Միջեկեղեցական լուրեր

[yerevanci]

Վորոնեժում դատարանը պայմանական ժամկետի է դատապարտել ռուս իսլամիստին` ջիհադի կոչերի համար

Վորոնեժ. Վորոնեժի Կոմինտերնովսկի շրջանի դատարանը Վորոնեժի պետական համալսարանի 21-ամյա ուսանող Անտոն Եվստրատովին մեղավոր է ճանաչել կրոնական թշնամանքի սերմանման մեջ, ասվում է շրջանի Անվտանգության դաշնային ծառայությւան վարչության (ԱԴԾՎ) մամլո հաղորդագրության մեջ:
Անցյալ տարվա հուլիսին ՌԴ Քրեական օրենսգրքի 282-րդ հոդվածի առաջին մասով (ատելության կամ թշնամանքի սերմանում ըստ ազգային, կրոնական, սոցիալական կամ ռասայական պատկանելության) Եվստրատովի նկատմամբ հարուցվել էր քրեական գործ` ՌԴ դատախազությանը կից նախաքննության կոմիտեի կողմից` ԱԴԾՎ և ՆԳԳՎ ծայրահեղականությանը հակազդեցության կենտրոնի նյութերի հիման վրա:
Ըստ հետաքննության նյութերի` Եվստրատովը, ընդունելով իսլամ, ստեղծել է «Վորոնեժը` իսլամի տարածք» կայքէջը, որտեղ պրոպագանդել է արմատական հայացքներ և ջիհադ` զինված պայքար անհավատների դեմ: Նա նաև տեղադրել է իր հոդվածներն ահաբեկչական ուղղվածության կայքէջերում:
ՌԴ Արդարադատության նախարարության դատական փորձաքննության Վլադիմիրյան լաբորատորիայի կողմից անցկացված համալիր լեզվաբանական և հոգեբանական փորձաքննության արդյունքում պարզվել է, որ Եվստրատովի մի շարք հրապարակումներ արտահայտված արմատական բնույթ ունեն:
Դատարանը քննել է գործը հատուկ կարգով, քանի որ մեղադրյալը լիովին ընդունել է իր հանցանքը, և Եվստրատովին սահմանել է 1 տարի պայմանական պատիժ` 1 տարի փորձնական ժամկետով:

Աղբյուրներ` <<Ինտերֆաքս-Ռելիգիա>> / <<Սեդմիցա.Ռու>>

[yerevanci]

Բրիտանացիների մեծամասնությունը պատկերացնում է դժոխքը որպես հավերժական թռիչք ինքնաթիռով` երեխաների, փոփ աստղերի և քաղաքական գործիչների հետ

Լոնդոն. «The Scotsman» թերթը գրում է, որ բրիտանացիների մեծամասնությունը պատկերացնում է դժոխքը որպես հավերժական թռիչք ինքնաթիռով` երեխաների, փոփ աստղերի և քաղաքական գործիչների հետ: Նման արդյունքներ է տվել այն ուսումնասիրությունը, որին մասնակցել է 1000-ից ավելի մարդ:
Բրիտանացիների կարծիքով` դժոխքում կա միայն մեկ զբաղմունք` հեռուստացույցով ռեալիթի-շոուների դիտում, իսկ ուղևորներին կերակրում են միայն մեկ ճաշատեսակով` դոնդողածածկ օձաձկով: Ընդ որում հետևի բազկաթոռին պետք է նստի կառավարության ղեկավար Գորդոն Բրաունը, իսկ առջևի բազկաթոռին` խռմփացնող անծանոթը:
Հարցվածների մեծամասնությունն այդ նույն ինքնաթիռում գտնվող հայտնի մարդկանց ցանկում ընդգրկել է մոդել Ջորդանին (Քեթի Փրայս), երգչուհի Էմի Ռայնհաուսին, կատակերգակ Ռասել Բրենդին, հեռոսւտահաղորդավարուհի Քերի Քաթոնին և Դևիդ Բեքհեմի կնոջը` Վիկտորյային:
Բացի գործող վարչապետից, բրիտանացիների` դժոխքի մասին ունեցած պատկերացումներում առկա քաղաքական գործիչների թվում են Նիք Գրիֆինը և Ջորջ Բուշը:

Աղբյուրներ` “Lernta.Ru” / <<Սեդմիցա.Ռու>>

[yerevanci]

Սկսել է գործել ԱՊՀ և Բալթյան երկրների քրիստոնեական միջկոնֆեսիոնալ խորհրդակցական կոմիտեի պաշտոնական կայքէջը

Մոսկվա. ԱՊՀ և Բալթյան երկրների քրիստոնեական միջկոնֆեսիոնալ խորհրդակցական կոմիտեի (ՔՄԽԿ) պաշտոնական կայքէջի շնորհանդեսը տեղի է ունեցել նորացված կոմիտեի առաջին պլենար նիստի շրջանակներում: Նիստը կայացել է փետրվարի 4-ին, «Դանիլովսկոյե» հյուրանոցում: Կայքէջը ներկայացրել է ՔՄԽԿ գործադիր քարտուղար Յուրի Զուդովը:
Ինչպես նշվում է կայքէջում, ՔՄԽԿ-ի նպատակն է քրիստոնեական կոնֆեսիաների միջազգային, միջկրոնական և այլ հակամարտությունների կանխարգելման ուղղությամբ համագործակցության և կայունության ապահովումը: ՔՄԽԿ պլանների մասին առավել մանրամասն տեղեկատվություն կարելի է ստանալ համապատասխան բաժնում, որտեղ տեղադրված են նաև տվյալներ կոմիտեի կառուցվածքի մասին:
Կայքէջը տեղեկություններ է տալիս ՔՄԽԿ անդամ 22 եկեղեցիների մասին, որոնց թվում են Ռուս Ուղղափառ, Վրաց Ուղղափառ, Հայ Առաքելական, Հռոմի Կաթոլիկ եկեղեցիները, առաջատար բողոքական հարանվանություններ: Ժամանակի ընթացքում մասնակիցների անվանումներն ապահովված կլինեն համապատասխան կայքէջերին հղումներով:
Կայքէջի ստեղծողները մտադիր են Համացանցում օպերատիվորեն տեղադրել տեղեկատվություն այն միջոցառումների մասին, որոնք տեղի կունենան ՔՄԽԿ-ի աշխատանքի շրջանակներում: Ինչպես լրագորղներին փետրվարի 4-ին կայացած մամլո ասուլիսի ընթացքում հայտնել է ՔՄԽԿ համանախագահ Իլարիոն միտրոպոլոիտը, կոմիտեի պլաններում ոչ միայն բոլոր քրիստոնյաների համար կարևոր թեմաների շուրջ ֆորումների և կոնֆերանսների, այլև «հովվական բնույթի միջոցառումների» անցկացումն է (որպես օրինակ բերվել է Սուրբ Ծննդյան տոնին նվիրված մանկական ցերեկույթը` անցկացված ՄՊ ԱԵԿԲ-ի և Ավետարանական քրիստոնյաների ռուսաստանյան միության կողմից համատեղ` մոսկովյան ուղղափառ ծխերից մեկի բազայի վրա), և հնարավոր է` համատեղ ուխտագնացություններ: «ՔՄԽԿ աշխատանքը չի սահմանափակվի միայն նիստերով և հայտարարություններով», - խոստացոել է ՔՄԽԿ ղեկավարը:
ՔՄԽԿ առաջին առաջին պլենար նիստի ընթացքում արել են առաջարկներ այն մասին, որ մշակվեն կոմիտեի անդամների «արագ արձագանքման» մեխանիզմներ այն կամ այն հասարակական հիմնախնդրին: Իլարիոն միտրոպոլոիտի խոսքերով` նման հնարավորություն ունեն ՔՄԽԿ համանախագահները և խորհուրդը, և նման առաջարկներ լինելու դեպքում դրանք կարելի կլինի տեղադրել նոր կայքէջում: Այնտեղ էլ կարելի կլինի ծանոթանալ նորացված միջկոնֆեսիոնալ խորհրդակցական մարմնի հիմնական ամփոփիչ նյութերին:
ՔՄԽԿ կայքէջի աշխատանքը, ինչպես նաև սահմանադրական գործունեությունն իրականացվում է ՔՄԽԿ մասնակից կազմակերպությունների անդամավճարների հաշվին:

