. ակումբում բացի այլ խնդիրներից կա նաև լարված մթնոլորտի խնդիր, որի մի մասում ակումցիներից ոմանք մեղավոր են ճանաչում ղեկավար կազմին՝ իրենց սխալ գործունեության կամ անգործության համար: Ես ելնում եմ այն դիտակետից, որ տվյալ պահին չքննարկենք մեղադրանքներից որևէ մեկի իրավաչափությունը, համարժեքությունը, ինչպես նաև մեծությունը: Այլ պարզապես դիտարկում եմ, որ նման խնդիր կա ու ցանկալի է խնդիրը վերացնել, անկախ նրանից, որ ինքս համարում եմ, որ մոդերատորներն իրականում տիտանական աշխատանք են կատարում, իսկ թերացումներն, ուշացումներն ու սխալները համեմատած ճիշտ քայլերի, օպերատիվության ու իրավաչափության, ճիշտ կողմնորոշման հետ քիչ են:

Իսկապես մի կողմ դնենք մեզնից յուրաքանչյուրի նեղ անձնական, օբյեկտիվ կամ սուբյեկտիվ պատկերացումները ու փորձենք խնդիրները լուծել:

Նաև այս խնդիրը դիտարկում եմ ակումբի պասիվացման դեմն առնելու համատեքստում, նորից մի կողմ դնելով իմ անձնական պատկերացումը, որ այս խնդիրները պասիվացման վրա ամենաքիչը ազդող գործոններն են:



Համաներումը, դրա պատճառներն ու հետևանքները

Որպես առաջին քայլ սեպտեմբերի 21-ին հայտարարվեց համաներում (http://www.akumb.am/showthread.php/63516): Սրա նպատակները տարբեր էին: Ոչ միայն խնդիր կար ընդգծել անկախության օրվա խորհուրդը, ոչ միայն խնդիր կար պարզապես դուր եկող, գեղեցիկ ժեստ անել, այլև խնդիր կար հարթել մինչև հիմա եղած լարվածությունները: Այդ խնդիրը կձևակերպեմ այսպես. դադարեցնենք քննարկել, թե նախկինում տրված տուգանայիններից ո՞րն է եղել իրավաչափ ու տեղին, ո՞րն է եղել անտեղի, սխալ: Պարզապես զրոյացնենք մինչ այս եղածը ու ամեն ինչը փորձենք սկսել նոր էջից: Կստացվի՞, թե՞ ոչ, ցույց կտա ժամանակը:

Բայց այս համաներումը հայտարարելիս ես նաև ակնկալում եմ, որ ակումբցիներն էլ են ընդառաջ քայլ անելու: Ընդառաջ քայլ անել ասելով նկատի ունեմ, որ իրենք ևս համարելու են, որ ամեն ինչը նոր էջից է սկսվում:

Ի՞նչ է սա նշանակում: Ոչ մեկի համար գաղտնիք չէ, որ ակումբում կան բազում խախտումով գրառումներ, որոնք չեն ջնջվել ու ստացել համապատասխան գնահատական, չեն տուգանվել, չեն պատժվել: Ինչու՞: Պատճառները տարբեր են. մի դեպքում դրանք դիտարկվել ոչ ծայրահեղ դեպք, մյուս դեպքում պարզապես չեն նկատվել, երրորդ դեպքում ժամանակ չի եղել զբաղվելու և այլն: Կան դեպքեր, երբ ճիշտ է արվել, որ գրառումը մնացել է, կան դեպքեր, որ սխալ է արվել:

Ու այս հանգամանքը հաճախ է օգտագործվել ղեկավար կազմի դեմ գնահատականներում, երբ ինչ-որ գրառում սաստվել է, ջնջվել կամ տուգանվել, հանկարծ հիշեցվել է մեկ այլ գրառման մասին, որն իր տեղում է: Ես ակնկալում եմ, որ նախորդող ոչ մի գրառում այլևս այդ կոնտեքստով չի մեջբերվելու, որովհետև այն, ինչ եղել է մինչև համաներումը մի բան է, այն ինչ կլինի՝ այլ բան: Որովհետև եթե ես այսօր զրոյացրել ու չեմ դիտարկելու որևէ մեկի մինչ այժմ արած խախտումը, ապա ակնկալում եմ, որ մյուսներն էլ են նույնը անելու:

