PDA

Դիտել ողջ տարբերակը : Կա՞ այսօր Հայաստանում ձևավորված մտավորականություն



Philosopher
28.02.2007, 08:39
Կա՞ արդյոք Հայաստանում ձևավորված մտավորականություն, այնպիսի մտավորականություն, որն անհրաժեշտ է այսպիսի սոցիալ–քաղաքական, մշակութային, բարոյա–հոգեբանական վիճակում գտնվող երկրին։

Ուլուանա
28.02.2007, 14:40
Philosopher ջան, ինձ թվում է, քո այս գրառման մեջ բարձրացրած հարցն արդեն պարունակում է դրա պատասխանը. եթե ունենայինք այդպիսի մտավորականություն, երևի հիմա այսպիսի սոցիալ-քաղաքական, մշակութային, բարոյա-հոգեբանական վիճակում չէինք գտնվի, այսինքն՝ արդեն դուրս եկած կլինեինք... :think Համենայնդեպս, ես այդպես եմ կարծում։ Որքան նկատել եմ, մեր ներկայիս մտավորականության շրջանում քաոս է տիրում, ինչպես որ մյուս համարյա բոլոր ոլորտներում է։ :(

Անհատներ, անշուշտ, կան, բայց, որքան հասկացա, տվյալ դեպքում խոսքը ընդհանուր պատկերի մասին էր։

Idealistka
28.02.2007, 14:54
Իմ կարծիքով մտավորականության որոշակի մասնատվածությունն է, հա՞, այս հարցի պատճառը, բայց այդ երեւույթն առկա է ո՛չ միայն մտավորականության ոլորտում: Այժմյան պայմաներում, կարծում եմ, պետք է խոսել մեր հասարակության մասնատվածության մասին: Արդյո՞ք նորմալ երեւույթ է մարդկանց մտածելակերպի այսչափ տարբերությունը: Բայց.... это уже совсем другая история.........., и намного более серьезная.

Philosopher
28.02.2007, 15:09
Philosopher ջան, ինձ թվում է, քո այս գրառման մեջ բարձրացրած հարցն արդեն պարունակում է դրա պատասխանը. եթե ունենայինք այդպիսի մտավորականություն, երևի հիմա այսպիսի սոցիալ-քաղաքական, մշակութային, բարոյա-հոգեբանական վիճակում չէինք գտնվի, այսինքն՝ արդեն դուրս եկած կլինեինք... :think Համենայնդեպս, ես այդպես եմ կարծում։ Որքան նկատել եմ, մեր ներկայիս մտավորականության շրջանում քաոս է տիրում, ինչպես որ մյուս համարյա բոլոր ոլորտներում է։ :(

Անհատներ, անշուշտ, կան, բայց, որքան հասկացա, տվյալ դեպքում խոսքը ընդհանուր պատկերի մասին էր։
Հարցը ոչ այնքան մտավորականության շրջանում առկա քաոսն է, որքան նրանց գլխում եղած քաոսը, այսինքն՝ նրանցից յուրաքանչյուր գիտակցության մեջ առկա քաոսը։ Հայ մտավորականի աշխարհայացքը այսօր լավագույն դեպքում կերտվում է հայ և մասամբ էլ ռուս գրականության ու խոհափիլիսոփայական մտքի ազդեցությամբ։ Մինչդեռ 21–րդ դարի մարդուն հասկանալու համար, նրա խնդիրները ընկալելու համար, իսկ հայ հասարակությունը ու հայ մարդը ուզեն թե չուզեն ժամանակակից աշխարհի մասն են, թեև շատ թելերով էլ կապված են 19–րդ դարի հոգեբանությանն ու աշխարհայացքին, ահա մարդը, որ ցանկանում է խոսք ասել անցյալի ու ներկայի այս բարդ խառնուրդին, պետք է յուրացրաց լինի գոնե Յունգի ու Ֆրոմի փիլիսոփայությունը, գոնե պետք է կարդացած լինի Սարտր, Կամյու ու Մարկես, գոնե պետք է Կյերկեգորի ու Նիցշեի հետ մտածի մարդու ու նրա բնույթի մասին։ Այլապես նա կմնա ինֆտանտիլիզմով, մտավոր ու հոգևոր մարգինալիզմով ինքնասիրահարված մի խառնամբոխի ներկայացուցիչ։

Իմ կարծիքով մտավորականության որոշակի մասնատվածությունն է, հա՞, այս հարցի պատճառը, բայց այդ երեւույթն առկա է ո՛չ միայն մտավորականության ոլորտում: Այժմյան պայմաներում, կարծում եմ, պետք է խոսել մեր հասարակության մասնատվածության մասին: Արդյո՞ք նորմալ երեւույթ է մարդկանց մտածելակերպի այսչափ տարբերությունը: Բայց.... это уже совсем другая история.........., и намного более серьезная. Մտավորականությունը մասնատված է այնպիսի հարցերում, որոնք նրան հասանելի չեն։ Օրինակ, եթե կազմվի մի հարցաթերթիկ, որտեղ տրվի ընդամենը երկու հարց. "Ինչպե՞ս կարելի է լուծել մարդու խնդիրը", և "Ինչպե՞ս պայքարել չարորակ ագրեսիայի դեմ"։ Քանի՞ հայ մտավորական կկարողանա ադեկվատ պատասխան տալ այս երկու հարցերին։ Իսկ դրանք քաղաքակրթական նշանակության հիմնարար հարցեր են, որոնց պետք է տիրապետի յուրաքանչյուր մտավորական։ Իսկ այնպիսի հարցերում, ինչպիսիք են ցեղասպանությունը և նրան հարակից թեմաները, հայ մտավորականները բավականին միասնական են, որովհետև նրանք հասկանում են՝ ով ում բարեկամն է այստեղ։ Ավելի լուրջ հարցերը, որոնք դուրս են աշխարհի ընկալման "իմ ցեղ–քո ցեղ" արխայիկ մոդելից, նրանց սահմանը չեն։

CactuSoul
28.02.2007, 15:31
Սա այն եզակի դեպքերից է, երբ կարծիքս համընկնում է բացարձակ մեծամասնության հետ: Մեր մտավորականությունը, այսպես ասած, «համեմատաբար մտավորականություն» է, այն էլ այնպիսին, որ ցերեկը ճրագով փնտրես, էլի հնարավոր է, որ չգտնես:

Ուլուանա
28.02.2007, 15:47
Առաջին անգամ եմ տեսնում այնպիսի հարցում, որտեղ մի տարբերակն անցնի միաձայն (գոնե այս պահի դրությամբ)... :o Մի կողմից տխուր է, մյուս կողմից էլ լավ է, որ գոնե իրատես ենք։ :think

Մանոն
28.02.2007, 18:28
Կա՞ արդյոք Հայաստանում ձևավորված մտավորականություն, այնպիսի մտավորականություն, որն անհրաժեշտ է այսպիսի սոցիալ–քաղաքական, մշակութային, բարոյա–հոգեբանական վիճակում գտնվող երկրին։
Ինձ թվում է, եթե կար էլ ձևավորված մտավորականություն, ապա գնալով նվազում է: Չէ բարեկամս...մտավոր անկում ենք ապրում: Բավական է մի հայացք ձգել դպրոցներին: Ծուլությունը, անտարբերությունն ու անգրագիտությունը պրոգրեսիվ ձևով տարածվում են սերնդի մեջ: Խարխլվում է ամեն ինչ:(

Philosopher
01.03.2007, 09:08
Ինձ թվում է, եթե կար էլ ձևավորված մտավորականություն, ապա գնալով նվազում է:
Այդ "եթե"–ն տեղին էր ասված։ Մտավորականությունը՝ որպես հասարակական երևույթ, կարող է ձևավորվել բացառապես երկար պատմական զարգացման արդյունքում՝ ունենալով իր զարգացման փուլերը։ Որպեսզի մարդը դառնա մտավորական, անհրաժեշտ է համապատասխան ինտելեկտուալ, հոգեբանական մթնոլորտ և ավանդույթ, որի վրա հիմվում է այդ մթնոլորտը։ Իրականում այս ավանդույթն ու մթնոլորտը շատ բան են որոշում, դրանք կարող են միջակ մարդուն դարձնել լուրջ գործիչ, եթե, օրինակ, խոսքը գնում է գերմանական ինտելեկտուալ ավանդույթի մասին, և կամ մեծ պոտենցիալ ունեցող մարդուն վերածել մարգինալի, եթե խոսքը գնում է, օրինակ, հայկական ինտելեկտուալ ավանդույթի ու ժամանակակից մտածողության մասին, որը իր գավառականության մեջ է կլանում մեծաթիվ ընդունակ մարդկանց ու նրանց վերածում միջակությունների։ Խոսքն այն մասին չէ, որ հայկական ինտելեկտը որևէ կարևոր ձեռքբերում չի ունեցել, ունեցել է, բայց այնքան քիչ, որ այդ ձեռքբերումներն էլ կորել են անտաղանդության ու ազգային ինքնասպան աշխարհայացքի կաթսայի մեջ։

Մանոն
01.03.2007, 16:49
Այդ "եթե"–ն տեղին էր ասված։ Մտավորականությունը՝ որպես հասարակական երևույթ, կարող է ձևավորվել բացառապես երկար պատմական զարգացման արդյունքում՝ ունենալով իր զարգացման փուլերը։ Որպեսզի մարդը դառնա մտավորական, անհրաժեշտ է համապատասխան ինտելեկտուալ, հոգեբանական մթնոլորտ և ավանդույթ, որի վրա հիմվում է այդ մթնոլորտը։
Մտավորականությունը՝որպես հասարակական խավ, իր ձևավորումն սկսում է ձեռք բերել հենց դպրոցից: Դրա համար ես մեջբերել էի դպրոցի օրինակը: Ավաղ հիմա քաոսն սկսվում է հենց այնտեղից: Մտահոգիչ է....բայց փաստ, որ սերունդը գնալով անտարբեր է դառնում ամեն ինչի նկատմամբ, ու առաջին հերթին՝ մեր մշակույթի ու երբեմնի ձեռքբերումների: :think

TigranM
02.03.2007, 02:45
Ես ձևավորված մտավորականություն ասելով հասկանում եմ՝ հասարակության մեջ այնպիսի մի զանգված, որը զբաղված է տվայալ հասրակությանը հուզող հիմնախնդիրների և մարտահրավերնի վերլուծմամբ:Հասարակության մեջ առկա քաղաքական, սոցիալական ճգնաժամի վերացման, հասարակության բարոյա-հոգեբանական իրավիճակի բարելավման ուղվաց քննարկումներ կատարող և լուծումներ առաջարկող զանգված:Ցավով եմ ասում, բայց մենք ձևավորված մտավորականություն չունենք:Իհարկե, կան առանձին անհատներ որոնք մտավորական կոչվելու բոլոր իրավունքները ունեն:

Idealistka
03.03.2007, 21:11
Ինչի՞ ենք այսպես պեսսիմիստորեն նայում, չնայած, որ ես էլ համաձայնվեցի մեծամասնության հետ, այնուամենայնիվ չեմ կարծում, որ «վիճակն» այդքա՜ն ծանր է: Գուցե եւ մասնատված, բայց ունենք շատ խելացի մարդիկ:
У нас существует несколько паралельных миров, которые если соприкасаятся друг с другом, то соприкосновение чревато прохими последствиями.

Sirop
06.03.2007, 01:20
եթե ունենայինք այդպիսի մտավորականություն, երևի հիմա այսպիսի սոցիալ-քաղաքական, մշակութային, բարոյա-հոգեբանական վիճակում չէինք գտնվի, այսինքն՝ արդեն դուրս եկած կլինեինք... :think Համենայնդեպս, ես այդպես եմ կարծում։

Այսինքն ինչ է ստացվում եթե ասենք մտավորականներով ձևավորված գրողների միություն ունենաինք սոցիալ-քաղաքական, մշակութային, բարոյա-հոգեբանական վիճակը ՕՔԵՅ կլիներ: Միքիչ շատ չի մտավորականների համար:

Չեք կարծում որ էս մտավորականների մասին խոսաքցությունները միքիչ ձևական էն

Censor
06.03.2007, 01:29
Մտավորականությունը որնա, интеллигенция-ն?..
Դե դրա վերաբերյալ մի հատ անեկդոտ ունեմ, որ լիարժեք արտահայտումա իմ կարծիքը

Поступили двое в институт.
Один другому говорит:
- Все, теперь мы студенты, молодые представители интеллигенции..
-Че?..
-Хр*н через плечо!! Интеллигенция мы теперь, бл*..

Պառդոն մայ ֆռենչ..

Philosopher
06.03.2007, 08:30
Այսինքն ինչ է ստացվում եթե ասենք մտավորականներով ձևավորված գրողների միություն ունենաինք սոցիալ-քաղաքական, մշակութային, բարոյա-հոգեբանական վիճակը ՕՔԵՅ կլիներ: Միքիչ շատ չի մտավորականների համար: Եթե այդ գրողների միության անդամներ լինեին, ասենք, Քամյուի, Սարտրի, Հեսսեի, Կաֆկայի նման գրողներ, ապա նրանց գոյությունն ուղղակի անհամատեղելի կլիներ այսպիսի հասարակության և այսպիսի պետության գոյության հետ։ Խնդիրն այն է, որ մտավորականի գոյությունն ու հասարակության վերաբերմունքը մտավորականության նկատմամբ ուղղակիորեն փոխկապակցված են։ Մի կողմից, իհարկե, պետք է լինի լուրջ մտավորականություն, որպեսզի հասարակությունը դեպքով թեքվի դեպի նրանց գաղափարներն ու աշխարհընկալումը, մյուս կողմից, սակայն, հասարակությունը պետք է ձևավորի լուրջ, ինքն իրենից ու հենց այդ հասարակությունից ազատ մտավորականի ու մտավորականության հասարակական պատվեր, ինչը, ըստ էության, պատմական որևէ ժամանակաշրջնում հայ հասարակությունը չի արել. ո՛չ Խորենացու, ո՛չ Նարեկացու, ո՛չ Չարենցի, ո՛չ Մաթևոսյանի գոյությունը չի եղել հասարակական պատվերի արդյունք, ինչն էլ և դարձել է պատճառ, որ նրանց այդ ինքնակամ գոյությունը չի դարձել ազգային կեցության իմաստավորման ու վերափոխման խթան։ Այսօր ևս այդ պատվերը չկա։ Եվ ամեն ինչ սկսվում է նորից՝ իր հավերժական սկզբնակետից. ազգային բարձր ինքնագնահատակին հակադրվող ցածր ինքնաճանաչումն ու ցածր ինքնախնամքը։


Չեք կարծում որ էս մտավորականների մասին խոսաքցությունները միքիչ ձևական էն Ձևական են, քանի որ մաքուր իմաստով մտավորականներ հայ մշակույթում քիչ են եղել, քանի որ մտավորական երևույթը բոլորովին չի նույնանում գրել, կարդալ կամ նկարել իմանալու հետ։ Եվ հասարակությունն էլ սովորել է, որ մտավորականը թույլ, մարգինալ, ստրկամիտ այն մարդն է, որը ուրախ է խաբվել ամեն խաբեբայի ու ուրախ է կաշառվել ցանկացածին, ով քիչ թե շատ գին կառաջարկի իրեն։ Այսպիսին է ազգային ավանդույթը։

Հեթանոս Հրեշտակ
06.03.2007, 16:51
Չունենք, ու չենք էլ ունենա ... քանի դեռ ժողովուրդն իրա էս աբորիգեն վիճակից դուրս չի եկել (էստեղ մի հատ ծիծակի սմայլիկ էր պետք, չգտա)

Idealistka
06.03.2007, 18:04
Չունենք, ու չենք էլ ունենա ... քանի դեռ ժողովուրդն իրա էս աբորիգեն վիճակից դուրս չի եկել (էստեղ մի հատ ծիծակի սմայլիկ էր պետք, չգտա)

Չեմ կարծում, որ դուք ինքներդ ձեզ համարում եք այդպիսինը,դա արդեն նշանակում է, որ «կան նպաստավոր պայմաններ» մտավորականության գոյության համար: Բոլորովին համաձայն չեմ:

Array
06.03.2007, 18:36
Ցավով եմ ասում ժող,բայց չկա:Կամ էլ կարող ա կա չի երևում

Հեթանոս Հրեշտակ
06.03.2007, 20:26
Չեմ կարծում, որ դուք ինքներդ ձեզ համարում եք այդպիսինը,դա արդեն նշանակում է, որ «կան նպաստավոր պայմաններ» մտավորականության գոյության համար: Բոլորովին համաձայն չեմ:

Իմ ասածը վերաբերում էր մի ամբողջ ազգի: Ինդիվիդումներ միշտ էլ եղել են ու կլինեն [չմտածես, թե ինձ ի նկատի ունեմ, մենք ավելի արժանավոր դեմքեր էլ ունենք]

Idealistka
07.03.2007, 20:47
Իմ ասածը վերաբերում էր մի ամբողջ ազգի: Ինդիվիդումներ միշտ էլ եղել են ու կլինեն [չմտածես, թե ինձ ի նկատի ունեմ, մենք ավելի արժանավոր դեմքեր էլ ունենք]

Բայց չէ՞ որ հենց անհատներից է կազմվում ազգի մտավորականությունը, դրա համար անպայման չէ, որ «աբորիգեներ», որոնց գոյությունը ես չեմ ժխտում, չլինեն: Քանի որ հիմա Հայաստանում կան տարբեր սոցիալ-մշակութային գործոններով տարբերվող շերտեր/ մեր երկիրը աչքի է ընկնում կոնտրաստներով/, ամբողջ բնակչության գոնե 1/20-ը հանգիստ կարող են կազմել «ոչ աբորիգենները», դա արդեն ոգեշնչում է, չէ՞, ու դրա մի մասն էլ ունի «պոտենցիալ»: Որ մասնատված ու ցրված են շրջանակները՝ չեմ ժխտում: Բայց դրա գոյությունն էլ պետք է խոստովանեմ:

Հեթանոս Հրեշտակ
07.03.2007, 22:41
Էլի որ անհատներից է կազմվում ագգը, բայց եթե այդ 1/20-ն էլ չկա, եթե լիներ էլ, քիչ է, ի՞նչ անե՞ս ...
Փորձիր մի օր ձեր ՔՈՒՉԻ տղերքի խոսակցությունը լսես ... ի՞նչ, էլի հեռախոսներից են խոսու՞մ ....

Idealistka
09.03.2007, 15:51
Էլի որ անհատներից է կազմվում ագգը, բայց եթե այդ 1/20-ն էլ չկա, եթե լիներ էլ, քիչ է, ի՞նչ անե՞ս ...
Փորձիր մի օր ձեր ՔՈՒՉԻ տղերքի խոսակցությունը լսես ... ի՞նչ, էլի հեռախոսներից են խոսու՞մ ....

Իհարկե լսել եմ, իմիջիայլոց ոչ միայն տղաների խոսակցություններն են բջջայիների մասին, երիտասարդության մեծ մասը այդ հիվանդությամբ է տառապում, բայց //նորից//, նրչանք մեծամասնություն են, բայց ո՛չ ամբողջ հասարակությունը, իսկ մտավորականությունը երբեք էլ բազմաքանակ չի եղել //երկրի ողջ բնակչության համեմատ//:
Համ էլ, կարծում եմ, սխալ տեսանկյունից ենք նայում, մենք էլ ենք շարունակում փնովել ինքներս մեզ //երեւի ազգային է//, այնինչ պետք է առաջ նայել: Չանտեսելով սխալները՝ պետք է ձգտել լավին ու հետ չնայել: Ու «լոխ» լավ կլինի;) :

hippy w.s
17.03.2007, 22:39
Ինձ թվումա մտավորականություն ասելով , (են էլ ձևաորված) մարդիկ հեռու չգնալով պատկերացնում են 70-ն անց մի ալեհեր, -40 ակնոցներով, վեչնի ծխող, ու միշտ աղքատությունից ու իշխանությունից բողոքող ծերունի: Համենայն դեպս առաջին ասոցիացիան ետա, թող ներեն ինձ իրենց մտավորականություն համարողները:
Չէ չէ ես սենց չեմ մտածում:
Որպեսզի տվյալ հարցին կոնկրետ պատասխան տրվի իմ կարծիքով պետք է մենք վերաիմաստվորենք, վերվերլուծենք(դե տենց մի բան էլի) Ձևավորված մտաորականության գաղափարը:think

Sirop
22.03.2007, 01:08
Ինձ թվումա մտավորականություն ասելով , (են էլ ձևաորված) մարդիկ հեռու չգնալով պատկերացնում են 70-ն անց մի ալեհեր, -40 ակնոցներով, վեչնի ծխող, ու միշտ աղքատությունից ու իշխանությունից բողոքող ծերունի: Համենայն դեպս առաջին ասոցիացիան ետա, թող ներեն ինձ իրենց մտավորականություն համարողները..........:think

իմ մտածելով երիտասարդի համար ընդունելի մտավորականը այսինքն մարդ որ լիդեր կամ օրինակ (հեղինակություն ամենալավ իմաստով) լինի պետքա մինչև 40 տարեկան լինի որովհետև իրական (փոխհասկացողության) կոնտակտ չի կարա լինի ասենք 60ից բարձր մարդու ու իմ մեջ(20++) որովհետև ոչ ինքը ինձնից բան կհասկանա ոչ էլ ես իրենից

շատ դեպքերում ես իմ տարիքակիցներից բան չեմ հասկանում էլ ուր մնաց մտավորականը էն էլ ձևավորված

hippy w.s
25.03.2007, 17:41
Իմ կարծիքով մտավորականը են մարդնա ով նախ և առաջ մտածում ա как не странно
ոչ թե խոսում:Իսկ հետո իր մտքերը ի կատարա ածում: Էսօրվա երիտասարդության մեջ
խելացի մտքեր կան, բայց քիչ ու մի տեսակ վախեցած, որովհետև շուրջդ ենքան դեբիլներ կան որ վախենում ես (մենակ մարդը երբեեեեք)մի բան ասես: Այ եթե մի տաք տեղ լիներ ու հետն էլ ուտելիք, մենք էլ ետ խելոքներով կհավաքվեինք ըտեղ ու հաստատ կձևավորվեր ես անտեր երկրի իսկական մտավորականությունը: Լավ միտքա չէէէ:hands

Sirop
26.03.2007, 04:43
ինձ մի բանա հետաքրքրում ուրիշ երկրներում մեր եսքան սիրած էս մտավորականները իրենց համարժեքը ունեն թե երևի էլի կկրկնվեմ ու ասեմ որ մենք ենք հորինել (բայց ոչ ես) էս մտավորականներին ինչվոր սուպերմենի նման մի բան ենք պատկերցնում կամ ասենք շտապ օգնություն որը չկա ու հայտնի չի պետքա լինի թե պարտադիր չի (կարողա առանց իրանց ավելի լավա)

որովհետև ասենք դարի սկզբի մեր մտավորականները էն չեն էղել ինչ որ հիմա ենք մտավորականներին էսօր վերագրում

Մախլուտո
28.03.2007, 11:51
Philosopher ջան, ինձ թվում է, քո այս գրառման մեջ բարձրացրած հարցն արդեն պարունակում է դրա պատասխանը. եթե ունենայինք այդպիսի մտավորականություն, երևի հիմա այսպիսի սոցիալ-քաղաքական, մշակութային, բարոյա-հոգեբանական վիճակում չէինք գտնվի, այսինքն՝ արդեն դուրս եկած կլինեինք... :think Համենայնդեպս, ես այդպես եմ կարծում։ Որքան նկատել եմ, մեր ներկայիս մտավորականության շրջանում քաոս է տիրում, ինչպես որ մյուս համարյա բոլոր ոլորտներում է։ :(

Անհատներ, անշուշտ, կան, բայց, որքան հասկացա, տվյալ դեպքում խոսքը ընդհանուր պատկերի մասին էր։

Ամեն երկրի մտավորականություն կարողանումա գործի միայն խոսքի ազատություն երևույթը իր մեջ պարունակող երկրում.... Էսօր Հայաստանում գործումա գրպանի պարունակության երևույթը. . . ու ինքնաբերաբար մարդ արարած լինելով շատ մտավորականներ էսօր Հացի հայթայթման ճանապարհին են ելել ու լքել մտավորականության շրջանը , որովհետեվ էսօր Հայաստանում մտավորական շրջաներում հաց չես գտնի էլ.... Պիտի երկրի տերերի հետ սեղան նստես ,որ օգտվես,,,, Էսօր Սոս Սարգսյանն է հեռացել մտավորական դաշտից, , , էլ ինչ մտավորականության մասին կարող է խոսք լինել? ու որ ես սենց նայում եմ ապագանելա էդ հարցում տխուր իրավիճակում. . . Աշկիս Էմմի կոչվածներն են վաղը միուս օր հայաստանի մտավորականություն կազմելու ու Super Sako - ի հետ տժժժժժժժժժժժալու

hippy w.s
28.03.2007, 15:03
Թող ինձ նորից ներեն մտավորականները, բայց որ հիմա իրանք սոված են էտելա իրանց մեղքը, մտավորականը պետքա լինի երկրի մտքի տերը, այն թելադրողը: Եվ եթե եսօրվա մեր երկրի մտքին կա թալանել ու տժժժաաալ, ուրեմն ետ իրանց մտաորականների մտքին էլա էլել: Ինչ վերաբերվումա խոսքի ազատությանը, ապա ոչ մի տեղ էլ խոսքը ազատ չի: Խոսքը ազատա եթե ձեռքիտ զենք կա, ուրեմն իսկական մտավորականը ենա որ խելացի մըտքերից(մեր դեպքում դուրս եկավ երկիրը թալանելու միտքը) բացի ունի զենք և պատրաստա ցանկացած պահի դուրս գալ բարիկադներ:
Last Poets- ճիշտ խոսքը ժամանակ չի ճանաչում:

Մանոն
28.03.2007, 16:11
Եկեք վերցնենք մասնակի դեպք՝ հենց մեր ակումբն ու քննարկենք, քանի՞ տոկոս է կազմում մտավորականությունը հենց ա՛յս միջավայրում: Philosopher ջան, քանի որ թեման հենց դու ես բացել, հարցս քեզ եմ ուղղում: Այ դու փորձիր մեկ օր հետևել, թե ակումբ «մտնող-դուրս եկողները» ավելի շատ ո՞ր թեմաներն են կարդում կամ ո՞ր թեմաներում գրառումներ անում: «Նոր գրառումներ» բաժնում երբ նայես՝ առաջնորդում են Offtopner-ը, դեսից-դենիցը, ժամանցն ու ի՞նչ կա չկան: Իսկ գրականություն, արվեստ ու մշակույթ, պատմություն ու էլի քանի՜-քանի՜ լավ թեմաներ ետ են մղվել ասես, չեն էլ ընթերցվում: Ու թող հազար անգամ ներող լինեն այն ակումբցիները, ովքեր իհարկե միշտ էլ լինում են այդ թեմաներում ու շոշափում են գլոբալ հարցեր, այնուամենայնիվ, կազմում են ակումբցիների փոքրամասնությունը, կասեի 20%: Ահա և ձեզ պատասխան…չկա այդ ձևավորված խավը, այդ կորիզը, որը պիտի տաներ մեր ժողովրդին իր ետևից: Իսկ նվիրյալ մտավորականներն էլ «խեղդվում» են միջինությունների արանքում, կամ թողնում ու հիասթափված հեռանում են: Ու դա ավաղ նկատվում է նաև ակումբում:

ihusik
28.03.2007, 16:26
Դե իհարկե, ամեն ժողովուրդ արժանի է ինչպես իր իշխանությանը, այնպես էլ իր մտավորականությանը... Չնայած լավ կլիներ, որ մտավորականությունն իրեն տրված մտքի ուժի շնորհիվ հասարակությունից մեկ քայլ առջևում լիներ ու իր ետևից տաներ մնացածին: Անհատ մտածողներ են պետք, այլ ոչ թե ամբոխի ենթակա կամակատարներ, որոնց ուշադրությունը նյութական հարստությունն է, այլ ոչ թե մտքի, այդ իմաստով այո, շատ մտավորականներ նյութական, բայց ոչ մտավոր աղքատության մեջ են ապրել ու արարել ժողովրդի ապագան:

<<Միտքն (Գաղափարն) է կառավարում աշխարհը>>: - Պլատոն

Philosopher
28.03.2007, 16:31
Եկեք վերցնենք մասնակի դեպք՝ հենց մեր ակումբն ու քննարկենք, քանի՞ տոկոս է կազմում մտավորականությունը հենց ա՛յս միջավայրում: Philosopher ջան, քանի որ թեման հենց դու ես բացել, հարցս քեզ եմ ուղղում: Այ դու փորձիր մեկ օր հետևել, թե ակումբ «մտնող-դուրս եկողները» ավելի շատ ո՞ր թեմաներն են կարդում կամ ո՞ր թեմաներում գրառումներ անում: «Նոր գրառումներ» բաժնում երբ նայես՝ առաջնորդում են Offtopner-ը, դեսից-դենիցը, ժամանցն ու ի՞նչ կա չկան: Իսկ գրականություն, արվեստ ու մշակույթ, պատմություն ու էլի քանի՜-քանի՜ լավ թեմաներ ետ են մղվել ասես, չեն էլ ընթերցվում: Ու թող հազար անգամ ներող լինեն այն ակումբցիները, ովքեր իհարկե միշտ էլ լինում են այդ թեմաներում ու շոշափում են գլոբալ հարցեր, այնուամենայնիվ, կազմում են ակումբցիների փոքրամասնությունը, կասեի 20%: Ահա և ձեզ պատասխան…չկա այդ ձևավորված խավը, այդ կորիզը, որը պիտի տաներ մեր ժողովրդին իր ետևից: Իսկ նվիրյալ մտավորականներն էլ «խեղդվում» են միջինությունների արանքում, կամ թողնում ու հիասթափված հեռանում են: Ու դա ավաղ նկատվում է նաև ակումբում:
Իհարկե, դա այդպես է, և իմ միակ գրառումը Օֆֆթոփանոցում հենց այդ խնդրին էր նվիրված: Կարծում եմ` այնտեղ ասել եմ այն հիմնականը, ինչ պետք էր ասել` որպես արձագանք քո գրառմանը: Իսկ քո ասած` 20 %-ը միայն ակումբում է հնարավոր, ընդհանուր առմամբ` հայ հասարակության պարագայում այդ տոկոսը հաստատ երկնիշ չէ:

Մանոն
28.03.2007, 16:41
Իհարկե, դա այդպես է, և իմ միակ գրառումը Օֆֆթոփանոցում հենց այդ խնդրին էր նվիրված: Կարծում եմ` այնտեղ ասել եմ այն հիմնականը, ինչ պետք էր ասել` որպես արձագանք քո գրառմանը: Իսկ քո ասած` 20 %-ը միայն ակումբում է հնարավոր, ընդհանուր առմամբ` հայ հասարակության պարագայում այդ տոկոսը հաստատ երկնիշ չէ:
Լրիվ համամիտ եմ բարեկամս…

Sirop
30.03.2007, 00:22
Դե իհարկե, ամեն ժողովուրդ արժանի է ինչպես իր իշխանությանը, այնպես էլ իր մտավորականությանը...

էտ խոսքերը ասում էն որ ամենինչի պատասխանատվությունը գցեն ժողովուրդի վրա

բա մեղք չի ժողովուրդը

Root
25.04.2007, 10:45
Կան ... ինչու չկան .. բարձր ու մեծ ցուցանակների վրա նրանք քարոզում են այս կամ այն կուսակցության մի քանի նշանաբառ, իսկ մարդկանց այս ամբողջ պատմությունից միայն մի բան է հետաքրքրում ` ինչքան ստացան դրա համար...