Աղբյուրներ` «Բլագովեստ-ինֆո» / «Սեդմիցա.Ռու»

[yerevanci]

Իտալացի գիտնականները կարծում են, թե հավատն առ Աստված կօգնի կասեցնել Ալցհեյմերի հիվանդության զարգացումը
Աղբյուրներ`«CNL-News» / «Սեդմիցա.Ռու»

Պադուա. Իտալիայի Պադուա քաղաքի համալսարանի գիտնականները հետազոտությունից հետո եկել են այն եզրակացության, որ կրոնը և Աստծո նկատմամբ հավատը կօգնեն կասեցնել Ալցհեյմերի հիվանդության զարգացումը:
Գիտնականները մեկ տարվա ընթացքում հետազոտել են «Ալցհեյմերի հիվանդություն» ախտորոշմամբ 64 հիվանդների` բաժանելով նրանց երկու խմբի` կրոնական համոզմունքների բարձր և ցածր մակարդակներով հիվանդներ:
Գիտնականներն ուշադիր հետևել են նրանց վիճակին և այդ հիվանդությանը բնորոշ` կենսական ունակությունների կորստյան տեմպերին: Հաշվի են առնվել ամենատարրական ունակությունները, ինչպես օրինակ` ինքնուրույն հագնվելը կամ ուտելը, ինչպես նաև այդպիսի հիվանդների համար առավել բարդ առաջադրանքներ, օրինակ` հեռախոսով զրուցելը: Արդյունքում պարզվել է, որ հավատացյալ հիվանդների մոտ հիվանդության և դրա հետևանքների զարգացման տեմպերը 10%-ով ցածր են:
«Քաջ հայտնի է, որ մարդկանց հետ շփումները նվազեցնում են ֆիզիկական և մտավոր անկման տեմպերը, սակայն մեր դեպքում ակնհայտ է այն, որ հավատը ևս օգնում է կասեցնել հիվանդության զարգացումը», - ասել է հետազոտական խմբի դեկավար պրոֆեսոր Էնցո Մանցարոն, ում զեկույցը հրապարակվել է «Ալցհեյմերի հիվանդության վերջին ուսումնասիրություններ» մասնագիտացված ամսագրում:
«Այսպիսով, ոչ միայն սոցիալական ակտիվությունն է խիստ կարևոր, այլև հոգևոր ամբողջականությանն ուղղված մարդու ներքին ունակությունը», - եզրակացրել է գիտնականը:

[yerevanci]

Մի քանի հազար հավատացյալ ԱՄՆ-ում մասնակցում է «Կյանքի մեկ ամիս» արշավին
Աղբյուր` Անատոլի Խոլոդյուկ` հատուկ «Սեդմիցա.Ռու»-ի համար

Հյուսթոն. Փետրվարի 7-ից սկսած ամերիկյան Թեքսաս նահանգի մի շարք քաղաքներում տարբեր հարանվանությունների 35 եկեղեցիների մի քանի հազար հավատացյալներ կանցկացնեն մեկ ամիս այնպես, ասես դրանք այս աշխարհում իրենց կյանքի վերջին օրերն են: Այդ մասին հաղորդել է«CNL-News» տեղեկատվական գործակալությունը:
Սուլֆուր Սփրինգս քաղաքի «The Way Bible» եկեղեցու ավագ պաստոր և արշավի համակարգող Ջոել Թայմեյերը կարծում է, թե ամենևին էլ բոլորը չեն պատկերացնում, թե ինչպես կանցկացնեն իրենց կյանքի վերջին 30 օրերը: Անցկացվող արշավի նպատակն էլ հենց հավատացյալներին կոչ անելն է ապրել այնպես, ասես իրենց մնացել է վերջին օրերն ապրել այս աշխարհում:
Նախաձեռնող խումբը կհետևի ակցիայի մասնակիցներին և կֆիքսի նրանց կյանքում տեղի ունեցող բոլոր փոփոխությունները:

[yerevanci]

Երուսաղեմում հայտնաբերվել է 1500 տարվա վաղեմության փողոց
Աղբյուրներ` «Բլագովեստ-ինֆո» / «Սեդմիցա.Ռու»

Երուսաղեմ. Երուսաղեմի հին քաղաքի Ջաֆա դարպասներից դեպի արաբական շուկա տանող փողոցի վերանորոգման ընթացքում իրականացվող հնագիտական գտածոները հաստատել են Սուրբ քաղաքի պլանի ստույգ լինելն այսպես կոչված Մադաբայի քարտեզին: «Zman.com»-ը հաղորդել է, որ այդ մասին փետրվարի 10-ին հայտնել են Իսրայելի հնագիտակական վարչությունում:
Մադաբայի քարտեզը խճանկարային քարտեզ-պաննո է` նկարված Հորդանանի Մադաբա քաղաքի Սբ. Գևորգ ուղղափառ եկեղեցու հատակին: Այն Սբ. Երկրի ամենահին քարտեզն է: Ստեղծվելով բյուզանդացի վարպետների կողմից 6-րդ դարում, քարտեզը կրկին հայտնաբերվել է 19-րդ դարում, Հուստինանոս մեծ կայսեր դինաստիայի կառավարման շրջանին վերագրվող հին եկեղեցու տեղում նորի կառուցման ընթացքում: Քարտեզի կենտրոնում Երուսաղեմի սխեմատիկ պատկերն է, որտեղ աչքի են ընկնում Տիրոջ Գերեզմանի եկեղեցին և քաղաքային բազմաթիվ դարպասները: Ըստ քարտեզի` արևելյան կողմից Երուսաղեմ էին մտնում հսկայական դարպասներով: Ճանապարհը բերում էր ուղիղ դեպի կենտրոնական և, ըստ էության` քաղաքի այդ մասի միակ փողոցը: Արդեն շատ տասնամյակներ մասնագետները քարտեզը համարում են շատ ճգրիտ և հուսալի, սակայն մինչ այժմ չի հաջողվել գտնել այդ գլխավոր փողոցի գոյության ապացույցը:
«Մշակութային մի քանի շերտերի տակ` ներկայիս փողոցի մակերեսի տակ 4,5 մետր խորության վրա, մենք հայտնաբերել ենք հսկայական քարե սալիկներ, որոնցով սալարակված էր հինավուրց Սուան փողոցը: Յուրաքանչյուր սալիկի երկարությունը համարյա 1 մետր է»:
Սուան փողոցի կողքով անցնող Դավիթ փողոցի հնագիտական պեղումները հնարավոր են դարձել միայն այն բանից հետո, երբ Երուսաղեմի զարգացման վարչությունը մի քանի ամիս առաջ սկսեց Հին քաղաքի հիմնական մուտքերից մեկի ինֆրակառույցի կատարելագործման աշխատանքները: Եվ ահա, այդ պեղումների շնորհիվ էլ ցնցող հայտանգործություն կատարվեց` գտնվեց առնվազն 1500 տարվա վաղեմության փողոցը:

[yerevanci]

Օրենբուրգում աշխատանքը կսկսի «Գթասրտության տրոլեյբուս»-ը
Աղբյուրներ` «ՌԻԱ Նովոստի» / «Սեդմիցա.Ռու»

Օրենբուրգ. Օրենբուրգում սկսվել է «Կատարիր բարիք» ակցիան` նվիրված Մեծ Պահքին: Ակցիայի շրջանակներում քաղաքով կշրջի «Գթասրտության հատուկ տրոլեյբուս»-ը` նախատեսված անտուն մարդկանց օգնության համար: Այդ մասին հաղորդել է Օրենբուրգի թեմի մամլո ծառայության ներկայացուցիչը:
«Օրենբուրգի և Բուզուլուկի Վալենտին միտրոպոլիտի օրհնությամբ Մեծ Պահքի ընթացքում Օրենբուրգի և Բուզուլուկի թեմի սոցիալ-միսիոներական գործակալությունն Օրենբուրգի վարչակազմի հետ համատեղ իրականացնում է «Կատարիր բարիք» ակցիան: Ուղղափառ եկեղեցին միշտ օգնում է աղքատներին և տառապյալներին, առավել ևս ընդունված է դա անել պահոց շրջաններում», - ասել է մամլո ծառայության ներկայացուցիչը:
Նրա խոսքերով` կյանքի դժվարին իրավիճակներում հայտնվածների, պարզ ասած` անտուն մարդկանց համար կազմակերպվելու է տաք սնունդ: Նրանք ուտելիք կստանան «գթասրտության տրոլեյբուս»-ում` ակցիայի համար հատուկ սարքավորված տրոլեյբուսում, որը ճաշի ժամից մինչև ընթրիքի ժամը հերթապահելու է Օրենբուրգի երկաթուղային կայարանի մոտի հրապարակում, որը սովորաբար քաղաքի անտուն մարդկանց հիմնական հավաքատեղիներից մեկն է:
Դրանից բացի, այդ կարիքավոր մարդկանց բժշկական, իրավաբանական կամ այլ սոցիալական օգնություն կցուցաբերեն համապատասխան ծառայությունների աշխատակիցները, ովքեր նույնպես կհերթապահեն այդ նույն տրոլեյբուսում: Նախատեվում է նաև տաք կոշկեղենի և հագուստի տրամադրում և ուժերի ներածին չափով անհրաժեշտ այլ օգնություն», - ավելացրել է մամլո ծառայության ներկայացուցիչը:
«Գթասրտության տրոլեյբուս»-ը կխնամի քաղաքի անտուն մարդկանց Մեծ Պահքի ամբողջ ընթացքում: Ակցիան կավարտվի ապրիլի 4-ին:

[yerevanci]

Բենեդիկտոս XVI պապն այցելել է Հռոմի կայարանում գտնվող աղքատների տուն
Աղբյուր` «Սեդմիցա.Ռու»

Հռոմ. Հռոմի Բենեդիկտոս XVI պապը կոչ է արել իշխանությանը և մասնավոր անձանց «կրկին բացահայտել գթասրտության արժեքները» հատկապես մեր աշխարհում, որտեղ «գերիշխում է օգուտին և սեփական շահերի պաշտպանությանը հետամուտ լինելու տրամաբանությունը»: Այդ հայտարարությոնը պապն արել է փետրվարի 14-ին աղքատ և անտուն մարդկանց կենտրոն այցի ընթացքում, որը կազմակերպվել է մարյաքաղաքի կենտրոնական «Տերմինի» կայարանում: Այդ մասին հաղորդել է “Newsru.com”-ը` հղում անելով «ԻՏԱՌ-ՏԱՍՍ»-ին:
Այդ թեման պապը շարունակել է ավանդական կիրակնօրյա “Angelus Domini” («Տիրոջ հրեշտակ») աղոթքի ընթացքում, որը նա արտասանել է իր աշխատանքային սենյակի պատուհանից, որը նայում է Վատիկանի Սբ. Պետրոս հրապարակին:
«Օգնությունն աղքատներին քրիստոնյաների գլխավոր խնդիրներից մեկն է», - ասել է Հռոմի պապը: Այդ նույն ուղերձում պապը նշել է, որ «քրիստոնեական արժեքները Եվրոպայի միասնության հիմքն են»:
Ողջունելով լեհ ուխտագնացներին, Բենեդիկտոս XVI պապը հիշեցրել է հին մայրցամաքի սուրբ հովանավորներ առաքելահավասար Կիրիլ և Մեֆոդի սլավոն քարոզիչների հոգևոր դերի մասին և ընդգծել, որ «խաչով կնքումը, Քրիստոսի Ավետարանը և սրբակյաց կյանքն ըստ ավետարանական պատվիրանների Եվրոպայի ժողովորդների հոգևոր ուժի հիմքն են»: Նա աղոթքով խնդրել է սլավոն առաքյալներին շարունակել «տանել ժողովուրդներին հավատի ճանապարհով»:
Նույն օրը հովվապետը շնորհավորել է ասիացի ժողովուրդներին, «մասնավորապես Չինաստանի, Վյետնամի և այլ երկրների բնակիչներին ըստ լուսնային օրացույցի Ամանորի առիթով, որի նշումն ըստ պապի` «օգնում է ամրապնդել այդ ժողովուրդների մշակույթում խորապես արմատակալած բարոյական և հոգևոր ժառանգությունը»:

[yerevanci]

Գիտնական իմունաբանների կարծիքով` խունկը կարող է կիրառվել քաղցկեղային հիվանդությունների բուժման ժամանակ
Աղբյուր` Անատոլի Խոլոդյուկ` հատուկ «Սեդմիցա.Ռու»-ի համար

Վաշինգտոն. Եկեղեցական կյանքում կիրառվող խունկը շուտով կարող է օգտագործվել քաղցկեղային հիվանդությունների բուժման ժամանակ: Այդպես է կարծում գիտնական իմունաբան Մահմուդ Սուխալին:
ԱՄՆ-ի Օքլահմա քաղաքի համալսարանի կոլեգաների հետ համատեղ իրաքցի Մահմուդ Սուխալին կատարում է փորձեր` կապված խնկի խեժից ակտիվ բաղադրիչի անջատման հետ, որը հնարավոր է, որ կարողանա կասեցնել քաղցկեղային բջիջների տարածումը: Այդ մասին հայտնում է կաթոլիկ լուրերի գերմանական գործակալությունը:
Ներկայումս կատարվում են փորձեր կենդանիների վրա: Նրանց ներարկում են խնկի ենթադրյալ բաղադրիչ պարունակող էմուլսիայի հատուկ լուծույթ:
Խնկածառն աճում է Սալալային մոտիկ Օմանա լեռներում: Նրա այլ տեսակներ աճում են Եմենում, Սոմալիում, Եթովպիայում, Էրիթրեայում, Սուդանում և Հնդկաստանում:
Անուշաբույր խունկն արդեն 9000 տարեկան է և կիրառվում է կրոնական և բժշկական նպատակներով: Այդ մասին հայտնում է կաթոլիկ լուրերի գերմանական գործակալությունը:
Խնկի ծուխը պարունակում է ինցենսոլի ացետատ, որն ունի հակաանկումային ազդեցություն:
Խնկի խեժն օգտագործվում է հոմեոպաթիայում, պարֆյումերիայում և արոմաթերապիայում: Դրանից պատրաստվում են սպեղանիների, ատամնամածուկների և բուժահեղուկների որոշ տեսակներ:

[yerevanci]

Մոսկվայում «Հոգու էկոլոգիան` մարդկության փրկություն» դևիզի ներքո տեղի կունենա «Ոսկե դյուցազն» կինոֆորումը
Աղբյուրներ` «Ինտերֆաքս-Ռելիգիա» / «Սեդմիցա.Ռու»

Մոսկվա. Փետրվարի 18-21-ը Մոսկվայում «Հոգու էկոլոգիան` մարդկության փրկություն» դևիզի ներքո տեղի կունենա էկոլոգիական ֆիլմերի Երկրորդ միջազգային «Ոսկե դյուցազն» կինոփառատոնը: Այդ մասին հայտնել են ֆորումի կազմակերպիչները:
Կինոփառատոնը կբացվի փետրվարի 18-ի երեկոյան էկոլոգիական ֆիլմերի Առաջին միջազգային «Ոսկե դյուցազն» կինոփառատոնում հաղթած «Ռուսական արգելոց» ֆիլմի ցուցադրությամբ:
Ցուցադրումից առաջ տեղի կունենա հանդիպում ֆիլմի հեղինակների` ռեժիսոր Վալենտին Տիմոչենկոյի և գլխավոր հերոս ավագ երեց Վիկտոր Սալտիկովի հետ:
Փետրվարի 19-ին կինոփառատոնի շրջանակներում տեղի կունենա գիտական կոնֆերանս` մշակույթի, քաղաքական գործիչների, էկոլոգների և ԶԼՄ ներկայացուցիչների մասնակցությամբ:
Փետրվարի 21-ին փառատոնի հանդիսավոր փակման ժամանակ կինոֆորումի միջազգային ժյուրին կհայտարարի գլխավոր պարգևները շահողներին: Դրանից բացի, միջազգային բարեգործական «Էկոգրադ» ֆոնդը կհանձնի «Երկրային գեղեցկություն» պարգևը` երկրագնդի բնության լավագույն պատկերման համար:
Ֆորումի ծրագրում 56 փաստագրական ֆիլմեր են Ռուսաստանից, Ադրբեջանից, Բելոռուսից, Բուլղարիայից, Բոսնիայից և Հերցոգովինայից, Վրաստանից, Ղրղզստանից, Սերբիայից, Ուկրաինայից և նվիրված են մարդու և մոլորակի վերապրելու հրատապ խնդիրներին:
Մրցույթից դուրս ծրագրում կլինի “Ekowiki.ru” երիտասարդական էկոլոգիական պորտալի, կենդանիների իրավունքների պաշտպանների «Վիտա»կենտրոնի ֆիլմերի ցուցադրություն:
Ցուցադրությունների հիմնական հրապարակը կդառնա կինեմատոգրաֆիստների կենտրոնական տունը:

[yerevanci]

Արդեն 8-րդ տարին է, որ ՌԴ նախագահի գործերի վարչության սննդի բոլոր կոմբինատներում Մեծ Պահքի ընթացքում սահմանվում է հատուկ ճաշացանկ
Աղբյուրներ` «Ինտերֆաքս-Ռելիգիա» / «Սեդմիցա.Ռու»

Մոսկվա. Արդեն 8-րդ տարին է, որ ՌԴ նախագահի գործերի վարչության սննդի բոլոր կոմբինատներում Մեծ Պահքի ընթացքում սահմանվում է հատուկ ճաշացանկ:
«Մենք ջանում ենք մի կողմից` պահպանել ուղղափառ ավանդույթյը, մյուս կողմից` Կրեմլի ճաշարանների այցելուներին առաջարկել առողջ սնունդ` պարունակող առողջության պահպանման համար անհրաժեշտ թվով կալորիաներ», - հայտարարել է գործերի վարչության մամլո քարտուղար Վիկտոր Խրեովը:
Նրա խոսքերով` Մեծ Պահքի ընթացքում խոհարարները հյուրերին կառաջարկեն ճաշացանկի 14 տարբերակ և ընդհանուր առմամբ 50 ճաշատեսակ, դրանց թվում` բանջարեղենային սալաթներ, թթվեցրած կաղամբով և սնկով սուպ, կարտոֆիլի թխվածքաճաշեր, վարսակաձավարի շիլա` տանձով, փլավ` չորամրգերով, կիսելներ, կոմպոտներ:
Բոլոր բաղադրատոմսերը համաձայնեցվել են ուղղափառ հոգևորականների հետ, ճաշի միջին գինը կլինի 80-100 ռուբլի:
Ամեն օր ՌԴ նախագահի գործերի վարչությանը ենթակա Կրեմլի, կառավարության, Պետդումայի, Դաշնային Խորհրդի, Սահմանադրական Դատարանի և ԿԸԿ-ի ճաշարաններում սնվում է շուրջ 16 հազար մարդ, որոնցից 16 %-ն ըստ Խրեպկովի` պահք է պահում:
Մեծ Պահքն այս տարի սկսվում է փետրվարի 15-ին և տևում 7 շաբաթ` մինչև ապրիլի 4-ը, երբ համայն աշխարհի քրիստոնյաները տոնում են Սբ. Զատիկը:

[yerevanci]

Իռլանդացի հնաբանները հաստատել են, որ միջնադարյան կաթոլիկ վանքերի վանահայրերը ճոխ կյանք են վարել
Աղբյուրներ` «Lenta.Ru» / «Սեդմիցա.Ռու»

Դուբլին. իռլանդացի հնաբանները հերթական անգամ հաստատել են միջնադարի վանահայրերի կաթոլիկ վանքերի վարած ճոխ կյանքի մասին պատկերացումները: Ինչպես հաղորդում է “Lenta.Ru”-ն` հղում անելով “The Irish Times”-ին, Քիլքենիա քաղաքում պեղումների ժամյանակ հայտնաբերվել է Դույսկեի` XIV դարում ապրած վանահոր տունը: Դատելով նրա սեղանատան պահպանված մնացորդներից` վանահայրը կերել է տապակած կարապ և տավարի սթեյք (խորոված) և խմել Ֆրանսիայի Բորդո գավառից բերված գինի, ինչն իրենց կարող էին թույլ տալ միայն ամենահարուստ իռլանդացիները:
Դրանից բացի, նրա տանը եղել է զուգարան, ինչը ճոխություն էր XIV դարի Իռլանդիայում: Այն անցք էր գետնին` փայտե նստարանով, իսկ թափոնները հատուկ խողովակով լցվում էին բակի քարե փոսի մեջ: Աղտեղությունների հետ միասին այդ նույն փոսն է ընկել նաև վանահոր գոտին: Հնաբանները գտել են գոտու պահպնված ճարմանդը: Խոհանոցում ևս եղել է խողովակ` թափոնների համար:
Դույսկեի վանքը, որի վանահայրը նաև հնաբանների պեղած տան տերն էր, Իռլանդիայի գլխավոր կրոնական կենտրոններից մեկն էր ընդհուպ մինչև 1537թ., երբ Հենրիխ VIII թագավորը Եկեղեցուց խլեց կալվածքները: Տունը հողամասի հետ միասին բաժին հասավ “Rothe” վաճառականական տանը, որն էլ XVII դարի սկզբում այնտեղ կառուցեց 3 շքեղ առանձնատուն:

[yerevanci]

Տոմսկի կատարածուները«Եհովայի վկաներ»-ի ավանից խլել են մանկանը և վերադարձրել նրան մորը
Փետրվար 18, 2010թ.
Աղբյուրներ` «Ինտերֆաքս-Ռելիգիա» / «Սեդմիցա.Ռու»

Տոմսկ. Իրականացնելով ապահարզանի գործընթացի շուրջ դատարանի որոշումը, Տոմսի մարզի Սոցիալական խնամակալության դաշնային ծառայության վարչության (ՍԽԴԾՎ) աշխատակիցները «Եհովայի վկաներ»-ի ավանից խլել են մանկանը, որտեղ նա հոր հետ էր:
Տոմսի մարզի ՍԽԴԾՎ ղեկավարի տեղակալ Գենադի Կալյուժնին հաղորդել է, որ ապահարզանի գործընթացի ընթացքում դատարանը որոշել էր 8-ամյա աղջկան թողնել Մոսկվայում բնակվող մոր հետ, սակայն հայրն աղջկան տարել է աղանդի` Տոմսի մարզի Մոլչանովսկոյե շրջանում գտնվող ավան:
Անցյալ տարվա սեպտեմբերին դատական կատարածուները մեկնել են Մոլչանովսկոյե շրջան, որտեղ աղանդի աղոթատանը փաստորեն բռնությամբ իրականացրել են դատարանի որոշումը և մանկանը հանձնել մորը:
«Պետք էր փրկել մանկանը: Նրա կյանքը և առողջությունն ակնհայտորեն վտանգված էին կրոնական այդ աղանդում: Երեխային դաստիարակել էին, որ եթե ինչ-որ բան այնպես չլինի, ինչպես պետք է, անհրաժեշտ է ինքնասպան լինել: Այնտեղ մեկնած կատարածուներին մենք ապահովել էինք օպերատիվ թաքստոցով` միլիցիայի ուղեկցությամբ: Նրանց սպառնացել էին ինքնասհրկիզմամբ, անիծել», - ասում է Գ. Կալյուժնին:
ՍԽԴԾՎ շրջանային աշխատակիցներն իրավապահպան մարմիններին հաղորդել են Մոլչանովսկոյե շրջանի տարածքում աղանդի ավանի գտնվելու վայրի մասին:

[yerevanci]

Հռոմի Բենեդիկտոս XVI պապին հրավիրել են Գերմանիայի Տրիր քաղաք, որտեղ պահպանվել է Հիսուս Քրիստոսի շապիկը
Փետրվար 17, 2010թ.
Աղբյուր` Անատոլի Խոլոդյուկ` հատուկ «Սեդմիցա.Ռու»-ի համար

Տրիր. Տրիրի կաթոլիկ եպիսկոպոս Շտեֆան Ակերմանը հրավիրել է Հռոմի Բենեդիկտոս XVI պապին ուխտի Տրիր քաղաք, որտեղ IV դարից ի վեր պահպանվում է Հիսուս Քրիստոսի` առաքելահավասար Ելենա թագուհու կողմից Սուրբ Երկրից բերված շապիկը: Այդ մասին հաղորդել է “KNA” գործակալությունը:
Հրավերը նվիրված է 2012թ. Տրիրում նշանակալից մի իրադարձության: Ապրիլի 13-ից մայիսը 13-ը ժամանակահատվածում քաղաքը կնշի 500-ամյակն այն ժամանակվանից ի վեր, ինչ Մաքսիմիլանոս I կայսեր հրամանով տեղի մայր տաճարում առաջին անգամ ցուցադրվել է Քրիստոսի շապիկը (ըստ գերմանական ավանդույթի` “Der Heiliger Rock”):
Սպասվում է, որ 2012թ. ապրիլի 13-ից մայիս 13-ը ժամանակահատվածում աշխարհի տարբեր երկրներից Տրիր կժամանեն բազմաթիվ ուխտագնացներ` երկրպագելու յուրահատուկ մասունքին, որը կցուցադրվի մայր տաճարում` համընդհանուր դիտման համար:
Վերջին անգամ Հիսուս Քրիստոսի շապիկը ցուցադրվել է 1996թ., երբ Տրիր այցելեց շուրջ 700 հազար ուխտագնաց: Մասունքը ցուցադրվել է նաև 2005թ. օգոստոսի 13-ին` կաթոլիկ երիտասարդության համաշխարհային օրերի անցկացման ընթացքում, որը տեղի է ունեցել Գերմանիայում:
Մասունքին երկրպագելու նպատակով Տրիր ուխտագնացներ են այցելել 1513, 1514, 1515, 1516, 1517, 1524, 1531, 1538, 1545, 1655, 1810, 1844, 1891, 1933, 1959 և 1996թթ.:

[yerevanci]

Այսօր արևմտյան քրիստոնյաների համար սկսվել է Մեծ Պահքը
Փետրվար 17, 2010թ.
Աղբյուր` «Սեդմիցա.Ռու»

Վատիկան. այս տարվա փետրվարի 17-ը Արևմտյան Եվրոպայում Մեծ Պահքի առաջին օրն է:
Ըստ ավանդույթի` Մեծ Պահքը կաթոլիկների մոտ սկսվում է Մոխրի չորեքշաբթի օրը Սբ. Պատարագի մատուցմամբ, որի ընթացքում տեղի է ունենում հավատացյալների գլխին մոխիր լցնելու ծիսակատարություն:
Փետրվարի 17-ին Վատիկանում ընդհանուր ընդունելության ընթացքում հավատացյալ հոտին իր ուղերձը Հռոմի Բենեդիկտոս XVI պապը նվիրել է այդ ծիսակատարությանը, ինչպես նաև Մեծ Պահքի` որպես քավության ժամանակաշրջանի, նշանակության բացատրությանը: Այդ մասին հաղորդել է «Վատիկան» ռադիոն:
Պապը հղում է արել Մարկոսի Ավետարանին, որն ընթերցվում է Մոխրի չորեքշաբթի օրը մատուցվող Սբ. Պատարագի ընթացքում. «Ժամանակը հասել է, և մոտեցել է Աստծո արքյությունը. ապաշխարեցեք և հավատացեք Ավետարանին» (Մարկ. 1:15)
Հենց այդ խոսքերով է հովվապետն օրվա պատարագի ընթացքում մոխիր լցրել հավատացյալ կաթոլիկների գլխին:
Մոխիր լցնելու ծիսակատարությունն ուղեկցվում է նաև հետևյալ ոսքերով. «Հող ես և հող էլ կդառնաս»:
Պապը կոչ է արել վերանորոգել քրիստոնյաների պարտականությունը` հետևել Քրիստոսին` աղոթելով Սբ. Աստվածածնի բարեխոսության համար: «Թող Նա` Քրիստոսին առաջինը հավատացողը, ուղեկից լինի մեզ այս 40 օրերին, որպեսզի մենք կարողանանք նշել Սբ. Զատիկը վերանորոգված և վերափոխված», - կոչ է արել հովվապետը:

[yerevanci]

Հնագետները Երուսաղեմում հայտնաբերել են մնացորդները պատի, որը հնարավոր է, որ Սողոմոնի տաճարի մի մասը լինի
Աղբյուր` Անատոլի Խոլոդյուկ` հատուկ «Սեդմիցա.Ռու»-ի համար

Երուսաղեմ. Իսրայելցի հետազոտողները Երուսաղեմում հայտնաբերել են ավերակները պատի, որը ենթադրաբար վերագրվում է, որ Սողոմոն թագավորի ժամանակներին: Այդ մասին հաղորդում են “KNA” և “Kipa” գործակալությունները` հղում անելով Երուսաղեմի համալսարանի տեղեկատվությանը:
Գիտնականների կարծիքթով` Տաճարի լեռան ստորոտի մոտ պեղումների ընթացքում հայտնաբերված 70 մետր երկարությամբ պատի ավերակները ենթադրաբար պատկանում են մ.թ.ա. X դարում ապրած իսրայելցի ամենահայտնի Սողոմոն թագավորի գահակալության ժամանակներում կառուցված առասպելական Առաջին տաճարին:

[yerevanci]

Լեհաստանում Ֆրեդերիկ Շոպենի 200-ամյակին նվիրված համերգը տեղի է ունեցել այն կաթոլիկ եկեղեցում, որտեղ մկրտվել է մեծ կոմպոզիտորը
Աղբյուր`«Սեդմիցա.Ռու»

Վարշավա. փետրվարի 22-ին` լեհ մեծ կոմպոզիտոր Ֆրեդերիկ Շոպենի 200-ամյակի օրը, կոմպոզիտորի երաժշտության հանդիսավոր համերգ է եղել Վարշավային մոտիկ Բրոխով քաղաքի կաթոլիկ եկեղեցում: Այդ մասին հաղորդում է <<ՌԻԱ-Նովոստի>>ն` հղում անելով “KAI” գործակալությանը:
Համերգից առաջ Սբ. Հովհաննես Մկրտիչ ծխի հոգևոր հովիվը հայտնել է, թե հենց այդ եկեղեցում է մկրտվել ապագա մեծ կոմպոզիտորը և ծնողների ցանկությամբ ստացել երկու անուն` Ֆրեդերիկ և Ֆրանցիշեկ, ինչի մասին գրառում կա մկրտությունների գրանցամատյանում:
Հոգևորականն ուշադրություն է հրավիրել նաև 1551-1561թթ. կառուցված բրոխովյան եկեղեցու «բացարձակ ակուստիկայի» և «շոպենյան» անկրկնելի միջավայրի վրա:
“Camereta di Versavia” նվագախմբի և երգչախմբի համերգը, որն ուղիղ եթեր է հեռարձակել լեհական հեռուստատեսությունը, բացել է Շոպենի տարվան նվիրված միջոցառումների շարքը: Հոբելյարի ստեղծագործություններից բացի` երաժիշտները կատարել են նաև Յոհան Սեբաստիան Բախի և Յոզեֆ Հայդնի ստեղծագործությունները:
Փետրվարի 22-ին Լեհաստանի Կաթոլիկ եկեղեցու առաջնորդ, Գնեզենի արքեպիսկպոս Հենրիկ Մուշինսկին հանդիսավոր պատարագ է մատուցել Վարշավայի Սբ. Խաչ եկեղեցում, որտեղ հանգչում է մեծ կոմպոզիտորի սիրտը, իսկ նրա դին հանգչում է Փարիզի Պեր Լաշեզ գերեզմանատանը:

[yerevanci]

Չինաստանում Աստվածաշնչի պահանջարկը գերազանցում է առաջարկը
Աղբյուր` «Սեդմիցա.Ռու»

Պեկին. Աստվածաշնչային Ընկերությունը հայտնում է Չինաստանում Աստվածաշնչի աճող պահանջարկի մասին: Միայն 2009թ. շուրջ կես միլիոն մարդ է քրիստոնեություն ընդունել, ինչի մասին հաղորդում է “CNL-News”-ը` հղում անելով “Chrsitian Today”-ին:
Թեև անցյալ տարի Չինաստանում տպվել և տարածվել է շուրջ 4 միլիոն Աստվածաշունչ, տարեցտարի աճող քրիստոնյաների թիվը նշանակում է, որ Աստվածաշնչի պահանջարկն այժմ գերազանցում է առաջարկը, ինչի մասին հաղորդում է Աստվածաշնչային Ընկերությունը:
Չինաստանում քրիստոնյաների պաշտոնական թիվը 28,6 միլիոն է, սակայն իրական թիվը շուրջ 90 միլիոն է, եթե նկատի ունենանք նրանց, ովքեր երկրպագում են Աստծուն անլեգալ տնային եկեղեցիներում:
Մեծ Բրիտանիայում գտնվող Աստվածաշնչային Ընկերությունը ֆինանսավորում է տպագիր Աստվածաշնչերի արժեքը, որպեսզի յուրաքանչյուր օրինակի գինը չանցնի 2 եվրոյից, ինչը կենսականորեն կարևոր է Չինաստանի գյուղերում բնակվող քրիստոնյաների համար, որտեղ ապրում է ծխականների 70 տոկոսը, և բնակչության կեսի օրական ապրուստը 2 եվրոյից էլ քիչ է:
Աստվածաշնչերը տպվում են “Amity Printing” պետական ընկերությունում, որտեղ տպվել է նաև Մաոյի կարմիր գրքույկը: 1987թ. հիմնադրվելուց ի վեր կառավարության հավանությամբ տպվել է շուրջ 70 միլիոն Աստվածաշունչ, որից 50 միլիոնը ստացել են չինացի հավատացյալները:

[yerevanci]

Փարիզի տեղի կունենա Սրբազան Ռուսիայի հոգևոր ժառանգությանը նվիրված միջազգային կոնֆերանս
Աղբյուր`«Սեդմիցա.Ռու»

Փարիզ. մարտի 1-ին Փարիզում` Բեռնարդինցիների հեղինակավոր կոլեգիումում, տեղի կունենա «Սրբազան Ռուսիայի հոգևոր ժառանգությունը» միջազգային կոնֆերանսը` նվիրված Լուվրում «Սրբազան Ռուսիա» ցուցահանդեսի բացմանը: Այդ մասին հաղորդում է Կորսունի թեմի մամլո ծառայությունը:
Կոնֆերանսը կվարի Մոսկովյան պատրիարքարանի արտաքին եկեղեցական կապերի բաժնի ղեկավար, Վոլոկոլամսկի միտրոպոլիտ Իլարիոնը:
Սրբազան Ռուսիայի մասին կոնֆերանսը կդառնա Ֆրանսիայում Ռուսաստանի տարվա եկեղեցական բացումը, տարին կնշվի բազմաթիվ միջոցառումներով:
Կոնֆերանսում կներակայացվեն ռուս ուղղափառ հոգևոր ժառանգության պատմությունը, առանձնահատկությունները և արդի նշանակությունը: Կոնֆերանսին կմասնակցեն մասնագետներ Ֆրանսիայից, Ռուսաստանից, Ուկրաինայից: Կոնֆերանսը կդառնա Լուվրոմ ներկայացված «Սրբազան Ռուսիա» ցուցահանդեսի օգտակար ներածությունը:

[yerevanci]

Բոննում բացվել է ցուցահանդես` «Բյուզանդիա. շքեղություն և առօրեականություն»
Աղբյուր` Անատոլի Խոլոդյուկ` հատուկ «Սեդմիցա.Ռու»-ի համար

Բոնն. Փետրվաի 26-ին Գերմանիայի Դաշնային Հանրապետության Ցուցահանդեսների սրահում և Բոննի արվեստի թանգարանում բացվել է «Բյուզանդիա. շքեղություն և առօրեականություն» ցուցահանդեսը: Այդ մասին հաղորդում են գերմանական ԶԼՄ-ները:
Ցուցահանդեսում ներկայացված են աշխարհի ամենատարբեր թանգարանների շուրջ 600 անգին գանձեր` ոսկե, արծաթե, մետաքսե և փղոսկրե իրեր, որոնք պատմում են Բյոզանդիայի կյանքի շքեղ և առօրեական կողմերի մասին:
Ցուցադրությունն ընդգրկում է 324թ. Սբ. Կոսնտանտին Մեծ կայսեր կողմից Հռոմեական կայսրության հիմնադրումից ի վեր մինչև 1453թ. թուրքական զորքի կողմից երկրի գրավման ժամանակաշրջանը:
Համակարգչային մի քանի անիմացիաներ և կարճամետրաժ մի քանի ֆիլմեր ցաւցահանդեսի այցելուներին տեղափոխում են Բյուզանդական կայսրության մայրաքաղաքի` Կոնստանդնուպոլսի գլխավոր հրապարակները, ինչպես նաև Եդեիսա, Թեսալոնիկ, Պերգամոն, Հալեպի մոտ գտնվող Սիմեոն քաղաքները և Սինայ Լեռան վրա գտնվող Սբ. Եկատերինա վանքը:
Բոննի թանգարանների և Մայնցի հռոմեագերմանական կենտրոնական թանգարանի համատեղ կազմակերպած ցուցահանդեսը կտևի մինչև հունիսի 13-ը:

[yerevanci]

Մեխիկոյի կենտրոնական հրապարակում գտնվել է հին ացտեկների հեթանոսական սրբավայր
Աղբյուր`«Սեդմիցա.Ռու»

Մեխիկո. ացտեկների հոյակապ սրբավայրի մասին հիշատակել են դեռևս իսպանացի կոնկիստադորները: 5 դար շարունակ քամիների աստված Էէկատլի տաճարը գտնվել է Մեխիկոյի մայր տաճարի մոտ գտնվող հրապարակի տակի ավերակներում և հայտնաբերվել բոլորովին պատահականորեն` պեղումների ընթացքում: Ըստ մեքսիկական օրենքների` նման դեպքերում տարածքը նախ ուսումնասիրում են հնագետները:
«Մենք գործ ունենք կլոր ձև ունեցող շենքի հետ, որը հավանաբար կոնաձև տանիք ուներ: Ենթադրում ենք, թե տաճարը նվիրված էր ացտեկների առասպելաբանության մեջ քամիների աստված Էէկատլին: Նա էր ստեղծում քամի և միաժամանակ ճանապարհ բացում անձրևների աստծո` Տլալոկի համար: Նա համարվում էր նաև ացտեկների պանթեոնի գլխավոր աստծո` Կետցալկոատլի մարմնավորումներից մեկը», - պատմել է հնաբան Ռաուլ Բարերը:
Տաճարը կառուցվել է XV դարի վերջին` ացտեկների կայսրության ծաղկման շրջանում: Հետազոտողները գտնում են, որ հենց տաճարն է եղել ացտեկների մայրաքաղաքի սիրտը:

[yerevanci]

Աշխարհում կաթոլիկների թիվը հասել է 1,166 միլիարդի
Աղբյուրներ`”VIS” / “CNS” / «Բլագովեստ-ինֆո»/ «Սեդմիցա.Ռու»

Վատիկան. Աշխարհում կաթոլիկների թիվը հասել է 1,166 միլիարդի. այսպիսին են Կաթոլիկ եկեղեցու “Annuario Pontificio” ամենամյա տեղեկագրում բերված տվյալները: Տեղեկագրի նոր համարի առաջին օրինակը Վատիկանի պետքարտուղար կարդինալ Տարչիզիո Բերտոնեն հանձնել է Հռոմի Բենեդիկտոս XVI պապին:
“Annuario Pontificio”-ում բերվում են հավատացյալների թվի մասին տվյալներ 2007թ. վերջի դրությամբ, որոնք այսօր մատչելի տվյալներից ամենավերջինն են: Մեկ տարի առաջ հրապարակված նախորդ վիճակագրության համեմատ` աշխարհում կաթոլիկների թիվն աճել է 19 միլիոնով կամ 1,7%-ով:
Մոլորակի վրա կա 5002 կաթոլիկ եպիսկոպոս, և այդ թիվը մի քիչ ավելին է, քան 2000թ.: Միայն վերջին տարում Բենեդիկտոս XVI պապը ստեղծել է եպիսկոպոսական 9 նոր ամբիոն և մեկ առաջնորդություն:
2000թ. համեմատ կաթոլիկ հոգևորականների թիվը 405,178-ից աճել է 409,166-ի (2008թ. տվյալներ): Կղերականների թվի աճ է դիտվում Աֆրիկայում, Ասիայում, Հյուսիսային և Հարավային Ամերիկաներում, իսկ Եվրոպայում շարունակվում է հոգևորականների և ճեմարանականների թվի նվազում:
Բոլոր կաթոլիկ հոգևորականների 47%-ից ավելին ծառայում է Եվրոպայում, 30%-ը` Հյուսիսային և Հարավային Ամերիկաներում, 13,2%-ը` Ասիայում, 8,7%-ը` Աֆրիկայում և 1,2%-ը` Ավստրալիայում և Օկեանիայում:
Հազարամյակի առաջին տասնամյակում վանականների թիվը կրճատվել է 801,100-ից 739,000-ի: Նրանց թիվը նվազում է ամենուր` բացի Աֆրիկայից և Ասիայից:
“Annuario Pontificio”-ում թվարկված են Կաթոլիկ եկեղեցու բոլոր թեմերը, եպիսկապոսները, կարդինալները և նրանց հետ կոնտակտային տեղեկատվություն` վիճակագրական տվյալների հետ միասին, հռոմեական կուրիայի հաստատությունների բոլոր ղեկավարները և պաշտոնական անձինք: Տեղեկագրում կարելի է գտնել նաև աշխարհում Վատիկանի բոլոր պապական նվիրակությունների և դիվանագիտական առաքելությունների, Սրբազան Աթոռում տարբեր երկրների դեսպանատների, միաբանական օրդենների (ներառյալ նրանցից յուրաքանչյուրի շուրջ վիճակագրություն), շտաբակայանների և կաթոլիկ ուսումնական հաստատությունների կոնտակտային տվյալները:
Կաթոլիկ եկեղեցու առաջին ամենամյա տեղեկագիրը`“Annuario Pontificio”-ի նախօրինակը, տպվել է 1716թ. Հռոմում:

[yerevanci]

Եվրամիությունը ձևավորել է հատուկ ասոցիացիա քրիստոնյաների իրավունքների պաշտպանության համար այն երկրներում, որտեղ քրիստոնյաներին հետապնդում են
Աղբյուր` Անատոլի Խոլոդյուկ` հատուկ <<Սեդմիցա.Ռու>>-ի համար

Հռոմ. Եվրամիությունը ձևավորել է հատուկ ասոցիացիա քրիստոնյաների իրավունքների պաշտպանության համար այն երկրներում, որտեղ քրիստոնյաներին հետապնդում են: Այդ մասին հաղորդում է CNL-NEWS լրատվական գործակալությոնը` հղում անեկլով CHRISTIAN TODAY-ին:
<<Մենք ստեղծել ենք աշխատանքային խումբ և որոշում ենք, թե ինչպիսի երկկողմանի գործողություններ կարող են ձեռնարկվել Եվրոպայի և առանձին երկրների միջև, որտեղ վտանգված են քրիստոնյաների իրավունքները>>, - ասել է Իտալիայի ԱԳ նախարար Ֆրանկո Ֆրատինին:
<<Ներկայումս ուսումնասիրվում է այն հարցը, թե ԵՄ ինչ միջազգային նախաձեռնություններ կարող են ընդունվել, որպեսզի այդ խնդիրն առավել հստակ դիտարկվի:
“Avvenire” իտալական թերթի հետ հարցազրույցում Ֆրատինին նշել է, որ մինչև ապրիլի վերջը կմշակվի հատուկ հրահանգ եվրոպական դեսպանների համար, որտեղ շեշտը կդրվի քրիստոնեական կրոնական փոքրամասնությունների հանդեպ վերաբերմունքի վրա:
Այդ փաստաթուղթը կօգնի <<ավելի սևեռուն հետևել քրիստոնեական կրոնական փոքրամասնությունների հանդեպ վերաբերմունքին>>, առաջին հերթին` քրիստոնյաների հանդեպ վերաբերմունքին այն երկրներում, որոնք արժանի են <<հատուկ ուշադրության>>:
Իր գործունեության մեջ ԵՄ-ը մտադիր է ուսումնասիրել այն փաստաթղթերը, որոնցում կա մանրակրկիտ ուսումնասիրություն քրիստոնյաների հետապնդման մասին ամբողջ աշխարհում և հատկապես այն երկրներում, որտեղ կրոնական ազատության առումով իրավիճակը սահմանվում է որպես հետապնդում:
Այդ ցանկում առաջինների թվում են Հյուսիսային Կորեան, Իրանը, Սոմալին և Սաուդյան Արաբիան:
Ֆրատինին ընդգծել է միաբան երկրների խմբի գոյության անհրաժեշտությունը, որոնք կարող են հանդես գալ ի պաշտպանությոն քրիստոնյաների, որպեսզի նրանք դավանեն իրենց հավատն աշխարհի ցանկացած երկրում:

araratian-tem.am

[yerevanci]

<<Եհովայի վկաներ>>-ի հրատարակություններն ընդգրկվել են ծայրահեղական նյութերի ցանկում
Աղբյուր` <<Սեդմիցա.Ռու>>

Մոսկվա. <<Ինտերֆաքս-Ռելիգիա>>-ն հայտնում է, որ մարտի 1-ին ՌԴ Արդարադատության նախարարության կայքէջում տպվել է ծայրահեղական նյութերի նորացված դաշնային ցանկը, որում ընդգրկված են <<Եհովայի վկաներ>>-ի մի շարք հրատարակություններ:
Ցանկում ընդգրկված են եհովական <<Արթնացիր>>, <<Դիտարանն ավետում է Եհովային արքայությունը>> ամսագրերի համարներ, որոնք Ռոստովի մարզային դատարանի և ՌԴ Գերագույն դատարանի որոշումներով ճանաչվել են ծայրահեղական, ինչպես նաև <<Եհովայի վկաներ>>-ի մի շարք գրքեր և գրքույկներ:

araratian-tem.am

[yerevanci]

Պոկլոննայա լեռան վրա կլինի բուդդայական աղոթավայր, հայկական մատուռ և կաթոլիկ եկեղեցի
Աղբյուրներ` «Ինտերֆաքս-Ռելիգիա» / «Սեդմիցա.Ռու»

Մոսկվա. Մոսկվայի գլխավոր ճարտարապետ Ալեքսանդր Կուզմինը կարծում է, թե Պոկլոննայա լեռան վրա տեղ կգտնվի տարբեր կոնֆեսիաների պաշտամունքային հաստատությունների համար: «Դա նորմալ է, թե բուդդայական աղոթավայր կլինի, թե հայկական մատուռ և թե կաթոլիկ եկեղեցի», - ասել է Ա. Կուզմինը մարտի 1-ին «Ռոսիյսկայա գազետա» -ում տպված հարցազրույցում:
«Հայրենական Մեծ պատերազմի ընթացքում կռվել են տարբեր կոնֆեսիաների մարդիկ: Վետերանների թիվը գնալով նվազում է, սակայն մնում են նրանց թոռները, ծոռները: Հարկավոր է, որ նրանցից յուրաքանչյուրը, գալով Պոկլոննայա լեռ` հարգելու նախնիների հիշատակը, կարողանա մոմ վառել», - ասել է Ա. Կուզմինը:
Ներկայումս Մոսկվայում` Պոկլոննայա լեռան վրա, կառուցված է ուղղափառ եկեղեցի, սինագոգ և մզկիթ:

araratian-tem.am

[yerevanci]

Հնագետները Եգիպտոսի Լուքսոր քաղաքի եկեղեցական համալիրում հայտնաբերել են Ամենհոտեպ Երրորդ փարավոնի վիթխարի արձանի գլուխը
Աղբյուրներ` «Lenta.Ru» / «Սեդմիցա.Ռու»

Կահիրե. Եգիպտոսի Լուքսոր քաղաքի եկեղեցական համալիրում պեղումներ կատարող հնագետների միջազգային խումբը հայտարարել է Ամենհոտեպ Երրորդ փարավոնի վիթխարի արձանի գլուխը գտնելու մասին:
Գրանիտե գլուխն ունի 2,5 մետր բարձրություն: Արձանը, որից գլուխը պոկվել է, այդ նույն հնագիտական արշավախումբը հայտնաբերել էր մի քանի տարի առաջ: Փարավոնը քանդակված է կանգնած դիրքում, Վերին Եգիպտոսի թագը գլխին., կրծքին ծալված ձեռքերով, որոնցում բռնել է գերագույն իշխանության նշանները:
Գլխից պոկվել է մի մեծ կտոր` փարավոնի մորուքը: Գիտնականները հուսով են շուտով մորուքը ևս գտնել:
Լուքսորի եկեղեցին, որտեղ գտնվել է արձանը, կառուցել է Ամենհոտեպը` որպես սեփական գերեզմանոցային համալիր:
Ամենհոտեպ Երրորդը կառավարել է Եգիպտոսը մ.թ.ա. 1390-1352թթ. Վերջերս կատարված ուսումնասիրությունները հաստատել են, որ Թութանհամոն փարավոնը նրա թոռն էր:

araratian-tem.am