Կունենա՞նք նոր թերացում, խնդրեմ, բաց ենք դրա մասին լսելու ու շտկելու համար: Հիշեցնեմ նաև, որ ակումբում գործում է տեղեկացման համակարգը, որով մեզ կարող եք տեղեկացնել կատարված խախտումների մասին: Մենք դրանք բոլորը դիտարկելու ենք: Բայց հներին այլևս չենք անդրադառնում: Հնին ցանկացած նման անդրադարձի դեպքում ես հղում եմ անելու համաներմանն ու այս գրառմանը ու դրանով համարեմ, որ առաջացած հարցին պատասխանել եմ: Դա չի նշանակում, որ հին ու կանոնադրական խախտում հանդիսացող գրառումները նկատվելու, տեղեկացվելու դեպքում չեն ջնջվելու, խմբագրվելու կամ համապատասխան այլ գործողություն արվելու: Պարզ է, որ եթե ասենք կա տրանսլիտով գրառում (խոսում եմ մեղմ դեպքերի մասին), որը չենք նկատել ու թողել ենք որ մնա, բայց հիմա նկատենք, մեզ ձեռ է տալիս (մեզ՝ բոլորիս) դա հիմա խմբագրելն ու հայատառ դարձնելը (կամ ջնջելը): Բայց դրա հեղինակը դրա համար չի ստանալու դիտողություն, որովհետև դա անցած պատմություն է: Պարզ է նաև, որ ամեն դեպքում առաջնահերթություն են մեզ համար նոր գրառումները, այլ ոչ թե հները, ու պարզ է, որ մոդերատորները չունեն այնքան ժամանակ, որ հատ-հատ զբաղվեն հին բոլոր խնդիրներով ու բացթողումներով:




Հաջորդ գրառումներում կփորձեմ անդրադառնալ մյուս խնդիրներին, թե՛ նրանց, որոնք մատնանշվել են թեմայում, թե՛ նրանց, որոնք չեն մատնանշվել, բայց ես տեսնում եմ: Թեմայում եղել են կոնկրետ առաջարկներ, ես խոսելու եմ նաև դրանց մասին, իրագործման հնարավորության, որոշ դեպքերում քվեարկության դնելու հարցի, որոշ դեպքերում դրանց կատարման ժամանակը նշելու մասին: Հաշվի առնելով, որ առաջարկներից շատերը նշվել են մեկից ավելի անգամ, որ առաջարկներ կան, որոնք նախկինում էլ են եղել, ես չեմ ընկնելու ու հատ-հատ նշեմ առաջարկների հեղինակներին, այլ պարզապես խոսելու եմ տվյալ առաջարկի մասին: Ներողություն եմ խնդրում դրա համար, ու նշում, որ սա «դափնիներ գողանալու» ձև չի: Որևէ միտք ես այստեղ նպատակ չունեմ ներկայացնել որպես իմ մտահղացում, այլ պարզապես որպես խնդիրների ու լուծումների ձևակերպումներ, որոնք անկախ նրանից, թե ում կողմից են տրվել, պետք է օգտագործվեն ի շահ ակումբի:

Շարունակելի

Chuk
24.09.2012, 17:47
Տեղեկացումները, դրանց հետևանքներն ու հետադարձ կապը

Քանի որ նախորդ գրառման մեջ խոսեցի տեղեկացումների մասին, հիմա գանք այդ խնդրին: Ցավոք սրտի ակումբում առ այս պահը կան մարդիկ, ովքեր հայկական մենթալիտետային մակարդակով համարում են, որ վատ գրառման մասին տեղեկացնելը գործ տալ է: Իրենց պատկերացումներով մոդերատորն էլ ոստիկան է: Ես հարկ չեմ համարում այս պատկերացմանը «ըստ արժանվույն» գնահատականներ տալուն, սակայն նաև չեմ վախենում ու խուսափում խոսել դրա մասին:

Եթե մենք մտահոգ ենք ակումբի ճակատագրով, եթե մենք ուզում ենք, որ այստեղ լավ միջավայր լինի, ապա մեզնից յուրաքանչյուրը կարող է դրան նպաստել: Բավական է սեղմել տեղեկացման կոճակի վրա ու տեղեկացնել նորից ասենք տրանսլիտով գրառման մասին, ու այդ գրառումը շատ շուտով մոդերատորի ժամանակի հաշվին դառնալու է հայատառ, գրառման հեղինակը տեղեկացվելու է կանոնադրությանը, տրանսլիտով գրելու պահանջներին:

Ոչ մեկը չի ձերբակալվելու, ոչ մեկից գումար չի բռնագանձվելու, եթե խախտումն ուժեղ լինի, ապա այո, «պատժվելու» է ակումբի կանոնադրությանը համապատասխան, օրինակ արգելափակվելու է ինչ-որ բաժնից կամ ընդհանուր ֆորումից: Բայց դրա մեղավորը լինելու է ինքը՝ իր արած խախտումով, այլ ոչ թե դրա մասին տեղեկացնողը, ով ընդամենը օգնելու է ավելի շուտ հայտնաբերել խախտումը, ով օգնելու է խուսափել ավելի լուրջ հետևանքներից, ով օգնելու է ակումբը պահել որպես լավ միջավայր, ով շատ հաճախ օգնելու է առնել առաջացող լուրջ վեճերի դեմը (որոնք հաճախ կարող են ակումբի սահմանից էլ դուրս գալ):

Սա ակումբցիների մասով էն, ինչն իրենցից ակնկալվում է ակումբի զարգացմանը նպաստելու համար:

Բայց մենք, մոդերատորներս, նույնպես գործ ունենք անելու: Ստացած բազում տեղեկացումները որպես կանոն դիտարկվում ու ձեռնարկվում են համապատասխան քայլեր (եթե այդպիսիքի կարիքը կա), բայց տեղեկացնողը հաճախ դրա մասին այդպես էլ չի իմանում:

Ուրեմն մենք խնդիր ունենք ավելի լուրջ մշակել հետադարձ կապի մեխանիզմը: Յուրաքանչյուր տեղեկացնող պետք է իմանա, թե ի վերջո իր տեղեկացումն ինչի հանգեցրեց: Թող որ արդյունքում ոչինչ փոխված չլինի, բայց մասնակիցը պետք է ստանա մոտավորապես այսպիսի բովանդակությամբ նամակ. «Շնորհակալություն տեղեկացնելու համար, սակայն մենք քննարկեցինք ու եկանք եզրակացության, որ ...», կամ «Շնորհակալություն տեղեկացնելու համար, ձեր մատնանշած գրառումը խմբագրվել է»:

Այստեղ քննարկման խնդիր կա, որը կձևակերպեմ հաջորդ գրառումներից մեկում: Մասնավորապես թափանցիկ մոդերավորման քայլերից մեկն է, որ բոլորն իմանում են A մասնակցի տուգանված լինելու մասին: Բայց մինչ այժմ մենք խուսափել ենք նման ինֆորմացիա տալուց, ավելի շուտ դա որպես կանոն գաղտնի ենք պահել: Ցանկացած մեկը իմացել է իր ստացած տուգանքների մասին, ու չի իմացել մյուսների ստացածների մասին: Ու եթե որոշենք, որ հետագայում էլ է այդպես շարունակվելու, ապա որոշ դեպքերում տեղեկացման արձագանքի տեսքը պետք է փոխվի, որովհետև ակամա մենք տեղեկացնողին կտեղեկացնենք տուգանվածի մասին:

Պետք է նաև հստակեցնել մեխանիզմը, թե մասնակիցը ինչ կարող է անել, եթե տվյալ հարցում շատ շահագրգիռ է, բայց իր տեղեկացմանը բացասական արձագանք է եկել:

Ինչևէ: Հետադարձ կապը այս պարագայում համարում եմ ուշացած անհրաժեշտություն ու կարծում եմ, որ ևս մի քանի հարց քննարկելու հետո պետք է ավելի կոնկրետ ձևակերպել ու սահմանել դրա մեխանիզմը, անկախ նրանից, որ դա ցավոք բեռ է դառնալու մոդերատորներիս համար, ավելի շատ ժամանակ ու էներգիա խլի մեզնից:


Շարունակելի

Chuk
19.10.2012, 14:11
Մոդերատորական. հաշվի առնելով, որ այս թեման ընդհանուր բնույթի է ու նախատեսված չէ կոնկրետ դեպքերի մասին քննարկում ծավալելու համար՝ Lion-ի վերջին գրառումը ջնջվել է, որպեսզի թեման զերծ մնա հետագա շեղումներից ու այլ ընթացք ստանալուց, բազառի վերածվելուց: Նրա բարձրացրած խնդիրը քննվել ու ստացել է համապատասխան լուծում: